25-тӥ арзэ Кез ёросысь Тамара Тихоновалэн призъёсыз вылэ куасэн бызьылонъя ӵошатсконъёс ортчо

Удмурт Дунне
By Удмурт Дунне Апрель 1, 2015 12:48
OLYMPUS DIGITAL CAMERA

Тамара Тихонова Олимпиадаын зарни медаль утэм бере ёросазы куасэн бызьылонъя ӵошатскон радъяны кутскизы.

Кез ёросын вылӥ дунъяло аспал эшсэс, дуннелэсь куасэн бызьылонъя чемпионзэ, Олимпиадаын зарни медаль басьтэм спортсмензэс Тамара Тихоноваез. Солэн призэз понна 25-тӥ арзэ куасэн бызьылонъя ӵошатсконъёс ортчизы.

Тамара Тихонова Олимпиадаын зарни медаль утэм бере ёросазы куасэн бызьылонъя ӵошатскон радъяны кутскизы. Мытэм ужзэс ӧз аналтэ. Кылем суббота нуналэ 25-тӥосыз ӵошатсконъёс ортчизы. Ёросысь куасэн бызьылыны яратӥсьёс сяна, отчы вань мылкыд карисьёс пыриськыны быгато. Таяз радэ Глаз, Эгра, Балезино ёросъёсысь но Пермь улосысь Верещагино городысь 130 пала спортсменъёс люкаськизы.

— Азьвыл аръёсы та ӵо-шатсконъёсы 280-300 спортсменъёс люкаськылӥзы, берло дыре калык ӧжытгес кылиз, — шуэ та ужрадэз радъясьёс пӧлысь одӥгез, ёрос администрациысь мугорез кыдатон культурая но спортъя управлениысь специалист Георгий Шатров. — Быгатэмезъя Тамара Ивановна Тихонова но дӥнямы берта. Шумпотӥськомы, та ӵошатсконъёсын ик кыдазы туала егит спортсменъёс: Константин Главатских но Аркадий Меньшиков.

Арлы быдэ Кезын 4 кубок шудытӥське: 9 классъем но шор ёзо школаос пӧлын, предприятиос но ёросъёс куспын. Вормисьёсты шараязы 8 группая, тужгес покчиос 1 иськем 200 метре бызьылӥзы, бадӟымъёс — 10 иськеме. Вань люкам очкоосты лыдэ басьтыса вормем школаосты, предприятиосты кубокъёсын пусйизы.

Школаос пӧлын вормисе потӥзы Югуртысь но Кузямувыр гуртысь пиналъёс. Кужмо нюръяськон пуромиз бадӟым спортсменъёс пӧлын. Кужмо луизы куноос. 18-34 аресъемъёс пӧлын зарни медаль басьтӥзы Эгра ёросысь Елена Галичанина но Дмитрий Корепанов, 35-49 аресъемъёс пӧлын — Эгра ёросысь Людмила Семакина но Балезино ёросысь Владимир Корепанов, 50-59 аресъемъёс пӧлын — Кезысь Ольга Лекомцева но Эграысь Сергей Стрелков. 60 арессэс ортчемъёс пӧлын вормизы Кезысь Алевтина Главатских но Николай Сунцов. Ӵошатскон йылпумъяськем бере нимаз кубокъёс сётӥзы кужмо предприятиослы но учреждениослы. Вормисе потӥз Кезысь сырзавод.

Кезын одӥгез ужрад йылпумъяськиз гинэ, табере мукетызлы дасясько. Т. Тихонова нимо спорткомплексазы куасэн бызьылонъя марафон ортчоз, мылкыд карисьёс 3 иськемысен 30 иськемозь бызьылозы. Таиз ужрад тол сезонэз йылпумъянлы но Быдӟым Вормонлы 70 ар тырмонлы сӥземын луоз.

Валентина Емельянова

Туспуктэм Спортъя музейысь басьтэмын

Удмурт Дунне
By Удмурт Дунне Апрель 1, 2015 12:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<