Михаил Петров войнае нырысетӥ нуналъёсаз ик кошкиз

Удмурт Дунне
By Удмурт Дунне Апрель 28, 2015 08:24

Петров_Михаил_Петрович_(писатель)Удмурт классиклы, кылбурчилы, писательлы, кылысь кылэ берыктӥсьлы, Быдӟым ожысь ветеранлы Михаил Петровлы туэ тырмысал 110 арес.

Писательлэн нылыз Ольга Билоус верамъя, атайзэ оже басьтӥзы войналэн нырысь нуналъёсаз ик.

— Со ожмаськиз 208-тӥ стрелковой дивизиын. Москваысен Кёнигсбергозь вуиз. Ожъёс вискын кылбуръёс, ӵош ожмаськись эшъёсыз сярысь гожъяз. Милемлы но гожтэтъёс но открыткаос лэзьяз. Анаелэсь верамзэ тодӥсько на. Огаз гожтэтаз атае тазьы шуэм:

«Немецъёс пуштытӥзы блиндажмес, мон соку солдатъёс доры кошкемын вал. Вань кылбуръёсы, тодэ ваёнъёсы пень луизы. Табере уйёсы уг изиськы, мар йырам кылиз, гожъясько…».

Михаил Петровлэн трос гожтэтъёсыз, туспуктэмъёсыз но война вакытэ пӧртэм интыосысь семьяезлы ыстэм открыткаосыз утисько К. Герд нимо Национальной музейын но Национальной библиотекаын. Картэзлэсь медальёссэ но Горд Кизили ордензэ писательлэн кузпалыз озьы ик сётӥз Национальной музейлэн фондаз. Писатель Николай Кузнецов Обороная министерстволэн архивысьтыз шедьтӥз Михаил Петровлэсь наградной листсэ. Отын ваньмыз пыр-поч гожтэмын, кытын но кызьы ожмаськиз удмурт писатель.

Николай Кузнецов верамъя, Михаил Петрович Петров 1941-тӥ арысен тушмонэз жугиз Калинин но 3-тӥ Белорус фронтъёсын. Кышкасьтэм луэмзэ возьматӥз, 43-тӥ армилэн 208-тӥ стрелковой дивизиысьтыз 662-тӥ артиллерийской полкын командирлэн воштӥсез луыса ожмаськыкуз. Войнаын капчи дыръёс уг луо. Но тужгес секыт ожъёс дыръя капитан М. Петров кыл кутӥз солдатъёс доры дыраз но тырмыт пыӵал тӥрлык мед вуоз шуыса. Солэн сюлмаськеменыз, полк дугдылытэк немецез жугиз. Асьме солдатъёс удмурт писателен валче тушмонэз но солэсь техниказэ пазьгизы Данифельде, Соуснея но Шяуляй городъёс дорын. Кышкатэк ожмаськемез понна Михаил Петров данъямын «За боевые заслуги» медален но Горд Кизили орденэн.

Галина СЕМЁНОВА

Удмурт Дунне
By Удмурт Дунне Апрель 28, 2015 08:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<