Ӟамбайгуртын усьтӥськиз гуртоослы сӥзем музей.

Удмурт Дунне
By Удмурт Дунне 6 апреля, 2015 12:32
Мичурин нимо колхозлэн азьвыл но туала кивалтӥсьёсыз В. Калинин но В. Капеев.

Мичурин нимо колхозлэн азьвыл но туала кивалтӥсьёсыз В. Калинин но В. Капеев.

Кызьы будэтоно зэмос патриотъёсты?

Вавож ёросысь Мичурин нимо колхоз нош ик быдэс республикамылы адӟем карымон луиз — Ӟамбайгуртын усьтӥськиз гуртоослы сӥзем музей. Солы В. Калининлэсь нимзэ сётӥзы.

Та нуналъёсы музей сӥё-дано усьтэмын, соин валче Ӟамбайгуртэ уно куноос вуылӥзы. Пӧлазы — Правительстволэн Тӧроезлэн воштӥсез, гурт удысъя но сиён-юонъя министр Сергей Токарев, Вавож ёрослэн йырыз Татьяна Иноземцева но трос мукет кивалтӥсьёс. Дано куноос пӧлын вал гурт калык но. Пичиез но, мӧйыэз но люкаськизы гуртысь клубе — пуксьыны интыез ӧй вал. Нырысетӥ радын — ачиз Валентин Калинин. 42 ар кивалтӥз со хозяйствоен, ӵапак солэн ужез валаса радъямез бордысен кутскиз Ӟамбайгуртлэн ӝужамез. Но Валентин Егорович чик уг вала кадь данъяськонэз. Со выльысь но выльысь тодаз вае ужаны кутскон вакытъёссэ, тау каре бордаз ужам специалистъёслы:

— Ужаны кутскыкум ай, колхозамы 80 йыр скалмы, 280 парсьмы лыдъяськиз. Техникаен туж секыт луылӥз…
Но туннэ со кылемын историе, табере Мичурин нимо колхоз — элькунысьтымы тужгес кужмоез: пудо вордонын но нянь будэтонын со арысь аре вормисьёс радын.

— Мон котьку ӟеч мылкыдын вуисько дорады, шумпотӥсько быгатэмдылы, — шуиз Правительстволэн Тӧроезлэн воштӥсез С. Токарев. — Удмуртилэн дано кунмуртъёсыз пӧлысь кыкез гинэ гуртысь луо, огез — В. Калинин. Валентин Егорович аслыз оскымон кивоштӥсьёс будэтыны быгатӥз. Озьы хозяйстволэн туалаез кивалтӥсез Владимир Капеев биньгозыез кияз йӧн-йӧн кутӥз. Уг ваты: кык пол солы ӵектылӥ выль уж: одӥг полаз Асанысь совхоз-техникумен кивалтыны, кыкетӥ полаз — гурт удысъя но сиён-юонъя министрлэн воштӥсез луыны. Соглаш ӧз кариськы, гурт калык монэ уз вала, шуиз. Табере, зэмзэ но, адӟисько: В. Капеевлэн интыез татын.
Ӟамбайгуртъёс туннэ возьмато ужаны но улыны быгатэмзэс. Соос ӵош шутэтско, вормонъёссылы шумпото. Валало: толлоезтэк ӧй луысал туннэез.

— Гуртамы алигес гинэ выль школа-сад усьтӥськемен, нылпи садмы буш кылиз, — вераз гурт администрациен кивалтӥсь Сергей Александров. — Пӧртэм малпанъёс вал, мар кароно бушам юртэн. Но колхоз предмы Владимир Капеев отчы гуртмылэсь историзэ кельтыны ӵектӥз. Музеез кылдытыны но солэсь ужзэ радъяны колхоз ог ӝыны ар куспын быгатӥз.

Музей клублэсь кӧнялы ке палэнынгес интыяськемын. Но чебер концерт, тау карон кылъёс верам бере нокин ӧз дырты дор палаз вамыштыны. Сомында калык кожиз музее! Сомында калык тэриз отчы! Вӧл-вӧл, югыт, чебер! Узыр!

— Татчы Ӟамбайгуртэны-мы герӟаськем вань материалъёсты люканы вырим, — шуиз музейлэн кивалтӥсез Нина Капеева. — Гуртоос умой юрттӥськизы, дорысьтызы вуж арбериоссэс мыло-кыдо ӵектӥзы, тодэ ваёнъёссэс веразы.

Юрттӥськисьёс кунгож сьӧрын но шедиллям. Ӟамбайын вордскем но та вакытэ Германиын улӥсь Виктор Березин, пе, туж бадӟым кузьым лэсь-тӥз — 1716-тӥ арын гуртын улӥсьёслэсь списоксэс сётӥз. Соосты Москваысь, Санкт-Петербургысь архивъёсын бугыръяськонъяз синйылтэм. Списокын калык азбарен-семьяен пусъемын. Оглом 19 азбарын 84 мурт лыдъяськем: 44 воргорон, 50 нылкышно.

— Ми понна туж дуно гуртысьтымы оже пыриськемъёслэн наградной листъёссы но, — пусйиз Нина Николаевна. — Ваньмыз 135 мурт кошкиз войнае, берытскиз 31-ез гинэ.

Музей усьтӥськемен, Ӟам-байгурт уката но узыр луиз кадь. Таӵе интыын одно будыны кулэ Атыкай музъеммес гажась, дунъясь, сое уката йӧногес карыны тыршись кивоштӥсьёс!

Элина Кумачёва

Удмурт Дунне
By Удмурт Дунне 6 апреля, 2015 12:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<