Вань-а мукет планетаосын улон?

Удмурт Дунне
By Удмурт Дунне Апрель 8, 2015 13:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
планета

Асьме Шунды системаын, Музъем сяна, вуэн но кислородэн планета ӧвӧл ни.

Пумтэм кизилиос пӧлын

Кизилиё инме учкыса, юан кылдэ: Музъеммы сяна, вань на меда кытын ке но адямиослы улыны ярась планета?

Нырысь ик тодоно, малы милям Музъемамы улыны луэ? Музъем Шундылы (Шунды — со кизили) туж матын но, кыдёкын но ӧвӧл, соин ик Музъемын ву вань. Планетамы Шундылы матынгес луысал ке, ву куасьмысал, кыдёкынгес ке — кынмысал. Иське, улон мед кылдоз шуыса, планетаын ву луыны кулэ.

Кыкетӥез, планеталэн атмосфераез медло. Музъем вылын бадӟым вуос дыръя потӥзы ву турынъёс, соос миллион аръёс ӵоже вань лулосъёслы шоканы тырмымон мында кислород кылдытӥзы.

Асьме Шунды системаын, Музъем сяна, вуэн но кислородэн планета ӧвӧл ни. Соин ик тодосчиос улыны тупась инты мукет кизилиос дорысь утчало. Тодосчиосты та ужпум бадӟым шуг-секытэ уськытэ.

Кизилиос зол пишто но асьме дорысь туж кыдёкын. Кизилилэн пиштэменыз сэрен огшоры телескопен троссэ планетаосты адӟыны уг луы. Соин сэрен планетаосты утчаны мукет амал малпано луиз. Тужгес ярамонэз амал «эффект Доплера» нимаське. Со юрттэ шедьтыны асьме Музъеммылэсь трослы секытгес планетаосты.

Кызьы? Секыт планета ас шундыезлы туж матын берга, гравитациен йырин планета но шунды ог-огзы борды кыстӥсько но туж ӝог бергало. Озьы шунды-кизилилэн сиосызлэн частотаосыз вошъясько. Музъеммы дорысен со адӟиське. Озьы тодосчиос валало, со кизили бордын маке но вань шуыса. Та амалъя 1980-тӥ арын шедьтэмын вал Беллерофонт инсьӧрму (планета). Со луиз асьме Шунды системамылэсь палэнын шедьтэм нырысетӥез планета. Беллерофонт Музъеммылэсь 150 поллы секытгес, ас шундыез дорын туж матын интыяськемын, соин сэрен отын 1000 градус пӧсь. Тӧл часкын 1000 иськеме пельтэ. Озьыен, отын улон ӧвӧл.

2009-тӥ арын НАСА (Америкаысь инсьӧрез эскерись огазеяськон) «Кеплер» телескопсэс инсьӧре ыстӥз. Со Галактикаысьтымы Музъеммылы кельшись планетаосты утчаз. 5 ар ӵоже «Кеплер» шедьтӥз 1000-лэсь ятыр планетаос. Соос пӧлысь 6-ез Музъеммылы тупало: ас Шундызы дорысен улонлы тупась зонаын интыяськемын, соин ик атмосферазы но вань, дыр.

Одӥгез соос пӧлысь Кеплер 22б инсьӧрму. Шедьтэмын 2011-тӥ арын. Музъемлэсь 2 поллы бадӟымгес. Бурый карлик Кеплер 22 нимаськись шундыезлы матын. Бурый карлик, асьме Шундыен ӵошатыса, лябгес пиштэ, соин сэрен планетазэ шунтыны солэн кужымез уг тырмы. Но шедьтэм планетаын 22 градус шуныт возиське. Малы? Тодосчиос малпало, Кеплер 22б планетаын атмосфера вань шуыса, угось атмосфера быгатэ шунытэз возьыны. Но луоз меда отын улыны? Кеплер 22б Музъемлэсь 2 поллы секытгес бере, гравитациез но 2 поллы золгес.

Мукет планета — Глизе 581с. Шедьтэмын 2007-тӥ арын. Музъемлэсь 5 поллы бадӟымгес ке но, гравитациез 1,5 поллы гинэ золгес. Со планетаын быдэсаз ву, муэз ӧвӧл. Отын 40 градус шуныт. Тодосчиос уг тодо на, отын будосъёс вань-а, ӧвӧл-а. Будосъёсыз ӧвӧл ке, кислородэз но ӧвӧл. Шокатэк адями улыны уз быгаты.

Улонлы тупась планетаос талэсь но трос шедьтэмын ни, но соосты пыр-поч эскерон понна техника ӧвӧл ай. Соос асьме дорысь туж кыдёкын. Музъемлы матысез планета — Глизе 581с. Со доры, кылсярысь, 20 световой аръёс лобоно луоз. Световой ар — ар куспын тыллэн ортчем сюресэз. Тыл секундскын 300 сюрс иськем ортче.
Туала техникаен Толэзёзь адями 3 нуналскын вуэ. Отчыозь 380 сюрс иськем. Марсэ 150 нунал пала лобӟыны выре. Проксима Центавра — асьме Шундымылы тужгес но матысь шунды-кизили — доры тужгес но ӝог лобась кораблен 18 сюрс ар лобоно.

Инсьӧрлэсь пасьталазэ валан понна «Вояджер-1» корабль сярысь верало. Инсьӧре сое 1977-тӥ арын лэзизы. Вань корабльёс пӧлысь солэн тужгес но бадӟым скоростез лыдъяське (секундскын 17 сюрс иськем). Озьы ке но со али но асьме Шунды системамы сьӧры ӧз поты на.

Наука азинске, матысь дыре кылдоз, дыр, тыллэн скоростеныз лобась корабль. Планетаос дорозь ӝог вуыны луонлык кылдытозь, ортчоз на 100, 200 оло 1000 но ар. Инсьӧрын Галактикаос миллионэн лыдъясько, отын Шунды кадь миллиард кизилиос пишто, кудъёсыз котыртӥ бергало планетаос. Сомында инсьӧрмуос пӧлысь уз шедьы шат сыӵе планета, кудӥз сярысь адями вераны быгатоз: «Та мынам кыкетӥ гуртэ!»

Слава Коробов

Удмурт Дунне
By Удмурт Дунне Апрель 8, 2015 13:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<