Ӟеч мылкыдзы али но шунтэ

Удмурт Дунне
By Удмурт Дунне 19 июня, 2015 09:42
романов

Г. Романова

«Советской Удмуртия» газетэ монэ ужаны ӧтизы 19 арескам. Отчыозь Ижын 5 этажъем «хрущёвка» шуон кирпич юртъёс ӝутонын тырши.

Бригадамы каменщикъёслэсь, подсобникъёслэсь, штукатуръёслэсь кылдытэмын вал — ог 15 муртлэсь. Милемыз, 3 нылъёсты, отчы профтехучилище бере лэзизы. Ваньмы ик — каменщикъёс. Но кирпич тырыны ӧз оске ай, подсобникын ужамы. Лумбытэн-лумбытэн раствор сураськом, собере сое кирпич тырисьлы сётъяськом. Акыльтымон огпӧртэм уж. Йырмы но кур луылӥз: училищеын милемды кирпич тырыны дышетӥзы ук!

Кӧня ке толэзь ортчыса, бригадирмы милемыз жаляз, лэся: Пушкин урамын Политпросвещениея юрт ӝуто, пе, отчы каменщикъёс кулэ. Сюлэм выжыям вуэм ужлэсь мозмыны муг сюремлы туж шумпотӥ, озьы бадӟым лэсьтӥськонэ вуи. 17 аресъем ныллы бадӟым, ӝужыт укно висъёсты тырыны-ӝутыны оскизы. Аслым ачим сыӵе йӧно потӥ. Жадёнэз валатэк, мастерокен ужай, сэрегъёссэ мертаса, кирпич тыри. Пӧрмиз ведь! (1990-тӥ аръёсы Политпросвещениея юрт филармония луиз. Вӧзтӥз ортчылыкум, горд кирпичлэсь тырем укно висъёсты али ке но шумпотыса, данъяськон мылкыдын учкылӥсько).

Азьланяз но лэсьтӥсько-нын ужасал, вылды, ай, коркаос ӝутысал. Но одӥг тулыс нуналэ дорамы, Соцгородокысь общежитие, «Советской Удмуртия» газетысь корреспондент Матильда Иванова вуиз. Газетлы гожтӥське вал, пе, собере, асьтэос но, оло, гожъяськиськоды. Мон солы кылбуръёсыным но веросъёсыным тырмытэм зӧк тетрадьме возьматӥ. Журналист ушъяз, пӧрамъёсме сьӧраз басьтӥз. Нош кӧня ке улыса, монэ редакцие ӧтизы.

Культура отделын соку Роман Валишин, Семён Перевощиков пукизы. Монэ соос туж капчи мылкыдын пумитазы, кӧня ке кылбуръёсме но «Ныркышет» веросме газетэ поттыны дасяломы, пе. Шумпотэменым пыдулме шӧдылытэк редакциысь кошки.

Толэзь но ӧз ортчы, нош ик редакцие ӧтизы. Табере ини пырак редакторлэн воштӥсез Степан Машков доры пыртӥзы. Мон сярысь солы вераллям, лэся, ини. Соку ик вордӥськем гуртысьтым калык сярысь юалляськыны кутскиз. Соосты троссэ тодэмезлы пайми. Собере валэктӥз: 1950-тӥ аръёсы Степан Григорьевич Былайпочинкаын председатель вылэм. Анай-атайме но умой тодэ. Семьяеныз, юртмы дорысь одӥг корка кельтыса гинэ, улӥллям угось.

Уг тодӥськы, малы мон Степан Григорьевичлы сокем кельшиськем, но гужемзэ мыным редакциын корректор луыса ужаны ӵектӥз: отпуске потэмъёсты воштод, пе. Ой, кыӵе шумпотӥ! Пӧрмыто-а, уг-а — со сярысь пинал йырам малпан но ӧй вал. Соку ик монэ корректоръёс доры васькытӥз, тодматӥз. Со вакытэ лэсьтӥськонысь дырызлэсь вазь кошкыны уг лэзё вал. Профтехучилищеын милемыз, нуналаз куинь пол сюдыса, дунтэк дышетӥзы бере, одно ик 3-4 арзэ ужаны кулэ вал. Степан Григорьевич удысысьтымы кивал-тӥсьёслы гожтэт келяз. Монэ куинь толэзьлы лэзизы.
Озьы чылкак мукет дуннее сюри. Ваньмыз удмуртъёс, котькудӥз мыным юрттыны дась вал. Тямыс класс образованиен шуыса, нокинлэсь шорам кырыж учкемзэ ӧй шӧдылы. Куинь толэзь ыбыса кадь кошкиз, табере нош ик — кирпич, раствор, мастерок…

Степан Григорьевич доры пыри. Мыным тӥ дорын туж яраз, шуисько, мылкыды гожъяськыны куриське. Со монэ валаз. Лэсьтӥськонысь вылӥ кивалтӥсьёслы нош ик гожтэтэн вазиськиз. Озьы мон редакцие ужаны кыли, быдэс улонме гожъяськон удысэн герӟай. Ужан сямен дас классэз, собере Удмурт кун университетэз йылпумъяй.

Со дырысен трос аръёс ортчизы, нош сюлэмме али ке но шунтэ редакциын 1970-тӥ аръёсы ужам муртъёслэн ӟеч мылкыдзы. Ваньзэс нимын-тулын верасал, мадьысал, но солы одӥг гинэ газет бам уз тырмы.

Галина Романова,

«Кенеш» журналысь корреспондент,

газетлэн 1969-тӥ-1979-тӥ,

2003-тӥ-2007-тӥ аръёсы

корреспондентэз

Удмурт Дунне
By Удмурт Дунне 19 июня, 2015 09:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<