П. Чайковскийлы сӥзем 58-тӥез фестиваль

Удмурт Дунне
By Удмурт Дунне 1 апреля, 2015 09:02
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

П. Чайковскийлы сӥзем 58-тӥез фестиваль усьтӥськиз. П. Чайковскийлы 175 ар тырмонэн валче со кизилиё луоз.

Калыкмы дышиз ини, «П. Чайковскийлэн дор палъёсаз» крезьгуро фестивале нимо-дано артистъёс вуо шуыса. Культура удысысь та одӥгез валтӥсез бадӟым ужрад луэ.

Туэ дорамы вуо сыӵе кизилиос, кудъёсызлэн гастрольёссы кык-куинь арлы азьлапал гожъямын но соосты быдэс дуннеысь учкись вите. Удмурт кун филармонилэн кивалтӥсез Алексей Фомин верамъя, ваньмыз мынэ чакламъя.

— Кинэ ӧтеммы потэ вал юбилейлы сӥзем фестивалямы, ми соосты ӧтьыны быгатӥмы. Со сяна, выль ӟеч ивормы вань на: Удмуртие лыктоз паймымон скрипач, искусствовед, крезьгурчи но философ Михаил Казиник. Та адями мында нокин но уг тоды, дыр, искусстволэн историез сярысь. Михаил Казиниклэн концертъёсаз но лекциосаз сюрыны тырше котькудӥз, малы ке шуоно Россиын но соос сокем трос уг луо. Нош Удмуртиын Михаил Семёнович 4 лекция лыдӟоз, кылсярысь, П. Чайковскийлы сӥземзэ, искусстволэн пайдаез сярысь, вералоз, кызьы шонер кылзоно крезьгурез но кыӵе юанъёслы валэктон отысь шедьтыны луэ. М. Казиник пумиськоз Ижевскысь но Воткинскысь учкисьёсын. Нош 58-тӥ крезьгуро фестивалез сћё-дано усьтоз пианист Денис Мацуев. Кин со, веранэз ӧвӧл. Д. Мацуевез тодо классика крезьгурен тунсыкъяськисьтэм адямиос но. Пусйыны кулэ, та артист шудоз выль «Стейнвей» роялен. Д. Мацуевлэн концертэз ортчоз Ижысь «Аксион» культура дворецын. Соин ик выль «Стейнвей» но али отын. Но со шыпыт уг сылы, отчы шудыны ветло республикаысьтымы крезьгуръя колледжысь студентъёс. Ачим но шудыса эскери — синмаськымон инструмент! — шуиз Алексей Фомин.

Кызьы ивортӥмы ни, 58-тӥяз крезьгуро фестивале билетъёс ӝог быро, куд-ог концертъёсы соос воксё ӧвӧл ни. Но шумпотыса вераны луэ, Санкт-Петербургысь Мариинской театрысь симфонической оркестрлэсь но кивалтӥсезлэсь Валерий Гергиевлэсь кык концертсэс чик дунтэк учкыны быгатозы шаерысьтымы усточи нылпиос. Калыккуспо крезьгуро фестивальёсты радъясь маэстро Гергиев фестивале лыктэмезлэсь азьло курон пуктӥз, концертаз нылпиос дунтэк пыремын мед луозы шуыса. Удмуртиысь Правительстволэн Тӧроезлэн воштӥсез Андрей Кузнецов верамъя, В. Гергиевлэн куронэз быдэстэмын: 16-тӥ апреле Ижын но Воткинскын ортчоно концертъёсты шаерысьтымы крезьгуръя школаосысь 300 устоосыз нылъёс но пиос дунтэк учкозы.

Без имени-1

 

 

Галина Семёнова

Удмурт Дунне
By Удмурт Дунне 1 апреля, 2015 09:02