Мар уг тырмы экономикалы?

Кун Кенешысь котрес ӝӧк сьӧрын вераськон мынӥз элькунысьтымы наукаез азинтон сярысь.

Отчы пыриськизы министерствоосысь но ведомствоосысь, вылӥ дышетскон заведениосысь специалистъёс, калык огазеяськонъёслэн ёзчиоссы но мукет.

Наукаез азинтонлы сӥзем вераськон.

Ужрадэ люкаськемъёс 2 часлэсь ятыр кенешизы: кыӵе югдуре шедемын туала наука, малы сое одно азинтоно, мар та понна кароно… Вераськонэз нуиз Кун Кенешысь Наукая, культурая но егитъёсын ужан политикая ялан ужась комиссилэн кивалтӥсез Наталья Сударикова. Со пусйиз: Кун Кенеш дась та ужпумъёсты эскерыны, наукаез азинтонъя нимысьтыз концепция кылдытыны. Со вылэ пыкиськыса ик, 2016-тӥ — 2020-тӥ аръёслы нимысьтыз программа но кылдытыны луоз.

Тунсыко доклад дасям Историяя, кылъя но литературая Удмурт институтлэн директорез Алексей Загребин.

— Жаляса верано, кылем даурысь 90-тӥ аръёсы властьлэн но наукалэн кусыпъёссы лябӟизы, туннэ нуналозь соос нимазгес вамышто, — шуиз со. — Шаерамы югдур уката мӧзмыт. Тросэз улосъёс ог 20 ар талэсь азьло атласъёссэс кылдытӥзы ни, асьмеос али та борды вуиськом. Татарстанлэсь энциклопедизэ дасян бордын ог 100 мурт тырше, асьмелэн — 3 кузя. Ма, Историяя, кылъя но литературая институтын гинэ но 33 ставка сяна ӧвӧл.

Тодосчиос оскыто: наукатэк, вашкала сям-йылолъёсты, культураез тодытэк, элькунамы экономика но уз азинтӥськы.

— Культурая узырлыкмес утён борды ӝегатскытэк басьтӥськоно, — азинтӥз Алексей Загребин. — Али тани, куазь шуныт кариськемен, археологияя раскопкаослэн вакытсы вуэ. Но татчыозь уг тодӥськы, кыӵе коньдонэн соосты ортчытом, угось Россия талы тырмыт уксё висъямысь дугдӥз.

ИжГТУ-ысь инициативаосъя центрысь Михаил Плетнёв верамъя, азьланьын Удмуртия ӵошатскыны быгатоз Россысь, кунгож сьӧрысь вуз поттӥсьёсын. Но со понна нырысь ик наукаез азинтоно. Выль ужан амалъёсты одно кутоно промышленностьын но гурт удысын. Та понна, валамон, элькун кивалтэт палэнтӥськыны кулэ ӧвӧл учёнойёслэсь.

Наукаез азинтонъя концепциез матысь дыре юнматоно. Министерствоос но ведомствоос вераны кулэ на ас ӵектонъёссэс — соосты люкалоз Дышетонъя но наукая министерство.

Элина Кумачёва