«Пётр Чайковскийлэн дор палъёсаз» фестиваль ворсаське

Туннэ, 7-тӥ куартолэзе, 175 ар талэсь азьло вордӥськиз дано композитор Пётр Ильич Чайковский. Соин сэрен «Пётр Чайковскийлэн дор палъёсаз» 58-тӥез крезьгуро фестивальлэн туннэ нуналыз тужгес но бадӟымез. Воткинскын быдэс нунал ужрадъёс мынозы.

Чайковскийлэн корка-музеяз дано музыкантъёс концерт сётозы. Татысь кылзыны луоз Карэн Шахгалдянлэсь скрипкаен но Екатерина Леденёвалэсь фортепианоен шудэмзэс. Соослэн «Короли скрипки» программазы сӥземын Г. Венявскийлэн 180 ар но Ф. Крейслерлэн 140 ар вордӥськем дырысенызы тырмонзылы. Озьы ик татысь кылыны луоз Женеваысь крезьгурез эскерисьлэсь Пьер Роснянскийлэсь «Чайковский — Россияез Западэн герӟась адями» лекцизэ. Воткинскысь «Юбилейный» культурая юртын шудоз «Золотая мелодия» оркестр. Озьы ик ортчозы пӧртэм мастер-классъёс, спектакльёс но экскурсиос, Воткинск тымет дурын усьтэмын нылпиослы шудон интыос. Ӝыт вань мылкыд карисьёс эктыны быгатозы 19—тӥ даурысь балын.

Радъяськись ужрадъёс сярысь пыр-почгес тододы татысь:

http://www.votkinsk.ru/about/info/news/15288/

«Пётр Чайковскийлэн дор палъёсаз» 58-тӥез крезьгуро фестиваль таин ворсаське. Но дано крезьгурчилы сӥзем ужрадъёс азьлантӥськозы на.

Мария Векшина

Туспуктэм: udmfil.ru