«Быдӟым Вормонлы сӥзисько» концерт сярысь

Удмурт Дунне
By Удмурт Дунне Апрель 10, 2015 12:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

концертБыдӟым Вормонлы сӥзьыса, «Мынам Удмуртие» телерадиокомпания кӧня ке толэзь талэсь азьло Атыкай музъеммес данъясь кырӟанъёслы конкурс ялӥз.

— Вазен 9-тӥ мае эфирын кыӵе кырӟан ик пуктыны паймиськом вал, — шуэ анай кылын программаосъя редактор Сергей Касаткин. — Угось войналы, Вормонлы сӥзем кырӟанъёс асьмелэн ӧй вал, шуыны луоз. «Мар война та?» но «Тыловай топольёс» гинэ. Соин ик сыӵе малпан кылдӥз. Вылаз ик, кырӟан кылдытонъя конкурс радъяммы вань ни — берло аръёсы кылзӥсьёсмы мыло-кыдо пырисько «Элькуновидение» конкурсэ — озьы арлы быдэ кӧня ке выль кырӟан вордӥське, калыке вӧлме.

Выль конкурсэ вуиз 35 кырӟан! Радиоын ужасьёс асьсэос паймизы: сомында вуоз шуыса, ӧм малпалэ, пе, вал. Шӧдӥськиз калыкмылэн вордӥськем музъеммес, Вормонэз гажамез. Луыны быгатысал тросгес, но эфире сюрон понна кулэ ӟеч кырӟан — чылкыт фонограммаен, записен. Финалэ кылиз 22-ез. Ӵапак таосыз 5-тӥ апреле Удмурт театрын ортчем бадӟым концертэ пыриськизы.

Зал тыр учкисьёс: арлыдоос но егитъёс. Ӝытэз нуисьёс тодмато выль кыр-ӟанъёслэн авторъёсынызы, быдэстӥсьёсын. Пӧлазы вань профессионалъёс но, самодеятельнойёсыз но. Тросэз — гуртоос.

Концертэз усьтэ «Шулдыр ӝыт» ансамбль «Тонэн данъяське шаере» кырӟанэн. Крезьгурзэ гожтӥз Евгения Копысова, кылъёссэ — Любовь Тихонова. Соку ик шӧдӥське усточиослэн ужамзы. Ансамблез воштэ Ярысь Раиса Князева, собере — Эгралась Денис Чирков. Таиз кырӟась ӵем берга эфирын, егитъёслы со кельше аспӧртэм дартэныз — кырӟанъёсыз огдыре мӧзмытэсь кадь, но соос бугыръяськись мылкыдэн пыӵамын. Зэм, ачиз сяна кырӟанзэ быдэсъясь уз шедьы, дыр — текстэзлэн кылъёсыз кылчиослы но валантэм. Нялтас вераса, та рад пычкыса гожтэм текстъёс, «Элькуновидениен» ӵошатыса, ичигес вал, тросэз басьтӥллям классикъёсты: Николай Байтеряковез, Гай Сабитовез, Фёдор Суворовез, Алексей Ельцовез. Малпасько, туж шонер лэсьтӥзы, угось «удмурт кылысь удмурт кылэ» берыктыны вырыса, сюлэм пазяськыны ӧдъя.
Тросэз кырӟанъёс сӥзе-мын ветеранъёслы, бырем солдатъёслы, палкышноослы. Война ноку медаз луы ни, нош ортчемзэ котьку тодын возёно — озьы вераны луоз авторъёслэсь мылкыдзэс.

Чузъяськизы пӧртэм жанръем кырӟанъёс: калык кыр-ӟанлы матын лирика, рэп но бард…
22 кырӟан быдэстэмын вал ӝыт ӵоже. Жюри (Удмурт Элькунысь искусство удысысь дано ужась, Удмурт кун филармониысь чеберлыкъя кивалтӥсь Валерий Митрофанов, крезьгурчиос Александр Корепанов но Марина Ходырева) пусйизы пӧлысьтызы 4 устозэ. Нырысетӥ инты — нырысетӥ кырӟанлы: Евгения Копысова, Любовь Тихонова «Тонэн данъяське шаере»; кыкетӥ луизы кык кырӟасьёс: Глаз ёросысь Валерий Главатских, Алевтина Главатских «Шудо улон понна кулэ ӧвӧл война!» но Эграысь Елизавета Лекомцева «Кузьмады улон», куинетӥ — Глаз ёросысь Александр Леонтьев — «Вормон нунал» кырӟанэн но Алнашысь Сергей Кириллов — В. Ивашкинлэн кылъёсызъя «Вормон нуналэн».

Валерий Главатскихлы синмаськемзэс веразы на учкисьёс но.

Зэм, тросэзлэн учкисьёслэн мылкыдзы сураськемын вал дунъясьёсын соглаш луымтэенызы валче. Валамон, котькудӥзлэн потэ вал, соослэн кырӟасьсы мед вормоз шуыса, но призэз ваньмызлы уд люкы.

Профессионалъёслэн асьсэлэн адӟонзы. Кызьы шуиз Валерий Митрофанов, кӧня ке тырмымтэосты пусйыса, крезьгурчиос палэнскизы удмурт интонациослэсь — асьме кырӟанэз тодманы мед луоз нырысетӥ аккордъёсысеныз ик. Со сяна, кырӟасез ӵемысь «быдтэ» урод фонограмма, куддыр со интые, эсьма, улэпкын кырӟаса умойгес. Марина Ходырева синмаське лякыт, огшоры, кесяськытэк кырӟасьёслы, шыпыт фонограммалы. Елизавета Лекомцевалэн со умой дасямын, пе, кырӟанзэ уг согы, вылӥе ӝутэ. Бырйыны туж шуг вал, шуэ со, малы ке шуоно ӧй вал чакламын нимысьтыз номинациос но куронъёс (критерийёс).

Но «Мынам Удмуртие» радио визьмогес амал шедьтӥз — соос эфире лэзьяны сӥзизы ваньзэ та кырӟанъёсты, угось конкурс конкурсэн, но зэмзэ но усто кырӟанэз, кӧня ке дыр ортчыса, быръёз кылзӥсь — калыклэн куремезъя гинэ валаны луэ, кудӥз кырӟан сюлэм борды лякиське, кудӥз ыше.

Оглом удмурт радиоысь журналистъёс туж бадӟым но дано уж лэсьтӥзы — соос асьсэ кужымен быдэстӥзы кӧ-ня ке министерствоослэсь, творческой союзъёслэсь ужзэс — узырмытӥзы удмурт кырӟанъёсын фондмес. Нош соос калыке ӝоггес мед вӧл-мозы шуыса, ми дась юрттыны — матысь дыре Вормонлы сӥзем выль кырӟанъёс печатласькозы «Удмурт дунне» газетын.

Зинаида Рябинина

Туспуктэм: «Мынам Удмуртие» ТРК

Удмурт Дунне
By Удмурт Дунне Апрель 10, 2015 12:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<