Ужамед ке потэ — вераськы!

Удмурт Дунне
By Удмурт Дунне 1 апреля, 2015 08:02
8-27-7

Палэнысь лыктэмъёс плысь 75 процентэз ужало лэсьтћськон удысын.

Россие вуись мигрантъёслэн лыдзы матысь дыре шӧдскымон кулэсмыны быгатоз. Маин со герӟаськемын но маин берытскоз кунмы понна? Та сярысь журналистъёслы вераз Миграцияя кун службалэн Удмуртиысь управлениеныз кивалтӥсь Сергей Ислентьев.

Толон
Россие котьку кыстӥсь-кылӥзы СНГ-е пырись кунъёсын улӥсьёс. Одӥгъёсыз дорамы лыкто, турист кариськыса, мукетъёсыз — дышетскыны, но уката тросэз — ужаны. Берло 3-4 ар куспын гинэ элькунамы лыктӥсь мигрантъёслэн лыдзы ог 30 процентлы йылӥз. Та герӟаськемын Европаын кризис луэмен, Азиысь кунъёслэн экономиказы лябњемен но мукетыныз. Азьвыл аръёсы ог 16-18 сюрс муртлэн дорамы улыны-ужаны лэзись документэз вал.

— Ужаны лыктӥсьёс пӧлын ог 42 процентэз — Узбекистанысь, ог 8-10 процентэз — Таджикистанысь но Армениысь, ог 11 процентэз — Азербайджанысь, — пусйиз Сергей Ислентьев. — Озьы ик вань Грузиысь, Словениысь, Турциысь, Вьетнамысь, Молдоваысь но мукет кунъёсысь лыктӥсьёс. Украинаын секыт югдур кылдэмен, мигрантъёс пӧлысь ог 10 процентэз отысь луо: 2 сюрс 800 пала адями дорамы, юрттэт курыса, вазиськиз ни.

Зэм, ваньзы украинецъёс дорамы уг кылё, мукет улосъёсысь тодмооссэс, ӵыжы-выжыоссэс шедьто но отчы кошко. Но татчыозь Украинаысь потэм 116 муртлы огдырлы улыны лэзён (разрешение), 18-эзлы вид на жительство, 7-езлы гражданство сётэмын. Эшшо 280 мурт огдырлы пегӟон инты (убежище) асьме дорын шедьтӥз.

Туннэ

Туэ 1-тӥ январьысен мигрантъёслы выль куронъёс пуктӥсько. Ваньзылы вормымон ӧвӧл соос. Соин ик али ик шӧдӥське: дорамы лыктӥсьёс ӧжытгес кылё. Уката но — ужаны мылкыд карисьёсыз.

— Нырысь ик, асьме доры уже интыяськон понна мигрантъёслэн табере одно луыны кулэ кунгожсьӧр паспортсы, — пусйиз Сергей Ислентьев. — Азиысь кунъёсын со ог 100 доллар пала усе. Татчы лыкто ке, одно ортчоно луозы медосмотр — та но дунтэк ӧвӧл. Эшшо шедьтоно улон инты, со понна дун тыроно. Та сяна, туэысен мигрантъёс одно сётоно луо ӟуч кылъя, Россилэн историезъя экзамен. Таизлэн дуныз — 4 сюрс 900 манет. Озьы ужаны кутскемезлэсь азьло ик палэнысь лыктӥсьлэн кисыяз ӧжытсэ ог 30 сюрс манетэз луыны кулэ.

Но коньдон бордын гинэ ужпум ӧвӧл. Тросэз мигрантъёс уг быгато экзамен пыр потыны. Угось СНГ-е пырись кунъёсын ӟуч кылэз кун кыл пӧлысь поттӥзы, сое школаын дышетэмысь дугдӥзы. Россилэсь историзэ но соос уг тодо ни.

— Мигрантъёсты ӟуч кыллы дышетонъя курсъёс ужало УдГУ-ын но, ИжГТУ-ын но, — азинтӥз веранзэ миграция ужпумъёсъя ёзэн кивалтӥсь. — Но ӟуч кылэз но, историез но воксё уд тодӥськы ке, толэзь куспын сое уд дышеты ни.

Нош ӵапак тамында гинэ дыр сётӥське мигрантлы, Россие пыремез дырысен экзамен сётытозь. Ӧз ортчы ке экзамен пыр, 90 нунал ӵоже сое дорысьтымы уллясь уз луы на. Но уже интыяськыны уз быгаты.
Озьы ужаны патент басьтыны быгатӥсьёс туэ 5 сюрс 800 пала гинэ, кылем арын та выкытлэсь ог 27 процентлы ичигес. Соос пӧлысь но бадӟым люкетэз — школаез 1991-тӥ арозь йылпумъямъёс, школаын ӟуч кылэз дышетэмъёс. Таослы экзамен сётоно ӧвӧл.

Ӵуказе

Кызьы выль куронъёс шӧдӥськозы Россилэн, элькунмылэн экономикаез вылын? Та пумысен малпанъёс пӧртэмесь. Одӥгъёсыз али ик куалектэмын ни, ужась киослы ёрмом шуыса. Мукетъёсыз оско: мигрантъёстэк но ваньзэ лэсьтыны вормом.

Асьме элькунамы вуисьёс пӧлысь ог 75 процентэз ужало вал лэсьтӥськон удысын. Куд-ог ужбергатӥсьёс уг вато, соос юн осконэн витё май-июнь толэзьёсты — оло, соку, пе, тросгес луозы дорамы ужаны куриськисьёс. Угось мигрантъёс, шутэтскон нуналъёсты тодытэк, мыло-кыдо тыршо. Но мукет ласянь, зэмзэ но, со ужез ик асьмеос быдэсъяны ум пӧрмытэ шат?

Озьы-а, тазьы-а, Россиын выль закон улонэ пыӵатӥське, кунамы югдурез умоятон вылысь — лушкем вуыса ужасьёс медаз луэ, пӧртэм калыкъёс куспын валан мед луоз.

Нялтас вераса, элькунамы берлозэ ортчытэм юалляськонъёс возьматӥзы: эшлыко мылкыдын улӥсьёс тросгес луо. Ар талэсь азьло гинэ ог 24 процентэз адямиос верало на вал палэнысь вуэмъёсты гажамтэзы сярысь, али — 13 процентэз, 60 процентэз шӧдэ: пӧртэм выжыысь калыкъёс элькунамы золгес эшъяськыса улыны кутско.

Элина Кумачёва

Туспуктӥз Александр Горбунов

Удмурт Дунне
By Удмурт Дунне 1 апреля, 2015 08:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<