Брангуртын ортчем I-тӥ нылпи театръёслэн фестивалязы шудӥз 147 пинал

Удмурт Дунне
By Удмурт Дунне 30 апреля, 2015 12:40

SONY DSC

Малы дышетэ сцена?

«Артэ» — тазьы нимаськиз Брангуртын ортчем нылпи театръёслэн нырысетӥ элькун фестивальзы. Отчы пыриськизы Шаркан, Алнаш, Якшур-Бӧдья, Кияса, Сьӧлта ёросъёсысь но Ижкарысь 15 нылпи театръёс, оглом 147 пинал.

Арнянунал. Брангуртысь культурая юртын ур-вар потто — лудкечъёс, эмчиос, солдатъёс — олокинлы но пӧрмытскем пиналъёс. Пӧлтӥзы бызьылыса ветлэ фестивалез радъясь, Брангуртысь «Кузьыликар» театрен кивалтӥсь Ольга Туктарева. Фестиваль радъяны малпан со доры вуиз «Ми тӥледлы дэмласьком» пьесаосын бичет поттэмез бере.

— «Кузьыликар» театреным туж шугомиськомы: сцена вылын пуктыны нылпиослы пьесаос но выжыкылъёс туж ӧжыт, — вера Ольга Туктарева. — Озьы бадӟым классъёсысь пиналъёсын ми пьесаос гожъяны кутским. Вазиськимы Финляндиысь Кастрен нимо фондэ, соослэн юрттэменызы, валля арын люкам но гожтэм пьесаосынымы бичет поттӥм. Финъёс «Артэ» проектэз но быдэстыны юрттӥзы.

Зэм но, фестивальлэн пайдаез туж бадӟым. Гуртъёсысь нылпиослэн сьӧрло потаны мылкыдзы вань, но уксёзы ӧвӧл. Нош таӵе фестивальёс сыӵе луонлык сёто. Соос ог-огзылэсь шудэмзэс адӟо, выль тодон-валанъёс басьто, мылкыдзы эшшо пуроме на.SONY DSC

Пичи Пурга ёросысь Улӥ Посьтолысь клуб бордын ужась «Смешарики» нылпи коллектив трос калык азе нырысьсэ потӥз.

— Татын ми возьматӥмы Лия Малыхлэсь «Моко но Боко пи потто» выжыкылзэ, — вера режиссёр Ирина Токарева. — Театрмы 4-тӥ арзэ ужа ни. Солэсь азьвыл мон Кабыста покчи ёзо школаын кружок гинэ нуисько вал. Табере Кабыстаысь нылпиосы 6-тӥ классын дышетско ни, но театре озьы ик ветло.

«Смешарикиын» шудэ 14 пинал. Куд-огез соос пӧлысь артист луыны малпало.

— Ми театре нырысетӥ классысен ик ветлыны кутским, — верало Бокоез но Мокоез шудӥсьёс Ангелина Надюхина но Александра Егорова. — Ми трос сценкаос возьматъям ни, гурт калык ушъя но, ми шумпотӥськом. Будӥм ке, театрын, бадӟым сцена вылын, шудомы.

Мае гинэ ӧз адӟе Брангуртэ люкаськемъёс. Кузебай Герд нимо гимназиысь покчиос «Муха-Цокотуха» выжыкылысь геройёслы пӧрмизы. Пичиесь ке но, сыӵе умой быгатӥзы возьматыны выжыкылысь нымы-кибыослэсь сямъёссэс. Алнаш ёросысь Туймыйыл гуртысь пиос асьсэзыз шудӥзы кадь: одӥгез, «2» басьтыса, эшеныз дневникеныз воштӥське. Сьӧлта ёросысь Выль Мќнья гуртысь нылпиос учкисьёсты синвуаськытӥзы: пиез Афганистанын бырыны шедиз шуыса, анайлы ивор вуэ.

SONY DSC

— Фестивале пыриськем коллективъёс котькудзы ас сяменызы кужмоесь, — вера одӥгез дунъясь, Ижысь Эшъяськон юртысь режиссёр Дмитрий Корепанов. — Котькуд нылпи театрез но отысь усто шудӥсьёсты пӧртэм номинациосын пусйимы. Висъяны кулэ Шаркан ёросысь Сосновка черкогуртысь Ксения Тихоноваез. Со сюлэмез позыртӥсь монолог лыдӟиз. Профессиональной актёръёс кадь шудӥзы Брангуртысь «Кузьыликар» театрысь пиналъёс.

— Фестиваль медаз гинэ быры вал, — шуэ Ольга Туктарева. — Тани 2000-тӥ арын ми «Кузьыликаренымы» вуылӥм вал Марий Элэ, отын ортчиз фин-угор нылпи театръёслэн фестивальзы, но со малы ке чалмиз. 1990-тӥ аръёсы Шаркан ёросысь Быгы гурт нылпи театръёс пӧлын конкурс ялӥз вал, жаляса верано, ми но шаркан нылпиос сяна, отчы ӧм вуэ. Пайдазэ адӟытэк, та фестивалез ӟуч нылпи театръёс пӧлын радъяськись ужрадэн огазе каризы.

Нош кыӵе удмурт театр, гуртысьтыз сьӧрло нокытчы потатэк, дӥсьтоз ӟуч театръёс пӧлын шудыны? Фестивалез радъясьёс азьланяз малпало «усточикар» выллем лаборатория усьтыны. Отчы люкаськозы пӧртэм ёросъёсысь театр коллективъёс, театрез азинтон бордын ужалозы. Озьыен, вуоно актёръёс покчи классъёсысен будозы ни.

— Театр — со трос быгатонлыкъёсты огазеясь искусство. Татын кырӟаны но, сцена вылын ог-огдэ валаса шудыны кулэ, — вера лулчеберетъя но туризмъя министр Владимир Соловьёв. — Театре ветлэм нылпиос возьдаськонзылэсь куштӥсько, асьсэ кужымзылы оскыны кутско. Удмурт пиналъёслы со тужгес но кулэ.

Владимир Михайлович оскытӥз, нылпи фестиваль азьланяз одно ик радъяськылоз.

Мария Векшина

 

Удмурт Дунне
By Удмурт Дунне 30 апреля, 2015 12:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<