Ижын «Разделяйка» жуг-жаг нимаз бича

Акцие пыриськись адямиос толэзь ӵоже жагзэс нимаз люкало — кортэз, бумагаез, батарейкаосты, пластик ӟенеликъёсты но полиэтилен пуйыосты, тӥяськем электроникаез — но одӥг нуналэ жаг бичан интые ваё.

Толэзьлы огпол Ижысь «Зелёный паровоз» огазеяськон жуг-жагез нимаз бичанъя «Разделяйка» ужрад ортчытэ.

Таиз толэзьысен жагез бичаны кутскизы Удмурт кун университет вӧзын, угось татын калыкез но трос, студентъёс но ужрадэ мыло-кыдо кыстӥсько. Акцие пыриськись адямиос толэзь ӵоже жагзэс нимаз люкало — кортэз, бумагаез, батарейкаосты, пластик ӟенеликъёсты но полиэтилен пуйыосты, тӥяськем электроникаез — но одӥг нуналэ жаг бичан интые ваё. Та акция сяна, Ижысь азбаръёсын кылдо пияла но пластик бичанъя нимаз вышкыос. Собере вань люкам жуг-жагез заводъёсы нуо, отын солэсь выль арбериос лэсьто.

«Зелёный паровозлэн» ужаз кемалась пыриське ни удмурт азьветлӥсь но егит анай Наталья Образцова.

— Ми малпаськиськом нылпиосмылэн азьланьзы сярысь. Ми ум луэ ни, нош куштэм жагмы костаськоз, пиналъёсмы со пӧлын улозы, — вера со. — Жаль, жуг-жагез толэзьлы огпол гинэ бичало шуыса. Таяз толэзе мон, кылсярысь, мыныны ӧй быгаты. Табере мынам балконэ жуг-жаген тырмемын.

Акцие мыло-кыдо пыриськись адямиос верало, кызьы, лавкаын басьяськыкузы, ӵемысь учкылыны кутскизы сиён-юонъёслэн упаковкаоссы шоры. Упаковкаез переработкае лэзьыны уг луы ке, сиён-юонэз уг басьто. Озьы ик «Зелёный паровозэ» ветлӥсьёс куро: полиэтилен пуйыосты шергес кутоно, пластик посудъёсы тырем сиён-юонэз басьтоно ӧвӧл. Озьы быгатом утьыны асьмелэсь инкуазьмес.

«Зелёный паровозлэн» акциосыз сярысь учке татысь: vk.com/zelenyiparovoz

Мария ВЕКШИНА