Вуоз-а лазер сиослэн вапумзы?

Удмурт Дунне
By Удмурт Дунне Апрель 2, 2015 15:15
026304,многоотраслевая выставка-ярмарка предприятий УР,сделано в Удмуртии,ФОЦ Здоровье,экспоцентр,кардиостимулятор,сердце,экспозиция

Пӧртэм аппаратъёс интые вуозы лазеръёс

Белоруссиысь хирургъёс элькунмылы ӵекто лазерен йӧнатон аппаратъёссэс. Дорамы вуылыса ик, возьматӥзы, кызьы соос кутӥсько эмъян удысын.

Удмуртиысь делегация кемалась ик ӧвӧл вуылӥз Белоруссие. Элькунмылэн Тӧроез Александр Соловьёв но Белоруссилэн Президентэз Александр Лукашенко кенешизы огъя проектъёс, огъя ужпумъёс сярысь. Сыӵе пумиськонлэн нырысетӥ емышъёсыз кисьманы кутско ини.

Александр Донович, Валерий Денисенко, Сергей Пухтаревич — Белоруссиысь нимо-дано тодосчиос, хирургъёс. Удмуртие вайизы «Миола» лазер аппаратсэс, асьме эмъясьёсты соин ужаны дышетӥзы, Нырысетӥ элькун больницаын 4 операция ортчытӥзы.

— Кылем даурысь 90-тӥ аръёсы ай тросэзлэн эмъясьёслэн лазер сиосын ужаны мылкыдзы кылдӥз, соку ик физикъёс басьтӥськизы эмъян удыслы тупась аппаратъёс кылдытон борды, — шуиз Минскысь тодосчи Александр Донович. — Уката чырмыт та уж борды кутскизы немецъёс. Мон но соослэн аппаратъёсынызы ужаса эскери. Но маиз но соиз ӧз кельшы. Созэ озьы карысал, тазэ тазьы тупатысал — та малпанъёсме верай белорус физикъёслы. Озьы 2004-тӥ арын кылдытӥм «Миола» аппаратмес. Али кунысьтымы тросаз больницаосын со вань. Арлы быдэ сюрсъёсын операциос лэсьтӥськом.

Белоруссиысь хирургъёс лазерен йӧнатонлэсь кӧня ке пумо ӟеч палъёссэ пусйизы: операция дыръя вир уг поты, вӧсь уг луы, адями туж ӝог катьяське…

Верам сяна, возьматӥзы но. Операция лэсьтӥзы ӝуше, сюлэ. Солэсь азьвыл хирургъёс валэктӥзы:
— Одӥгезлэн нылкышнолэн ӝушаз полипъёс пото, пе. Пичиоссэ потосъёсты лазерен гинэ утялтом, бадӟымъёссэгес нырысь вандом ик, собере ини бервылзэс лазерен волятом. Лазер бервылэ полипъёс выльысь уз потэ ни. Нош огшоры вандӥськод ке, соос выльысь будыны кутско. Мукетыз нылкышно кемалась, пе, курадӟе ни ӝушаз яраос кылдэмлэсь: операция лэсьто, ӝушез выль интыетӥ пасяськыны кутске. Ӝушысь быгытъёсыз лябӟыны кутскемын, бурмыны уг вормо ни — татын но ӵапак иназ луоз лазер.

Асьме элькунысь эмъясьёс тыро-пыдо тодматскизы Белоруссиысь хирургъёслэн ужан амалъёсынызы. Нырысетӥ элькун больницаысь валтӥсь врачлэн воштӥсез Андрей Ковалёв ӧз ваты:

— Огвакытэ асьме эмъясьёс но лазерен йӧнатон борды басьтӥськизы ни вал. Но аппаратъёс вужмизы, выльёссэ басьтыны ӧйлась ни.

Адями мугорын вань, пе, сыӵе интыос, кытчы скальпелен пырыны туж шуг — таӵе дыръя туж иназ луоз лазер. Табере ӧжыт ӧвӧл кардиостимуляторъёсын ветлӥсьёс — сюлэмзы ляб. Лазер таӵе учыръёсы но туж тупалоз. Лазер сиосты кутыны луоз на, лек пыктосъёсын курадӟисьёслы, кема кыстӥськись висёнъёсын черламъёслы операция лэсьтыку. Угось таос пӧлысь тросэз скальпелен вандылонэз уг чидало.

Элина Кумачёва

Туспуктэмез Александр Горбуновлэн

Элина Кумачёва

Удмурт Дунне
By Удмурт Дунне Апрель 2, 2015 15:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<