Алексей Ельцовлэн «Советской Удмуртиын» ужамез сярысь тодэ ваёнъёсыз

Удмурт Дунне
By Удмурт Дунне 18 июня, 2015 16:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
алексей ельцов

А. Ельцов (бурысез).

Бер сӥзьыл Сьӧлтала командировкае ыстӥзы. Отын, пе, газетлы гожтӥськон лябгес мынэ. Лыктэм мугме партилэн райкомаз валаса пумитазы. Райкомын но почтаын ужасьёсын ӵош кӧня ке гуртъёсы потам. Кытчы вуылыны ӧз кылды, со гуртъёсысь кивалтӥсьёсын телефон пыр кенеши. Калык почтае кыстӥськиз. Ма но со лэсьтыны быгатэмелы шумпотыса, арня пумын 10 часын автобусэ пукси.
Кӧня ке нунал ӵоже зорем бере куазь кезьытскиз. Ог дасо иськем ортчим-а, ӧм-а, йӧвалег дуремен, сюрес чиль-дол пиштыны ӧдъяз. Каллен ке но, автобусмы азьлань гылӟе. Кытысь ке ӧвӧл азямы К-700 трактор потӥз. Меӵкыт гурезе ӝогак тубыны ӧдъя вал но, уробоеныз валче сюреслы кеӵевыл султӥз. Азьлань но, берлань но вырӟемез уг луы ни. Сылӥськом. Сьӧрысьтымы «быж» кузьгес но кузьгес луэ…
Милемын ӵош автобусын Иж пала ожгарчи дӥсен адями мынэ вал. Кема малпаськытэк, кылдэм югдурез тупатыны басьтӥськиз. Со кивалтэм улсын трактор, прицепсэ сюрес дуре кельтыса, вань машинаосты гурезь йылэ кысказ. Колоннамы, 12 час ортчыса гинэ, Ижкаре вуиз.

* * *
Гужемлэн кутсконаз Алнаше потӥ. АВМ-ёслэсь ужамзэс, пе, эскероно. Можгала автобусэн вуи гинэ, ведра дурысь кадь кисьтыны кутскиз. Сюрес урдсын машина возьмаса сылонъям, сучыр-сучыр котми ини. Нокин но уг пукты. Ма, мынӥсь-ветлӥсез ик ӧвӧл — сюрес пытсамын: кытын асфальт тыро, кытын выж лэсьто…
Нош мыным одно ик Алнаше вуоно, редакцилэсь заданизэ быдэстоно. Кема возьмай. Дугдӥз Т-150 трактор. Руль сьӧрын егит воргорон пуке.
— Лобим, — шуэ.
— Нош кызьы Валоез ортчом?
— Питранъёсы но котмыса уз вуэ!
— Нӧдӥм ке?!
— Кытчы? Алнаш палан тузон пурӟе — толэзь пала шапык но уг усьы ни!
Зэм ик, Можга черкогурт сьӧры вуим гинэ, зор дугдӥз. Алнаш палась шуныт омыр пельтӥз.

* * *
Парторганизациослэсь улэм-вылэмзэс сэрттыны-пертчыны ӵем гинэ интыосы поталляно луылӥз. Валамон, журналистъёсты котькытын ик огкадь ӧз пумиталлялэ. Райкомъёсысь куд-огез ужасьёс, милесьтым вуэммес тодыса, доразы ик пырыны ӧз лэзьылэ яке воксё но кытчы ке ышылӥзы. Но тросэз валаллязы: газет соослэн ужазы юрттоз. Соин ик, вылды, партилэн Воткинск райкомезлэн нырысетӥ секретарез А. Фоминов доры пырыны ноку но пыкъетъёс ӧй вал. Ма муген вуэммес тодыса, со ачиз руль сьӧры пуксёз но кулэ интые вуттоз. Кинэ курлано яке ушъяно — ачиз ӵектоз. Соиз но, таиз но милемлы кулэ. Бере кылисьсэ но, азьмынӥсьсэ но син азьын возёно, шуылӥз кивалтӥсь…
А. Фоминов туннэ но калык пӧлын. Али со Удмурт Элькунысь Общественной палатаен кивалтэ. Азьвыл сямен ик, журналистъёсын пумиськылыны ноку уг пумитъяськы.

* * *
Инвожо толэзьлэн кутсконэз. Куазь пӧсь. Киясае, капчи дӥсяськыса, мыноно кариськи. Отчы вуыса, совхозысь мастерское вуылӥ, турнаны потон машинаослэсь дасьлыксэс чаклай. Собере «Сельхозтехникае» мынӥ бусы ужъёслы дасяськон пумысен юалляськыны. Кивалтӥсь доры егит специалист пыриз. Сакгес учки но — техникумын ӵош дышетскем эше. Шумпотӥ. Ньыль-вить ар ӧм адӟиське вал ни.
— Кунокуамы ёросамы ӧвӧл, дорамы кӧлод, — шуиз тодмое.
Мон пумит ӧй кариськы.
Ӵош дышетскем эше ӵуказеяз но юрттӥськиз. Угось уй куспын гыб-гыб лымы усем. Нош мон дэрем коже гинэ. Тодмое механик луыса ужа вал, машинаеныз Завьял ёросэ потон сямен монэ но сьӧраз басьтӥз. Озьы дор палам кынмытэк-котмытэк бертӥ.

* * *
Со аре оштолэзь шорын ик пӧсь кариськиз. Гуртоос бусы ужъёсты мытӥзы. Газетлэн редакторез Василий Михайлов фотокорез Александр Кузнецовез но монэ 1-тӥ Майлы репортаж дасяны ыстӥз. Завьял ёросысь тужгес бадӟым колхозэ — «Свободае» — потӥм. Нош татын кизьыны уг малпало ай. Вуим бере, кузёмылэсь куронзэ быдэстытэк, кызьы бертод? Кивалтӥсьёсын кенешыса, бусы ужъёсты татын но «мытӥзы». Ми но репортажмес колӟоям…
Праздник матэктэ, материал печатланы дась. Шуак тӧдь-тӧдь лымы усиз. Нунал, кык уг шуна. Газет потон азьын гинэ бусыос выльысь мозмытскизы. Озьы дыртыса лэсьтэм ужмы, ӧжыт гинэ газет баме потытэк ӧз кыльы.

* * *
Командировкае, машина тыр люкаськыса, потӥм. Монэ Якшур-Бӧдья ёросэ кельтӥзы. Оштолэзе вал со. Уйёсы ӟырт кезьыт, нуназе шунды пыже ини. Гуртъёсын лымы сюресъёс бырымтэ на вал. Соин ик пыдам шуныт катаен потӥ. Нош куазь монэ гинэ возьмаса улэм, лэся. Нуназе шорын шуак пӧсь кариськиз. Лёгиськыны ик уг луы, лымы улын шупыль каре.
Колхоз конторае пырыса, мылкыд уката сӧриськиз. Кивалтӥсьёссы кенеше кошкиллям. Нуназеян вуиз но, сиськоннимы ӧвӧл, шуизы. Магазинысь мар но со басьто, малпасько. Ревизия, пе.
Ӝыт вуиз. Кытын ке кӧлоно. Профкомлэн кивал-тӥсез кыӵе ке кышномурт доры нуиз. Пиез, пе, кемалась ик армиысь ӧз берты, огъя кыл шедьтоды. Шедьтӥм. Егит мурт сиёнэн но, пыдкутчанэн но юрттӥз, машинаеныз но келяз. Ӟеч адямиос котькытын вань. Соослы туж бадӟым тау!

Алексей Ельцов, «Кизили» журналлэн

валтӥсь редакторезлэн воштӥсез,

газетлэн 1977-тӥ-1989-тӥ аръёсы

корреспондентэз.

Туспуктӥз Михаил Егоров

 

Удмурт Дунне
By Удмурт Дунне 18 июня, 2015 16:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<