Кӧня сылозы каникулъёс?

Удмурт Дунне
By Удмурт Дунне Апрель 10, 2015 11:48
036032,дети,лагерь,отдых,Дмитров

Город сьӧрысь лагерьёсын шутэтскон дунъёс кылем арын мында ик кылемын: шоро-куспо дун — 12 сюрс 180 манет.

Нылпиослэсь гужем каникулъёссэс ортчытонлы Москва туэ коньдон уз висъя. Но со шоры учкытэк, город сьӧрысь вань нылпи лагерьёс усьтӥськыны кулэ. Та сярысь ивортӥз Иж город администрацилэн йырызлэн социальной ужпумъёсъя воштӥсез Ирина Теслева.

Шоркарысь нылпиослэсь гужем шутэтсконзэс радъянлы оглом 81 миллион 209 манет висъяны чакламын, со пӧлысь 37 миллионэз — элькун бюджетысь, кылемзэ шедьтоз город. Ирина Теслева верамъя, азьло аръёсын ӵошатыса, коньдон кулэстэмын ӧвӧл. Озьы ог 79 процентэз нылпиос пӧртэм интыосын шутэтскыны быгатозы. Одӥгъёсыз, кылсярысь, мынозы город сьӧрысь лагерьёсы, мукетъёсыз — школа бордысь лагерьёсы, эшшо ужалозы санаторийёс, усьтӥськозы профильёсъя лагерьёс. Котькуд школаын, ӝыт 16 часысен кутскыса, ужалозы спортзалъёс, отын пӧртэм ужрадъёс ортчылозы.

— Сирота нылпиослы, школа-интернатъёсын будӥсьёслы озьы ик нимысьтыз сменаос усьтӥськозы, — пусйиз город администрациысь кивалтӥсь. — Талы 2 миллион манетлэсь ятыр чакламын. 10-тӥ классъёсысь 488 кузя пиос Пероггуртын сборъёсы пыриськозы.

Город сьӧрысь лагерьёсын шутэтскон дунъёс кылем арын мында ик кылемын: шоро-куспо дун — 12 сюрс 180 манет. Кылем арын сямен ик, анай-атайёслы 50 но 80 процентэз берыктӥськоз. Зэм, сое басьтыны быгатозы, пе, ог 10 сюрсэз, нош лагере куриськон гожтӥз 14 сюрс мурт — заявлениосты 1-тӥ мартысен кутэмысь дугдӥзы.
80 процент компенсация, 9 сюрс 744 манет, висъяськоз трос нылпиё яке оген семьяосысь пиналъёслы, бюджетникъёслэн нылпиоссылы, семьялэн доходэз улыны чаклам минимумлэсь ичигес ке, ожысь ветеранъёслэн, 1-тӥ но 2-тӥ группаен инвалид анай-атайёслэн нылпиоссылы но беженецъёслэн пиналъёссылы, беженец луэмзы сярысь документъёссы вань ке.

— Кылем арын сярысь, таиз список вакчигес, — вераз Ирина Теслева. — Но со понна тросэзгес басьтыны быгатозы 50 процент компенсация, таизлэн быдӟалаез — 6 сюрс 90 манет.

Школа бордысь лагерьын 21 нунал ӵоже шутэтскон кылем арын анай-атайёслы 650 манет усиз вал. Луоз-а та дунэз туэ но кельтыны — али город администрациын вераны уг быгато на. Угось со понна нуналлы быдэ 1 пиналэз 2 пол сюдон 100 манет луыны кулэ. Нош сиён-юонлы дунъёс будэмын.

15-18 аресъемъёс пӧлысь тросэз гужемлы уж утчаны кутско. Та ужпумез но город администрация чакласа возе, одӥг мылкыдын ужа Егитъёсты уже интыянъя биржаен. Али таос вазиськизы городысь предприятиослы но организациослы, нылпиосты доразы гужемлы уже кутон мылкыдзэс юаса.

— Быдэ вуымтэосты уже интыянъя куронъёс чурытэсь, — пусйиз Ирина Теслева. — Соосты, кылсярысь, быдэс нунал ужатыны уг яра, ужзы секыт ӝутканэн герӟаськемын медаз луы но мукет. Уж сётӥсьёс уждун тырыны кулэ МРОТ-я, эшшо 1 сюрс 680 манет ватсаськоз уже интыянъя служба пыр.

Валамон, ужаны вань мылкыд карись нылпиослы инты, оло, уз но шедьы. Нырысь ик кутозы секыт югдуре шедем семьяосысь пиналъёсты.

Элина Кумачёва

Туспуктӥз Александр Горбунов

Удмурт Дунне
By Удмурт Дунне Апрель 10, 2015 11:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<