Брангуртысь черк, платёжной карта но урмем животъёс…

Удмурт Дунне
By Удмурт Дунне 8 июня, 2015 17:17

Нунал бӧрсьы нунал

Кез

Бусыоссы вожекто

Кез ёросын тулыс гырон-кизёнлы йылпумъянъёс лэсьтӥзы.

Киземын 15 сюрс 297 гектар муос, кылем арын сярысь, со 3 процентлы уногес. Одӥг аръем турынъёс киземын 3 сюрс 225 гектар вылэ, етӥн — 995 гектаре, трос аръем турынъёс — 4 сюрс 572 гектар вылэ, кукуруза — 40 гектаре. Вань тулыс ужъёс нокыӵе ӝеганъёстэк ортчытэмын. Азьветлӥсь луизы «Большевик», «Гулейшур» но «Маяк» СПК-ос.

Балезино

Иванъёс но Марьяос вуно

Балезино ёрос администрациысь загс ужпумъёсъя ёзын ужасьёс куд-ог лыдпусъёсты веразы.

5 толэзь ӵоже ёросын 177 пинал вордӥськиз, кылем арен ӵошатыса, 22 пиналлы ичигес луэ. 60 егит семьяын нырысетӥ нунызы вордӥськиз, 80-аз — кыкетӥез, 35-яз — куинетӥез. Ньылетӥ пинал вордскем 6 семьяын, витетӥ но куатетӥ пиналъёс — быдэн одӥг семьяосын. Пиналъёсты ӵемгес нимало Дмитрий, Кирилл, Роман, Валерия, Софья но Юлия, шергес Давид, Арсен, Муслим, Ева, Василиса, Мирослава, Лея но Инджи.

Кизнер

Чеберайёс но батыръёс

Кизнер ёросысь нылпи садэ ветлӥсьёс пӧлын 4-тӥ арзэ «Пичи чеберайёс но батыръёс» вожвылъяськон ортчытӥзы.

Кизнер каргуртысь 1 номеро нылпи садэ трос калык люкаськиз: 8 нылпи садысь быдэн одӥг ныл но пи сяна, воспитательёс но висисьёс вал. Ужрадэз ортчытыны юрттӥзы ёрос администрациысь дышетонъя управление, «Удмурт Кенеш» огазеяськонлэн ёросысь ёзэз. Пиналъёс пӧртэм шудонъёс пыр возьматӥзы удмурт кылэз тодэмзэс. «Чеберай» ним сётэмын Кизнерысь 7 номеро нылпи садэ ветлӥсь Диана Корниловалы, нош удмурт пиос пӧлын вормиз Вуж Бӧдья гуртысь Артём Сидоров.

Ува

Намотэн шедизы

Ува ёросысь Нылга каргурт котырысь ӵыпетысь кутэмын намотэн чорыгасьёс.

Кызьы тодмо, 15-тӥ апрельысен 15-тӥ июнёзь Удмуртиысь шуръёсын чорыганы лэземын ярдурысен гинэ визнанэн. Куд-ог ваменэс адямиос намотэн шуре пыро. Ува ёросысь чорыгасьёслэсь шедьтэмын резина пыж, 60 метр кузьда кык намот. 30-лэсь ятыр чорыгзы таламын. Тая уголовной уж ӝутэмын.

Грак

Пуриськись куно

Берло дыр ӵоже шаерысьтымы 45 пол урмон учыр шараямын, со пӧлысь 4-ез Грак ёросын.

Удмуртиысь ветеринарияя управление ивортэмъя, Грак ёросын улӥсьёс доры ӧтьымтэ пӧйшуръёс ӵемысь вуыло. 8-тӥ мае «Граховский» огазеяськонлэн чорыг питомниказ урмем ӟичы вуылэм, нош кемалась ик ӧвӧл таӵе пӧйшур, Пор Вожой гуртысь 2 азбаре пыраса, пуныосын жугиськем. Ӟичыез виизы, нош пӧйшурен пуриськем пудоослы вакцина пуктылӥзы.

Камбарка

Люкаськон инты

Камбарка ёросысь пограничной войскоосын службазэс ортчытэм муртъёс понна таиз ар пыраклы вунонтэм кылёз.

28-тӥ мае Камбаркаысь воинъёслы-интернационалистъёслы сӥзем синпелет доры усьтӥзы бырем пограничникъёсты буре ваён пул. Азьланяз ёросысь «вож беретъёс» асьсэ праздниксэс та интыын ортчытъялозы. Пограничникъёслэсь адӟем каризы мукет войскоосын службазэс ортчытэмъёс, соос но ас нуналзэс пусъёнлы синпелет доры нимысьтыз пул усьтыны малпало.

Пичи Пурга

Удмурт сямен чирдӥзы

Тройча нуналэ Пичи Пурга ёросысь Брангуртысь выль черкын нырысьсэ бадӟым служба ортчиз.

Кызьы тодмо, черк пуктонлы Брангуртысь песянайёс вань гонораръёссэс сётӥзы. Туннэ нуналлы лэсьтӥськон ужъёслы 16 миллион манет пала быдтэмын. Кылемын на черк котырез кенераны. Тройча нунал азьын гуртысь вань мылкыд карисьёс черк котырез чеберъязы, дорысьтызы обросъёс вайизы. Нырысетӥ службае Брангуртысь но матысь гуртъёсысь сюлэсь ятыр адямиос люкаськизы. Выль черкын нылпиосты пылатыны но егит семьяосты венчать карыны кузь черод кылдэмын ни.

Иж

Паймытӥз

Ижысь Елена Сосновская кылем толэзь пумын суреданы быгатэмез понна 150 сюрс манет утӥз.

Национальной платёжной «Мир» карталы пус (логотип) лэсьтон вылысь Россиын нимысьтыз конкурс ялӥзы вал. Конкурсэ 5 сюрс 500 уж вуиз, со пӧлысь 4 сюрссэ вожвылъяськонэ пыриськыны лэзизы. Устоосыз пӧлысь устоез 20 уж понна онлайн-куара сётон мынӥз. Вормисе потӥз Ижысь УФСИН-лэн пресс-службаяз ужась Елена Сосновская.

Валентина Емельянова

Удмурт Дунне
By Удмурт Дунне 8 июня, 2015 17:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<