Учкись бурдъя. «Айкай» ансамбльлы тырме 25 ар

Удмурт Дунне
By Удмурт Дунне 3 апреля, 2015 13:42

Фольклор кырӟанъя но эктонъя «Айкай» кун театр 17-тӥ-18-тӥ оштолэзе юбилейзэ пусъёз бадӟым концертэн. Миым гинэ та ансамбль 125 концерт пуктӥз, отчы 25 сюрслэсь трос адями ветлӥз. Кызьы улэ но ужа «Айкай», юалляським кивалтӥсезлэсь Ольга Шибановалэсь.

— Та театрен кивалтӥськоды ни арлэсь кема. Кыӵе мылкыдды?

— Таӵе паймымон но синмаськымон коллективен кивалтон — со дан. «Айкай» театрысь котькудӥз артист тодэ, малы со татын, мар со карыны кулэ. Котькудӥз ас интыяз. Соос ваньзэ быгато: асьсэос ик кырӟало, экто, инструментъёсын шудо.

2014-тӥ ар туж яркыт вал. Сочие Олимпиадае вуылэммы сярысь ик верано ке, отысь валтӥсь сцена вылын кырӟазы-эктӥзы удмурт артистъёс, «Айкайлы» сылыса чабизы. Со-а вормон ӧвӧл? Кылем арын ик Москвае вуылӥмы «Россиысь кырӟанъёс» фестиваль-марафонэ, отчы милемды ӧтиз Россиысь калык артистка Надежда Бабкина. Собере вал Франция. Кунгож сьӧрын паймимы мукет калыкъёслэн асьме культураен тунсыкъяськемзылы. Нокин но ӧз шуы, мон уг валаськы кылдэс, концертады уг мыны — залъёс калыкен тырмемын вал. Ар пумын Москваын сӥё-дано усьтӥмы Удмуртилэсь арзэ. Соин ик «Айкайлэн» кылем арын ужамезлы «5+» пуктыны луэ.

"Айкай" ансамбль Испаниын.

«Айкай» ансамбль Испаниын.

— Туэ кытчы вуылӥды ини?

— Гастрольёс ортчизы Глазов ёросын. Вуылӥмы Поняпи, Качкашур, Кожиль, Шӧмпи но мукет гуртъёсы. Глазовысь тылобурдо вордон фабрикаын вал. Кык нунал азьлапал гинэ афишаос отчы ошиллям. Но залын буш интыос ӧй вал. Концерт бере дорамы, бодыез вылэ пыкъяськыса, лыктӥз арлыдо воргорон. Милемды курласа кадь, со шуиз: малы сыӵе шер вуылӥськоды дорамы, мынам палэнэ потаме уг луы, ветлэ ӵемгес. Учкисьёслэн «Айкаез» витемзы милемды эшшо но бурдъя.

— Кыӵе коллективез «Айкайлэн»?

— Учкись понна «Айкай» — яркыт, тунсыко но чебер коллектив. «Айкай» кылдэм дырысен театрын тыршо ини кузпалъёс — Россиысь дано артист Геннадий Кузнецов но Удмуртиысь дано артистка Таисия Кузнецова, Россиысь дано артистка Светлана Смагина, Россиысь дано артист Михаил Ворончихин.
Ми огшоры улонын но ялан ӵош, одӥг бадӟым семья кадь: репетициосын, гастрольёсын, сюрес вылын. Францие кузь сюрес вылэ потыкумы, вахтёрмы шуэ: ӝоггес бертэ, ми мӧзмиськом. Франциын гастрольёс толэзьлэсь кема кыстӥськизы. водительмы поляк воргорон вал, со милемды сцена вылын но адӟиз, уж бере но. Кошкыкумы шуиз: мон нырысьсэ адӟисько таӵе усто, ӟеч мылкыдо но эшъяськись коллективез. Та кылъёс но маке сярысь верало, дыр.

— Кызьы шедёно «Айкае»?

— Мылкыдыд но быгатонлыкед мед луоз. Крезьгуръя грамотаез тодыса гинэ, «Айкае» уд шедьы. Усто кырӟаны-эктыны быгатэм сяна, дорамы лык-тӥсь фольклорез умой мед шӧдоз, коллективен одӥг кыл мед шедьтоз. Зэмос усточиослы ми котьку шумпотӥськомы. Тани кылем арын дорамы кутӥмы Можга ёросысь Диана Барабановаез, со кырӟа но, крезен но шудэ. Мукетыз егит артистмы — Дмитрий Судаков, Карлыган палась удмурт пи. Ми сое асьмеос синйылтӥмы кыӵе ке концертысен, ӧтимы, со лыктӥз.

— Шумпотонъёс, вормонъёс сяна, котькуд ужын шедё шуг-секытъёс. Тӥляд но соос вань, дыр?

— Одӥгез висьытћсез — ӧвӧл асьмелэн интымы. Адями но пыд йылаз йыг-йыггес сылэ, солэн аслаз улон интыез вань ке. Собере, «Айкай» театрлы туж кулэ автобус. Алиез туж вуж ини.

Крезьгуро инструментъёсты но выльдэммы потэ. Кылем арын йыртэмасьёс баянмес но арганмес лушказы. Тужгес сюлэм вӧсь луиз «Bugari» баян ышемлы. Со туж дуно инструмент, секыт шедьтыны. Но пӧртэм шуг-секытъёс шоры учкытэк, артистъёс сюлмысь тыршо.

— Маин шумпоттоды юбилеяды?

— «Аксион» культура юртын ортчозы юбилеймылы сӥзем концертъёс. Сцена вылэ поттомы вань умойзэ. Бадӟым концертын 25 ар ӵоже кылдытэм тужгес яркыт номеръёс но, ӵыж-выль постановкаос но луозы. Чеберлыкъя кивалтӥсьмы, Удмуртиысь дано артист Олег Бимаков, артистъёсын ӵош али ужа выль программа бордын. Олег Николаевич аслэсьтыз секыт ныпъетсэ быгатыса нуэ. Солэн но артистъёслэн тыршеменызы, концертмы туж чебер, тунсыко пӧрмыны кулэ. Дырызлэсь вазь ваньзэ шараяме уг поты, одӥгзэ гинэ верало: юбилейлы сӥзем концертъёсын учкисьёсмы адӟозы «Бусы сюан» постановкаез но. Пусйыны кулэ, сцена вылэ артистъёсмы потозы выль дӥськутэн. Соосты кылдыто усточиосмылэн — Ирина Даниловалэн, Светлана Ашихминалэн но Ирина Валеевалэн — зарни киоссы. Юбилейлы сӥзем концертъёсмы оштолэзе гинэ уз луэ, соос азьланьтӥськозы сӥзьыл но, кылсярысь, 6-тӥ шуркынмонэ сцена вылын юбилейзэ пусъёз Удмуртиысь калык артист Геннадий Кузнецов. Соин ик газетты пыр учкисьёсмылы вераммы потэ: ми тӥледыз котьку шумпотыса возьмаськомы «Айкайлэн» концертъёсаз.

Мар вал «Айкайын» 25 ар ӵоже:
70-лэсь уно артистъёс ужамын (али кырӟа-вера 25 артист).
20-лэсь уно комплект костюмъёс вуремын-куэмын.
70-лэсь уно инструментъёсын шудэмын.
100-лэсь уно постановкаос возьматэмын.
20-лэсь уно кун-гожсьӧр гастрольёсы потамын.
11 семья тыршемын (али ужа 5 семья).

 Галина Семёнова

Удмурт Дунне
By Удмурт Дунне 3 апреля, 2015 13:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<