Лэчыт юанъёсты люкан

Удмурт Дунне
By Удмурт Дунне 7 апреля, 2015 10:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
OLYMPUS DIGITAL CAMERA

1 литрез 22 манетозь ӝутӥськылӥз ни вал, али сое 20 манетэн басьто.

Малы йӧл дунэз кулэстоно ӧвӧл?

Кылем арня пумын Правительствоын котырес ӝӧк сьӧры люкаськылӥзы гурт удыс понна сюлмаськисьёс. Удмуртиысь Общественной палата юан ӝутӥз: хозяйствоослы азинскыны юрттон вылысь мар кароно?

Гурт удысъя но сиён-юонъя министр Сергей Токарев верамъя, туннэ, кылем арын сярысь, нуналлы быдэ 900 граммлы уногес йӧл кыскиськомы. Но шумпотон палдурес: йӧллы дун пумен усе. 1 литрез 22 манетозь ӝутӥськылӥз ни вал, али сое 20 манетэн басьто. Эшшо ке сыр дун но усемын. Асьме дорын поттэм сыр Россиысь рынокын конкуренциез уг вормы, шуэ Сергей Токарев.

Палэнысен учкыса, йӧл дунлэн 1-2 манетлы усемез трос ик ӧвӧл кадь. Но лыдъяны кутскиськод ке, хозяйствоос понна шӧдскымон ыштон луэ.

— Колхозамы кысконо скалъёсмы 420 йыр сяна ӧвӧл, — шуэ Пичи Пурга ёросысь «Югдон» хозяйствоен кивалтӥсь Надежда Баранова. — Малпаськом вал, барыш поттон понна сомындаез но тырмыт. Но йӧл дун 1 манетлы усиз но, йыр борды кырмиським. 200 сюрс манетлы ӧжытгес коньдон басьтыны кутским уго. Тулыс бусы ужъёс азьын та туж бадӟым шуккет. Вылаз ик, субсидиосты но дыраз уг тыро, одно ик кельто тулыслы. Нош тулысозь ваньмызлы дун будэ ук: эстӥськон но, удобрение но, воштос ёзъёс но. Кызьы выльдӥськод — ӧйтӧд. Чыры-пыры техникамес асьме кужымен тупатъялом ай, нош выль кужмо трактор басьтыны номырин.

Субсидиос ӝегаса вуэмлы ӝожтӥськисьёс шаерамы лачак. Соин ик Сергей Токаревлы вазиськемын, югдурысь потыны амал утчаны, йӧл дунъёсты кутыны курыса, шуэ Общественной палаталэн экономикаез азинтонъя но ужбергатонъя комиссиезлэн кивалтӥсез Павел Вершинин.

Гурт удысын мукетъёсыз но лэчыт ужпумъёс шугъяськыто. Хозяйствоослэн пунэмъёссы ванен банкъёс кредит сётъямысь дугдӥзы. Тужгес бадӟым пунэме пырем эштосъёс но вань ни, таосты банкъёс банкрот карыны туртто. Туннэ дэмен тыршоно кызьы ке со хозяйствоосты возьыны.

Берло дасо арзэ одӥг хозяйствоын но музъемъёссы рос-прос эскеремын ӧвӧл. Соин вырыны кулэ «Удмуртский» агрохимцентр. Но та огазеяськонлэсь хозяйствоос палэнтӥ ветло. Солы вазиськизы Кизнерысь «Новый путь», Якшур-Бӧдьяысь «Исток», Уваысь «Дружба» гинэ. Бусыоссэс удобрениен умоятон сярысь сюлмаськисьёс но быро ни. Кизёнэз чаклан, бусыысь бусые культураосты тупамзыя вошъян сярысь веранэз ик ӧвӧл ни. Азьланяз но тазьы ужамы ке, муосты умоятон сярысь ӧм сюлмаське ке, бусыос воксё лябӟозы, отын номыр рос-прос уз буды ни, шуиз Павел Вершинин. Вань люкаськемъёс солэсь мылкыдзэ умоен лыдъязы. Санэ басьтом, шуиз С. Токарев. Зэм, агрохимцентрлэн туннэ бусые потыны техникаез но, кадръёсыз но уг тырмо.

— Лэчыт юанъёсты люкаса возёно ӧвӧл, — шуиз П. Вершинин. — Ужпум кылдэ ке, со сярысь верано. Ялан эскеронъёс ортчытъяно. Югдурысь потыны амал дэмен утчаломы.

Елена Сараматова

Туспуктӥз Александр Горбунов

Удмурт Дунне
By Удмурт Дунне 7 апреля, 2015 10:13