«Бакчаямы будэ шунды» книга — кылсуредъёслэсь люкам зурод

Удмурт Дунне
By Удмурт Дунне 23 июня, 2015 13:56

обложка.indd«Бакчаямы будэ шунды», — вера тодмо кылбурчилэн Иосиф Ивановлэн «Удмуртия» издательствоын потэм книгаысьтыз лирической героез. Нош асьмеос валаськомы, таӵе кылсуред пыр шундыберган сярысь ивортэмын шуыса.

Зэмзэ вераса, «Бакчаямы будэ шунды» книга быдэсыз чебересь но яркытэсь кылсуредъёсын тырмытэмын. Кылсярысь, ерпечка пияш выллем тӧл мынӥсь-ветлӥсьёслэсь шляпаоссэс ишкалля, нош нюлэскы вуыса, писпуос пӧлы йыроме но ӵукнаозь чусоме. Пилемпи бадӟым зоро пилем луон понна вуэз «сие но сие», нош шунды сое бӧрӟытэ но пегӟыны куре. Шулдыр мылкыдо зонт зор ултӥ лумбыт калге, нош югыт пиштӥсь шунды мычиське но, зонтлэн мылкыдыз куашка, малы ке шуоно со адямиослы кулэтэм луэ. Сӥзьыл куазь тэлетӥ калге но писпуосты льӧль, ӵуж, горд буёлъёсын нашта, нош тол соосты тӧдьы чигвесен кильтыръя. Люкам зуродъёсын, консерва пушкын сямен, пӧсь гужемлэн зынъёсыз ватэмын, нош тол вуыса, со зуродъёс асьсэ узырлыкенызы гидъёсы лашкинто…

Трос та выллем суредъёсты шедьтыны луысал Иосиф Ивановлэн пиналъёслы сӥзем книга бичетысьтыз. Та автор уга одӥгез яркыт кылбурчи, кин вала покчиослэсь тумошо но узыр дуннезэс.

Кылбуръёссэ Иосиф Иванов лад-лад каб-тусъёсы пыртэ. Пиналъёслы уга, дышетыны мед быгатозы но йыразы мед кылёз шуыса, кылбурез одно ик крезьгуръя но рифмаосъя радъяно.

Вераны кулэ на, «Бакчаямы будэ шунды» книга Александр Васильевлэн туж быгатыса но валаса лэсьтэм суредъёсыныз чеберъямын. Кылбуръёсын возьматэм учыръёс, та суредъёсын узырмыса, син шоры уката но яркытгес пуксё.

Сергей Матвеев

«Удмуртия» издательствоысь редактор

Удмурт Дунне
By Удмурт Дунне 23 июня, 2015 13:56