Кызьы ортчоз Вормон Нунал

10 часын кутскоз бадӟым парад.

Вормон Нуналэ ёросъёсын, городъёсын пӧртэм ужрадъёс ортчозы. Тужгес бадӟымъёсыз луозы Ижын.

Отчы пыриськисьёс буре ваёзы, тау карозы фронтын бырем песятайёссылы, ож мышкын тыршем песянайёссылы. Асьмелы шудо улон кузьмасьёс нуналысь нуналэ ӧжытгес кылё. Соослы шуныт кыл вераны, сяська кузьманы вуттӥськоно.

9 часын Ижысь Ялан ӝуась тыл дорын буре ваёзы бырем солдатъёсты.

10 часын кутскоз бадӟым парад. Отчы потоз 26 расчёт, кылем арын сярысь, 2-лы тросгес. МВД-ын, МЧС-ын, УФСИН-ын ужасьёс борды итӥськозы кадет классъёсын дышетскисьёс. Нырысетӥ колонна вырӟоз 10 час 10 минутэ. 20 минут ортчыса, калыклы возьматэмын луоз военной техника: «Виллис», ГАЗ-67, ГАЗ-А машинаос, «Ирбит» мотоцикл, «Оса» но «Тор» зенитно-ракетной комплексъёс. Нимаз адямиослэсь но вашкала техниказэс возьматозы. Ижын улӥсь 60 аресъем Ильсур Закиров ГАЗ М-20 «Победа» машиназэ 5 ар лулъяны вырем. Озьы ик аслэсьтыз вуж ГАЗ-67 но ГАЗ-69 машинаоссэ поттоз Геннадий Берестов.

12 часысен парадэз воштоз пыдын бызьылонъя 66-тӥез Эшъяськон эстафета.

10 часысен 13 часозь Кун Кенеш дорын ас быгатонлыкъёссэс возьматозы но вузаськозы шаерысьтымы тужгес усто кибашлыос. К. Герд нимо но М. Калашников нимо музейёсын нунал ӵоже ужалозы пӧртэм адӟытонъёс.

11 часысен 16 часозь К. Герд нимо музей котырын концерт луоз. Отчы пыриськозы шаерысьтымы тужгес нимо-дано ансамбльёс: «Италмас», «Айкай», «Танок», Пичи Пурга ёросысь «Акцент», «Арганчиос», Можга ёросысь «Марӟан», Эгра ёросысь «Устолык» но мукетъёсыз.

12 часысен 15 часозь Лихвинцев ульчаысь машина дугдылон интыын ужалоз «Фронтовой Арбат». Татын фронт вакытысь открыткаос лэсьтыны дышетозы, полевой кухня ужалоз.

12 час 55 минутысен 13 часозь Шор площадьын калык дэмен быдэстоз «Катюша» кырӟанэз.

19 час 55 минутысен 20 часозь ялэмын шыпыт сылон.

21 часын Шор площадьын луоз бадӟым фейерверк.

Валентина Емельянова

Туспуктӥз Александр Горбунов