Вордскизы Вормонэн одӥг нуналэ

Удмурт Дунне
By Удмурт Дунне 6 апреля, 2015 12:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Геннадий Парфёнов,

Кияса ёрос

Атаймылы Василий Парфёновлы но солэн ӵужмуртэзлы Иван Гурьевлы оже повестка уж дуразы ик вайиллям. Соос соку Кекоран палан чугун сюрес лэсьтонын ужаллям. Оже но ӵош ик кошкиллям.

Мар вал ожын — атаймы со сярысь чик уг вера вал. Капчиям дыръяз гинэ Ёрги ӵужодӥген куспазы ма но со вераськылӥзы. Ожын атаймы наводчик-артиллерист вылэм, сержант. Ортчем Прибалтикаез, отысен Восточной Пруссие, Кёнигсберг (али Калининград) пала вуэм. Огаз ожын зол сӧсырмем. Но анаезлы со сярысь гожтымтэ, бӧрысь ивор сётӥз ик. Уго ар талэзь азьвыл атаезлы похоронка вуэм вылэм. Али но йылзэ-пумзэ ум шедьтӥське, кытын ӵужатаймылэн бырем интыез…

Юн сӧсырмемез бере атаймес Ковровысь 5860 номеро госпитале келяллям. Отын ик со тодӥз, война бырем шуыса. Кыӵе вал со куанон-шумпотон! Огезлы гинэ атае дотово паймем: тумбочка вылаз — тӧдьы кечсин сяськаос. Ма, госпиталь город шорын, татын кечсин но уг буды кадь. «Вордскем нуналэныд но Вормон Нуналэн, сержант Парфёнов!» — медсестраос палатае пыризы. Ма, ку но кытысь тодӥллям, со 9-тӥ мае вордскемын шуыса? Тӥни озьы атаймы (дядяй шуиськом вал сое) 20 арессэ пумитаз Ковров городын, тумбочка вылаз — нырысетӥ тулыс сяськаос.

Война йылпумъяськем бере 52 ар ортчыса, атаймылы сётӥзы Кёнигсберг дорын кышкатэк ожмаськемез понна 3-тӥ степенё Слава орден. Но малы ке но со орденлы дядяймы чик ӧз шумпоты… Ярам коть, улэп дыръяз ордензэ басьтӥз. Тӥни озьы, милям семьямы понна 9-тӥ май — кык полэс праздник.

Паймод, ява, со нуналэ ик вордскем мынам варманае — Выль Казмасысь Глафира Ивановна Савинова. Ож вакытэ гуртаз бригадирын ужам, бӧрысь парниказы кияр, помидор будэтэм, туэ 9-тӥ мае со 92 арессэ пумиталоз! Со нуналэ варманаймылэн но ӝӧк вылаз луозы тӧдьы кечсин сяськаос.

Удмурт Дунне
By Удмурт Дунне 6 апреля, 2015 12:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<