Финляндиысь режиссёр А. Риссаненлэн Библиез — крезьгур

Удмурт Дунне
By Удмурт Дунне Апрель 30, 2015 13:12
А. р

А. Риссанен тодматэ оркестрысь артистъёсын.

«П. Чайковскийлэн дор палъёсаз» 58-тӥяз крезьгуро фестивале нош ик вуиз Георгий Гаранянлэн биг-бэндэз. Бадӟым джаз оркестр но кырӟась Алина Ростоцкая концерт сётӥзы Ижысь «Аксион» культура юртын.

Г. Гаранянлэсь биг-бэндзэ странаямы но, солэн палэназ но умой тодо. 2010-тӥ арысен та оркестрлэн чеберлыкъя кивалтӥсез но дирижёрез луиз Финляндиысь Антти Мартин Риссанен. Та усточи 15 арескысеныз дирижировать каре ини джаз но симфонической оркестръёсын, паймымон чебер шудэ тромбонэн. Араз со ог 150 концерт сётэ, туэ 40 концертэз вал ини. 28-тӥ оштолэзе оркестр Ижысь учкисьёсты шумпоттӥз ке, ӵуказеяз шудыны кулэ ни вал Финляндиын. А. Риссанен туж мыло-кыдо но вераськись адями, концерт азьын ӝыны час кылемын вал, со кӧня ке юанэлы валэктон сётыны соглаш луиз.

— Антти, тӥледлы, ялан крезьгур пушкын улӥсь адямилы, мӧзмыт луылэ-а?
— Бен, луылэ. Мон аслым куддыр сыӵе пичи потӥсько со быдӟа но сомында крезьгур азьын. Но отын номыр уродэз ӧвӧл, дыр, малы ке шуоно куддыр крезьгурчилы огназ кыльыны, шыпытын малпаськыны одно ик кулэ. Малы ке шуоно котькуд концертэз, программаез пушкытӥ поттӥськод. Быдэсак бушаськод кадь, соку шумпотон мылкыд но пачылме, кыӵе ке мӧзмон но кылдэ.

— Мар яке кин бурдъя тӥледыз?
— Солистъёс, оркестр, композиторъёс но учкисьёс. Тӥни сыӵе ньыль борддор кылдэ мон котырын. Со ик инъет луэ творчестволы.

— Мар огазея тӥледыз дано улосчиенымы П. Чайковскиен?
— Мон 5 арескам шудӥсько ни вал пианиноен. Классика крезьгурлы но П. Чайковскийлэн произведениосызлы синмаськонэ бадӟым. Пичи дырысеным потэ вал быдэстэме фортепианоен солэсь нырысетӥ концертсэ. 18 арескам сыӵе луонлыке кылдӥз. Бӧрысьгес мон матын луи джазлы. Но со уг люкеты мыным классика крезьгурлы турлы аранжировкаос лэсьтыны. Кылсярысь, туннэ концертын чузъяськоз П. Чайковскийлэн «Щелкунчик» балетысьтыз «Вальс цветов» произведение, солы аранжировка лэсьтӥз быдэс дуннелы тодмо крезьгурчи Дюк Эллингтон. Тӥ кылоды, кызьы классикаез быдэстэ джаз оркестр.

— Кыӵе крезьгурез тӥ яратӥськоды?
— Мыным кельше умой крезьгур. Со сыӵе крезьгур, кудӥз потэ сюлэмысь но пыре учкисьёслэн сюлмазы. Ӵапак сыӵе музыкаез ик кузьманы тыршисько калыклы. Одӥг крезьгурез ик быдэстыны луэ сю пӧртэм. Котькыӵе жанрен мон мед ужалом, кылдытыны тыршисько умой крезьгур. Соин ик концертъёслы но дасяськисько рос-прос, котькуд программаез мон, Библиез сямен, лыдӟисько но син азям пуктӥсько, кызьы со кылдоз сцена вылын но вӧлмоз калыке.

— Крезьгур мултэс луыны быгатэ-а?
— Адями кема сютэм улэ ке, кӧттыремзэ валатэк, сиське, собере сиён шоры огшап учкемез но уг поты. Крезьгурен но озьы луыны быгатэ. Кылсярысь, мон огаз концертын ужай сю адямиен. Син азяды пуктэ ай со быдӟа оркестрез. Кудмында куара, бадӟым крезьгур, нош мыным котькудзэ кылоно, со музыка пушкы пыроно. Сыӵе концерт бере мынам но пушкы буша, жаде, огнам кылеме, шыпытын шутэтскеме потэ. Крезьгуртэк улыны мон уг быгатӥськы. Но нунал куспын со укыр трос луэ ке, туж ик умой ӧвӧл. Котькытын эсэпез мед луоз, соин ик крезьгур но мултэс луыны кулэ ӧвӧл.

Ижысь «Аксион» культура юртын Г. Гаранянлэн биг-бэндэз ассэ туж эрико возиз. Зал шулаз, чабиз, «браво» кесяськиз. Оркестрын шудӥсьёс калыклы юромо кельшыны ӧз выре. Соос сюлмысь шудӥзы, уязы, лобазы джаз крезьгур пӧлын. Валамон ӧй вал, кин тросгес шумпотон, лычсузён басьтӥз: учкисьёс-а, артистъёс-а. Соосызлы но, таосызлы но концертын умой вал. П. Чайковскийлы сӥзем фестивальлэн таяз концертаз учкисьёс но артистъёс ог-огзылы муртъёс ӧй вал.

Галина Семёнова

Туспуктӥз Наталья Гусева

Удмурт Дунне
By Удмурт Дунне Апрель 30, 2015 13:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<