Экономикаез — выль сюрес вылэ

Удмурт Дунне
By Удмурт Дунне 20 апреля, 2015 11:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
В. Путин

В. Путин

Кызьы утёно калыклэсь осконзэ?

Россиын улӥсьёслэн Президентэн Владимир Путинэн 13-тӥез кенешонзы ортчиз.

Меӵак эфир радъяськиз Москваысь Гостиной дворын: отчы 300 пала адямиос люкаськизы, юанъёссэс Президентлы синмысь синме сётыны быгатӥзы. 9-тӥ апрельысен 3 миллион пала вазиськонъёс люкаськизы — та лыдпус эфир ӵоже син куспын ӝутскиз на. Туэ рекорд пуктэмын: кылем арын Президентэн кенешонын 2 но ӝыны миллион юан люкаськиз вал меӵак эфир йылпумъяськем бере гинэ.

Котьку сямен ик, туэ но кенешон усьтӥськиз ортчем арлы йылпумъянъёс лэсьтонэн. Кунмы понна со капчиен ӧз сётскы: мувӧйлы дунъёс усизы, экономикаын шуг-секытъёс кылдӥзы, та вылэ санкциос ватсаськизы, Украинаын но югдур буйганы уг вала на. Но меӵак эфирез нуись Мария Ситтель пусйиӟ озьы ке но калыклэн мылкыдыз ӧз усьы.

Нырысетӥ юан чузъяськиз Приморск улосысь Наталья Воронцовалэсь: улон дуноя, нош уждун кулэсме. Кӧня кыстӥськоз таӵе югдур?

— Зэм, калыклэн доходэз, инфляциен ӵошатыса — кылем арлэн пумаз со 11,4 процентозь тэтчиз — шӧдскымон кулэсмиз, — шуиз В. Путин. — Тае ми лыдэ басьтытэк ум кельтӥське, социальной политикаез радъяку. Тужгес но бадӟым саклык висъяно луоз секыт югдуре шедемъёслы. Туннэ нуналлы валтӥсь ужпум — утёно ужан интыосты. Со понна бюджетын чакламы 82 миллиард манет — кулэ луиз ке, со ваньмыз келямын луоз улосъёсы. Со вакытэ ик осконэ нуналмысь юнма: инфляция кулэсмоз, манет эшшо но юнмалоз.

Вуэм юанъёс пӧлысь уноез санкциосын герӟаськемын вал. Сиён-юон поттӥсьёс, кылсярысь, Президентлы кышканзэс шараяллям: али гинэ производствомес паськытатыны но вузмес вӧлмытыны кутскимы — медаз гинэ быре вал со санкциоссы. Владимир Владимирович шуиз:

— Экономикаын шуг-секытъёсты санкциосын гинэ герӟаны уг луы. Дыр вуиз Россилэсь экономиказэ выль сюрес вылэ пуктыны: угось та дырозь Россиын уждун ӝоггес ӝутскиз, ужазинлыкен (производительность) ӵошатыса. Соин ик асьмелэн экономикамы амалтэк вуиз таӵе шуг-секытэ. Ваньзэ воштоно, выль сямен радъяно. Валамон, талы дыр кулэ луоз. Но ӵапак та учырын, малпасько, Россилы пумит санкциос туж инаӟ асьме вуз поттӥсьёслы луонлык усьтӥське азинскыны, таин валче экономикамес пыд вылаз султытыны. Мон малпамъя, асьмелы нокыӵе шуг-секытъёс кышкыт ӧвӧл, тазьы ик огъя, дэмен луыны быгатӥмы ке. Тазэ но пусйыны кулэ: власть азьын сылӥсь валтӥсь ужпум — калыклэсь кунлы осконзэ утён. Адямиос оско ке кунлы, озьыен, ваньмыз ӟеч радъяськоз. Со сяна, Правительство та дырлы йылозяз-пумозяз вуттӥз ни кризисысь потонъя планзэ. Отын одӥг удыслы но саклык висъятэк кельтэмын ӧвӧл.

3-17-15

В. Путин журналистъёслэн юанъёссылы валэктон сётъя.

* * *
Трос юанъёс герӟаськемын вал Украинаен. Калык тунсыкъяське: малы та кунлы капчиятэм дунын чагыр эстӥськон, эгыр висъяськомы, нош президентсы уг ик малпа со азьын пуктэм куронъёсты быдэстыны но вир кисьтонлы пум поныны? Нош Ростов улосысь Гуково городысь беженецъёсты интыянъя юртын тыршисьёс меӵак юазы: кунъёсмы куспын, иське, война пуромоз? Таӵе малпанъёс, зэмзэ вераса, паськыт вӧлмемын. Президент чутрак шуиз уз!

— Тодӥсько Гуково сылэ Украинаен кунгож вылын, бомбаос но вылаз огпол гинэ ӧз усьылэ, но со уг вера, кунъёсмы куспын война ӝутскоз шуыса. Нош Киевысь власть пумысен ке, со ас киыныз ӵогыса куштэ бадӟым пайда сётыны быгатӥсь люкетсэс — Донбассэз. Мар ватонэӟ со али зэмос блокадаын. Киев пумит калыклы уждун, пенсия тырыны. Но мон понна нырысетӥ интыын огшоры калык: малпасько, номыр уродэз ӧвӧл чагыр эстӥськонэз дунтэматэм дунын келян бордын. Огшоры калык сярысь сюлмаськыса ик, Украина шуг-секытъёссэ мед вормоз кадь потэ.

* * *
В. Путинлы юанъёсынызы вазиськизы Быдӟым ожысь ветеранъёс но. Сталинград оже 19 аресказ пыриськем ветеран Виталий Колесов вераз мон тушмонэз жугыку — бер ке но — усьтӥськиз кыкетӥ фронт, вуизы союзникъёс. Нош туннэ нуналлы вань-а Россилэн фашизмен нюръяськыны эшъёсыз? Владимир Путин тодаз вайиз Александр III эксэйлэсь кылъёссэ: «Россилэн кык союзникъёсыз — армия но флот». Ватсаз на: дуннеысь троссэ кунъёсты кышкатэ Россилэн бадӟым кужмо луэмез. Терроризмен, ксенофобиен, йыружъёсын нюръяськон понна асьмелэн союзникъёсмы ичи ӧвӧл, кылсярысь, БРИКС-э, ШОС-э пырись кунъёс.

Быдӟым ожысь мукетыз ветеран Василий Ерохин тунсыкъяськиз ветеранъёслы улон интыен юрттон сярысь. Та дырлы улон сэреген юрттэмын ни 281 сюрс ветеранлы, та понна бюджетысь висъямын 308 миллиард манет. Матысь дыре инты я коньдон висъяськоз эшшо 10 сюрсэзлы, бӧрысь — эшшо 5 сюрсэзлы, шуиз Президент.

Чузъяськиз пенсиос пумысен юан но туж ӵем вошъяське пенсиез тырон система — умой-а со?

— Мон ӧй шуысал, та удысын воштӥськонъёс ӵем ортчо шуыса, — вераз В. Путин. — Мукет удысъёс сямен ик, таиз но тупатӥське улонлэн куронъёсызъя. Басьтом тани адямилэсь улон даурзэ, туннэ нуналлы со кузёмиз ни 71 но ӝыны аресозь. Та герӟаськемын тазалыкез утёнлэн ӝутскеменыз, курытэныз кушласькисьёслэн, кыскисьёслэн кулэсмеменызы. Таин валче ужась, доход поттӥсь адямиослэн лыдзы кулэсме, нош пенсие потон вакытазы вуэмъёс йыло. Кунлэн бюджетэзлы, валамон, та ныпъет секыт но секыт луэ. Но соглаш-а мон пенсие потон арлыдэз будэтыны? Меӵак шуиськӧ мон пумит. Но туала егитъёслы пыӵатыны кулэ валан: куке-соку таӵе решение кутоно луоз. Но эшшо огпол вераськӧ та ужпум эскериськыны кулэ шара но дэмен.

Владимир Путинэн меӵак эфирын кенешон мынӥз 4 часлэсь ятыр. Котьку сямен ик, Президентэн вераськон ӟечезлы осконэз юнматӥз.

Елена Никитина

Туспуктэмъёс: Азьмуртлэн пресс-центрез

Удмурт Дунне
By Удмурт Дунне 20 апреля, 2015 11:37