Данъяськон

Удмурт Дунне
By Удмурт Дунне Апрель 3, 2015 13:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Выльдэм Операя но балетъя театр усьтӥськиз П. Чайковскийлэн "Лебединое озеро" балетэныз.

Выльдэм Операя но балетъя театр усьтӥськиз П. Чайковскийлэн «Лебединое озеро» балетэныз.

Таяз арняе ӧсъёссэс усьтӥзы Ижысь Операя но балетъя выльдэм театр но Воткинскысь П. Чайковскийлэн тупатъям музей-усадьбаез. Сӥё-дано ужрадъёсы вуылӥзы Удмурт Республикаысь кивалтӥсьёс.

Ижысь Операя но балетъя театрез тупатъян ужъёс кыстӥськизы кык ар пала. Табере театр нуллоз П. Чайковскийлэсь нимзэ. Выльдэм театр усьтӥськиз П. Чайковскийлы сӥзем 58-тӥез крезьгуро фестиваль азьын. Сцена вылын вал премьера — дано крезьгурчимылэн «Лебединое озеро» балетэз. Удмуртилэн Тӧроез Александр Соловьёв шуиз:

— Асьмелэн валтӥсь театрмы быдэсак воштӥськиз. Татын ваньмыз шудэ выль буёлъёсын, шока искусствоен. Татын артистъёслы но ужаны лякыт но тунсыко луоз, учкисьёслы но кельшоз.

«Лебединое озеро» балетлэн премьераез синмаськымон ортчиз. Валтӥсь партиосты быдэстӥзы калыккуспо конкурсъёслэн лауреатсы Михаил Тимаев но егит балерина Эйми О, Донохью.

Нош Воткинскысь музеез усьтонэ лыктӥзы на дано крезьгурчилэн ӵыжы-выжыосыз но Клинысь, Алапаевскысь П. Чайковскийлы сӥзем музейёсысь куноос. Ӟуч йылолъя выльдэм юртэ нырысь ик пыриз коӵыш. Маша нимо писэй — П. Чайковскийлэн музеяз мурт ӧвӧл. Музей-усадьбаысь иворъёсъя ёзэн кивалтӥсь Маргарита Метлякова ивортэмъя, коӵыш татчы шедиз 3 ар талэсь азьло, сое кин ке куштэм.

— П. Чайковскийлэн семьяез туж яратӥз пудо-животъёсты. Асьмеос тодӥськом, кызьы вуоно крезьгурчи, пичи Петя, огпол доразы вайиз писэйпиез, кудзэ выйтыны туртто вал. Соин ик та коӵышез но ми ӧм уллялэ. Со музейлэн утисез выллем луэ. Туж яратэ адямиосты, экскурсиос дыръя но кузё сямен ассэ возе, — шуэ М. Метлякова.

Выльдэм музейын ваньмыз туж чебер но туала, со дыре ик малпан кылдэ, Чайковскийёслэн семьязы али гинэ кытчы ке потӥз но тани-тани выльысен та юртэ пыроз кадь. Музейын усьтӥськиз «Пичи дырысь вуэм крезьгур» экспозиция. Отысь трос выль экспонатъёсты но материалъёсты адӟыны-тодыны луэ, кудъёсыз музейлэн фондысьтыз та дырозь поттамын ӧй вал на.

Выльдэм юртэз учкыса, Удмуртилэн Тӧроез Александр Соловьёв пусйиз:

— Та музеез тупатъян-выльдон ужъёслы трос кужым понэмын. Шӧдӥське, котькудӥз, сюлэмзэ сётыса, со бордын тыршем. Ваньмызлы тау шуэме потэ со понна. Туннэ усадьба югыт, чебер, табере тыршоно, татчы уногес калык мед ветлоз но ас пал эшмы, дано крезьгурчимы сярысь тросгес мед тодозы шуыса.
Воткинск городлэн йырыз Владимир Перевозчиков шуиз:

— Воткинск городмылэн валтӥсь тодметэз — П. Чайковскийлэн музей-усадьбаез — туннэ нош ик ӧсъёссэ усьтэ калыклы. Ӵапак та юртын крезьгурез нырысьсэ кылӥз П. Чайковский. Быдэс дуннелы тодмо крезьгурчилэсь нимзэ нулло крезьгуро школамы но крезьгуръя педколледжмы. Ми, П. Чайковскийлэн землякъёсыз, данъяськиськом соин.

Туннэ музей-усадьбаысь валтӥсез юрт усьтӥськиз ке но, выльдӥськон ужъёс мынозы на. Озьы ке но мылкыд карисьёслы 1-тӥ оштолэзьысен экскурсиос ортчыло ини. Нош музейлэн азбарез но котырыз чебертӥськозы ини лымы быдэсак шунам бере, соку музейын ужасьёс татчы сяськаос мерттозы.

Елена Иванова

Туспуктӥз Эдуард Карипов

Удмурт Дунне
By Удмурт Дунне Апрель 3, 2015 13:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<