П. Чайковскийлы сӥзем 58-тӥяз крезьгуро фестивальын воштӥськонъёс

Удмурт Дунне
By Удмурт Дунне 6 апреля, 2015 14:17

П. Чайковскийлы сӥзем 58-тӥяз крезьгуро фестивальын воштӥськонъёс вань. Со сярысь журналистъёслы веразы культурая но туризмъя министр Владимир Соловьёв но Удмурт кун филармонилэн кивалтӥсез Алексей Фомин.

Без имени-1

П. Чайковскийлэн вор-дӥськем нуналаз Воткинскын концерт сётыны кулэ вал Хибла Герзмава но Даниил Крамер. Но Х. Герзмава 7-тӥ куартолэзе лыктыны уг быгаты. Удмурт кун филармонилэн кивалтӥсез Алексей Фомин та кырӟасьлэсь творчествозэ гажасьёсты буйгатӥз.

— Хибла Герзмава Удмуртие одно ик лыктоз. Д. Крамерен соос концерт сётозы Воткинскысь «Юбилейный» культура юртын 25-тӥ куартолэзе. Пусйыны кулэ, 7-тӥ мае Воткинске вуозы мукетъёсыз кизилиос — 21-тӥ даурысь теноръёс Максим Пастер, Александр Богданов, Георгий Фараджев, Дмитрий Сибирцев но Александр Скварко. Соос концерт сётозы Удмуртиысь «Золотая мелодия» оркестрен. Программалэн нырысетӥ люкетаз чузъяськоз П. Чайковскийлэн крезьгурез, нош кыкетӥяз учкисьёс кылзозы Быдӟым ожлы сӥзем произведениосты, — шуиз Алексей Юрьевич.

П. Чайковскийлы сӥзем крезьгуро фестивальлэн программаяз эшшо одӥг выль ним — Михаил Казиник. Та искусствоведэз, крезьгурчиез но философез дорамы ӧтьыны сюлмаськиз Ижысь школалэсь азьло визьноданъя управленилэн кивалтӥсез Елена Казакова.

— Елена Васильевна туж гажа но яратэ Михаил Казиниклэсь творчествозэ. Ог ӝыны ар талэсь азьло со дэмлаз Михаил Семёновичлы пыриськыны П. Чайковскийлы сӥзем фестивале. Толэзь талэсь азьло ачиз вуылӥз Казане, М. Казиниклэн отын концертэз вал. Соку ик искусствовед Удмуртие лыктыны соглаш луэмзэ вераз. Маин гочатӥмы? Веранмы одӥг — татын вордӥськиз П. Чайковский, — шуэ Алексей Фомин.

Михаил Казиник Воткинскын но Ижын 4 концерт-лекция сётоз. Со сяна, Удмуртиысь учкисьёс адӟозы Ульяна Лопаткинаез. Россиысь калык артистка, Санкт-Петербургысь Мариинской театрысь прима Иже вуоз 22-тӥ оштолэзе.

— Туж умой, шаерысьтымы одӥгзэ данозэ фестивалез радъянэ пырисько ке ужбергатӥсьёс. Кылсярысь, Ульяна Лопаткинаез шаерамы ӧтьыны бюджетысь уксё ӧм быдтэ, солы коньдон висъязы ужбергатӥсьёс, — шуиз министр Владимир Соловьёв.

Культураез гажась ужбер-гатӥсьёс сокем трос ик ӧвол, дыр. Соос мыло-кыдоесьгес луысалзы ке, П. Чайковскийлы сӥзем 58-тӥяз фестивале билетъёс сокем дуноесь ӧй луысалзы. Со одӥг ласянь, мукет ласянь, В. Гергиев, Д. Мацуев кадь артистъёс дунтэм луыны кулэ но ӧвӧл, дыр. Куд-ог билет дунъёс (5-8 сюрс манет) кышкато ке но, та быдӟа артистъёс пичи Удмуртие вуо шуыса, шумпотоно.

Галина Семёнова

Удмурт Дунне
By Удмурт Дунне 6 апреля, 2015 14:17