16-тӥ куартолэзе — «Музей уй». Кудаз музее мыном?

Удмурт Дунне
By Удмурт Дунне 15 мая, 2015 11:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

ночь музеев16-тӥ куартолэзе, быдэс Россиын сямен ик, Удмуртиын ортчоз «Музей уй» ужрад.

М. Калашников нимо музей-комплексын нылпиос тодматскозы Быдӟым ожысь наградаосын но асьсэос лэсьтыны быгатозы Суворовлэсь ордензэ. Егитъёс сэрттозы но бичалозы Калашниковлэсь автоматсэ, ыбылӥськозы.

К. Герд нимо Национальной музейын «Музей уй» усьтӥськоз 17 часын Ижысь искусствоосъя 2-тӥ школаысь пиналъёслэн кырӟаменызы но «Арсенал-Бэнд» оркестрлэн шудэменыз. Чеберез гажасьёс учкозы-дунъялозы калык костюмъёсты, ож вакытысь дӥськутэз.

Ижысь суредан искусствоосъя музей нырысь шумпоттоз покчиосты, татын ортчоз П. Чайковскийлэн творчествоезлы сӥзем экскурсия-шудон. Ӝытпал возьматозы 1940-тӥ аръёсысь модаез. Экскурсиосты радъянъя отделэн кивалтӥсь Мария Евстафьева верамъя, программа дасямын пӧртэм арлыдо адямиослы. Кылсярысь, ӝытазе 19 часын музейысь реставратор Татьяна Николаева возьматоз, кызьы шонер сузяно картинаез.

Г. Красильниковлэн Ижысь музей-квартираяз 13 часысен кутскоз экскурсия. Ужрадлэн кыкетӥ люкетаз Вавож ёросысь Анастасия Шарапова шудоз крезен но куноосты та инструментэн шудыны дышетоз. М. Петров писательлэн нылыз Ольга Билоус мадёз атаез сярысь.

Лудорвай музей-заповедникын «Ю тысь амбар» экспозициез усьтозы. Отчы вуозы Ижысь но ёросъёсысь коллективъёс. Пичи Пурга ёросысь Брангуртысь песянайёсын кивалтӥсь Ольга Туктарева верамъя, песяйёс кенос усьтонэ вашкала кырӟанъёсын вуозы. Котьку сямен ик та музейын куно карозы ческыт табанен, перепечен, турын чаен, пушнер шыдэн.

Глазовысь «Иднакар» музейын ужалозы «Чупчи узырлыкъёс», «Быдӟым Вормонлы — 70 ар» адӟытонъёс, нылпиослы «Пукыӵен ыбы-лӥськон» шудон площадка.

Алнашысь историяя но литературая музей ортчытэ «Войнаен сутэм чуръёс» ужрад. А. Окилэн музей-юртысьтыз наукая ужась Мария Петрова верамъя, Г. Красильниковлэн Алнашысь музей-коркаяз вуозы школаысь но нылпи юртысь пиналъёс, бадӟымъёс но арлыдоос. «Музей уй» сӥземын фронтэ ветлэм писательёслы. Кылсярысь, Алнаш ёросысь Семён Шихаревлы. Со Быдӟым ожысь 3 блокнотэн бертӥз, отчы гожъяз войнаысь адӟем суредъёсты. Ӝытазе люкаськем калык кырӟалоз война кырӟанъёсты.

Удмуртиысь кибашлыослэн центразы дунтэк ортчоз экскурсия. Татысь методикая но наукая отделэн кивалтӥсь Елена Байкова верамъя, калык учкоз «Улӟем страна — улӟем киужъёс» адӟытонэз, пыриськоз мастер-классъёсы. Кылсярысь, ужалоз пӧраськонъя лаборатория, кытын ваньмыз дасялозы но пыжозы перепеч. Киужен тунсыкъяськисьёс асьсэос малпалозы но кылдытозы кильтыръяськон арбериос, куролэсь мунёос, кызьпу туйлэсь шуланъёс, куэм кускерттонъёс но трос мукетсэ.

Галина Савина

Удмурт Дунне
By Удмурт Дунне 15 мая, 2015 11:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<