Ижкарлы тырме 255 ар

Шоркар дасяське 255 ар тырмон юбилейзэ пусъёнлы. Тросэз ужрадъёс чакламын 12-тӥ июньлы — Городлэсь нуналзэ пусъён дырлы.

Зэм, Ижез кылдытон нуналэн лыдъяськом 1760-тӥ арын 10-тӥ апрелез. Кутсконэз тазьы вал: 1757-тӥ арын 15-тӥ сентябре Елизавета Петровна эксэй кышно Пётр Шувалов графлы луонлык сётэ корт ӵыжатонъя 3 завод пуктыны. Соослы инты утчан оскемын вал гурезь ужъёсъя ӟеч специалистлы А. Москвинлы, со ик шуиз: Иж шур кузя нюлэсъёс будо, соослэн кузёоссы ӧвӧл. 1760-тӥ арын лэсьтӥськон кутскиз: Иж завод борды ик Иж посёлок кылдытэмын вал, 1763-тӥ арын Иж шур вамен ӵыпет лэсьтэмын, та аре ик завод нырысетӥ вуззэ поттӥз.

Иж городлэн йырыз Александр Ушаков, журналистъёсын пумиськылыкуз, пусйиз:

— 255 ар тырмонэз одно пусъём — шоркармы понна та яркыт лыдпус. Ужрадъёс ар ӵоже кыстӥськозы, но бадӟым люкетсэ июньлы кельтом. Соку куазь чебер, калыклы юмшаны тупа.

Юбилеез пусъёнлы дасяськон али чырмыт мынэ. Ӧтемын ни куд-ог куноос но. Кылсярысь, 12-тӥ июне Шор площадьын концерт сётоз туж тодмо «Хор Турецкого» коллектив.

10-тӥ апрель но «кӧс» уз ортчы. Туннэ нуназе бере шоркарлэн музеяз «Милям Ижевскмы» симпозиум ортчоз. Отчы ӧтемын вань мылкыд карисьёс, соос пӧлын — историк, шаерчи, Ижысь Архитекторъёслэн огазеяськонзылэн ёзчиез Евгений Шумилов, Удмурт Республикаысь дано архитектор Ирина Казаринова, историк, «Иднакар: методы историко-культурной реконструкции» журнал поттӥсь Алексей Коробейников но мукетъёсыз.

Музейчиос оскыто: вань мылкыд карисьёслы кыл сётозы, ваньзэс кылозы. Малпанъёсты огазеяса, быръемын луозы: Ижевскысь 10 нимъёс, Ижен герӟаськем 10 учыръёс-ужрадъёс, историлы тужгес дуно 10 юртъёс, Ижлэсь данзэ ӝутон понна тужгес тунсыко 10 проектъёс.

Элина Васильева

Туспуктэм: Александр Горбунов