Хозяйствоос азе пуктэм куронъёс йыло

Удмурт Дунне
By Удмурт Дунне Апрель 16, 2015 08:43
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаерамы туннэ лыдъяське 317 гурт хозяйство. Со сяна, вань на 651 фермер хозяйство. Фермаын, бусыын ог 30 сюрс адями ужа. Мае возьмано соослы государстволэсь туннэ, кыӵе осконъёсын мыто кизёнэз — Дэриын бадӟым кенешын вераз гурт удысъя но сиён-юонъя министр Сергей Токарев.

Бадӟым саклык — выльдӥськонлы

Миым асьмеды асьмеос сюдыны вормимы вал. Бусыос понна сюлмаськон кылдылӥз ик: 21,7 сюрс гектар музъем пашмиз уго. Котьма ке но ю тысь гинэ но, 2013-тӥ арен ӵошатыса, 2 поллы уногес утялтэмын но 610 сюрс тонна люкамын вал. Гектарысьтыз шорлыдын 17 центнер урожай потӥз. Вавож ёросын воксё но 30 центнерлэсь уно люкаськиз. Таӵеез одӥг ёросын но улытозямы ӧй вал на.

Туэ но ваньмыз капчиен мед ортчоз шуыса, федерал бюджетысь гурт удыслы 300 миллион манет тыр субсидия висъямын ни, республикамылэн кисыысьтыз — 456 миллион манет. Сергей Токарев верамъя, эшшо 616 миллион манет вуыны кулэ 30-тӥ апрелёзь. Таиз коньдон чакламын ӟеч выжыысь пудо басьтыны, техникаез выльдыны, ӟеч кидыс будэтонэн вырись хозяйствоослы юрттыны но кредитъёсъя процентной ставкаез берыктыны.

Тол улэ кизем юос али 83 сюрс гектар. Та, кылем арын сярысь, 18 сюрс гектарлы ичигес. Таин валче гуртоос азе ужпум пуктэмын: тулыс кизёно 505 сюрс гектар музъемез. Кидысмы тырмыт. Элитхозъёсын но семхозъёсын вузан вылысь дасямын 200 сюрс тонна кидыс. Тужгес ӟеч кидыс дасямын Дэри, Вавож но Алнаш ёросъёсын — ӟечлыкез 90 процентлэсь ортче. Нош Яр, Каракулино но Камбарка ёросъёсын 50 процентозь но ӝутӥськемын ӧвӧл. Ваньмыз-ӧвӧлэз гыроно-кизёно музъем 1 миллион 50 сюрс гектар луыны кулэ.
Бусые потыны кулэ 6 сюрс 127 трактор. Туннэ 84 процентэз дась ни. Хозяйствоосын басьтэмын ни 2 сюрс 706 тонна эстӥськон, кулэезлэсь со 35 процент.

— Гурт удыс азинтӥськыны мед быгатоз шуыса, туннэ дасямын 113 инвестпроект. Туэ соос пӧлысь 11-ез улонэ пыӵалоз. Со проектъёс чотын туала гидъёс, тысь куасьтон но шертон комплексъёс, бакча возён гуос ӝутыны луоз, — шуэ Сергей Токарев. — Туннэ гуртоос азьын урожай басьтон, йӧл кыскон ужпум гинэ уг сылы — поттэм продукциез утён но вузан сярысь зол сюлмаськоно. Калык дорозь ӟеч сиён-юон вуттоно.

Туэ тулыс кизёно луоз 505 сюрс гектаре.

Туэ тулыс кизёно луоз 505 сюрс гектаре.

Йӧл дунэз возёно!

Предприятиос туннэ мылысь-кыдысь выльдӥсько. Чебер но умой упаковкаос лэсьто, асьме вузмы рынокын интызэ мед шедьтоз шуыса. Кылем арын сӥлен вырись комбинатъёс дышизы сырокопчёной колбаса лэсьтыны. Йӧлэн вырисьёс кутскизы моцарелла сыр поттыны — таиз Россие кунгож сьӧрысь гинэ вуэ вал, шуэ министр. Но туннэ йӧл дун усьыны кутскемын: 22 манетысь со 21-20 манетэ вуиз ни. Хозяйствоос понна со бадӟым ыштон. Валамон ни: гуртоосты та юн шукке.

Дэри ёросысь культурая юртэ кылем арня пумын зал тыр люкаськизы хозяйствоосын кивалтӥсьёс. Куашкам мылкыдъёссэс вератэк, соос ӧз чидалэ. Югдурез валэктоно кариськиз «Комос-групп» огазеяськонлэн вице-президентэз Анатолий Максимов:

— Вӧй, кӧс йӧл, сыр поттон понна туж трос йӧл кошке. Соин ик йӧл дун вылӥын возиськиз вал. Асьме дорын лэсьтэм сиён-юонэз Россиын но мылысь-кыдысь басьтылӥзы. Но белорусъёс, Россиын вуззы ичи вузаськемен, дунъёсты шуак лэзизы. Эшшо ке Уругвайысь но Аргентинаысь дунтэм сыр магазинъёсы вуиз. Таин валче вожвылъяськыны ӧм быгатэ ни, вузмес басьтӥсь кулэсмиз. Соин ик туннэ йӧл трос луиз. Азьвыл 300 сюрс тонна йӧлмес келяськомы вал артысь улосъёсы, но соослэн но кӧтсы тыриз — басьтэмысь дугдӥзы.

Башкортостанысь но Татарстанысь хозяйствоос али милемлы дась 16-17 манетэн 1 килограмм йӧлзэс вузаны. Но ми соослы ӧсъёсмес ӧм усьтэ на, асьмеос коже ог-огмылы азинтӥськыны мед юрттомы шуыса. Правительствое но люкаськылӥмы ни йӧл дунэз возён ужпумъя. Зэм, матысь дыре дунъёс эшшо усьыны быгатозы на. Гужем оскон вань ӝутӥськонлы. Гужем уго кутскоз кема утиськись сиёнэз дасян. Кылсярысь, вӧез 3 толэзь возьыны луэ.

— Кылем арынлэсь йӧл понна дун ичигес медаз луы, — вазиз Сергей Токарев.

Но малы кылем арен ӵошатӥськонэз? Эстӥсь-конлы, удобренилы — ваньмызлы дунъёс туж ӝутӥсько. Соин ик Токаревлэн кылем арен ӵошатӥськемез хозяйствоосын кивалтӥсьёслы воксё ӧз кельшы.

— Ярам, али ми пудомес сюдӥськомы кылем арын дасям сиёнэн. Но туэ со быроз, туэ дасяно мукет сиён. Бензин дун тэтчемын, запчастьлы дунъёс куртчылӥсько. Йӧллэн асдуныз туэ сотэк будэмын ни. Кызьы кылем ар шоры учкылод? — микрофон азе султытэк, ӧз чида Ува ёросысь «Авангард» хозяйствоен кивалтӥсь удмурт воргорон Фарит Халитов. — Умой урожай басьтыны гинэ 40 миллион манет коньдонмес поныны кулэ ми. Йӧл дун ӧз буды ке, кисьтэм уксёмес кызьы берыктомы? Со сяна, уждун тыроно на.

Халитовлэсь верамзэ зал кичабонъёсын пумитаз. Но югдур йӧл дун бордын гинэ ӧвӧл. 1-тӥ апрельысен гурт техникае тахограф прибор пуктылыны косэмын. Сюрес вылын кышкытлыклэсь утиськон вылысь малпамын со. Машиналэсь ӝоглыксэ, сюрессэ, кӧня ужамзэ гожтэ. Прибор пуктымтэ ке, водитель кулэезлэсь кемагес ужа ке, штраф тыроно луоз.

— Милям хозяйствоямы куронъёс улэ сюро молоковоз но КамАЗ, — веранзэ азьланьтэ Ф. Халитов. — Таослы одно ик тахограф пуктоно, шуэмын. Но гурт удысын ужасьёслы малы со кулэ? Сое басьтон но пуктон гинэ 50 сюрс манет сылэ ук. Собере, гужем бусы ужъёс дыръя бадӟым машинаос нуналлы быдэ вазь ӵукнаысен бер ӝытозь ужало. Соос вань куронъёсты тӥялозы ук. Штраф тырыса ик, жуммод.

Сергей Токарев верамъя, та ужпумъя вазиськемын ни Россиысь гурт удысъя министрлы но Правительстволэн Тӧроезлы. Та юанэз сэрттытэк кельтыны уг яра, шуиз гуртоосын пумиськонэ лыктэм Удмуртилэн Тӧроез Александр Соловьёв но. Дунъёслэсь ӝутӥськемзэс ялан син азьын возьыны куриз.

Елена Сараматова

Туспуктӥз Александр Горбунов

Удмурт Дунне
By Удмурт Дунне Апрель 16, 2015 08:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<