Оринаез дунъян

Удмурт Дунне
By Удмурт Дунне 2 апреля, 2015 13:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

эмлема2015-тӥ ар ялэмын Литературалэн арез шуыса. Умой луысал вылэм кылбуръёсме туэ  поттыны. 15 чуръёсы туж курисько кадь калыке потыны. Кылбуръёсам уга возьматэмын улонмылэн шуг-секытъёсыз но шумпотонъёсыз, палдурес шудэ. Калыклы кельшыны кулэ кадь. Мон ма борды кутскисько, ваньмыз пӧрме. Улонысь ӧрзэ, уга, Цезарь выллем шедьтӥсько: лыктӥсько, адӟисько, вормисько.

Куд-огзэ кылбуръёсме газетын но поттӥзы бере, калыклы ӧжытак ке но тодмо луи, малпасько. Коньдон кураса уг ветлы. Медаз пыкылэ, матысь эшме сямен.  Солы тазьы шуиллям:

— Кылбурасе потэмед потэ ке, кисыяд коньдонэд мед шильтыртоз. Тонтэк но кураськись поэтъёс шаерамы тырмыт.

Озьы ачим — 500 тиражен — книгаме поттӥ. Дэмласа но вузаса, пӧй, уг ветлы ай. Книга вузан магазинэ сёто. Кӧт шӧдэ, авторзэ адӟыса, лыдӟисьёс книгаосме усьтыр-табыр октозы-калтозы. Ваньмыз сямен кылбуръёсы крезьгуре курисько бере, кырӟан гожъясьёс но кулэ карозы, дыр. Трос ушъяськонтэм вылысь тани одӥгзэ гинэ шедеврме лыдӟо:

Мынӥсько мон сьӧр гуртэ,

Чебер ныл отын улэ.

Ваёно ни вал кышно,

Пӧраське со туж усто.

Чебересь чуръёсы, оветь? Книгаме, магазинэ сётыса, дырын-дырын эскерисько, кыӵе, пӧй, продукцие вузаське. Чебер дыды, пыремме адӟе ке, киосыныз гинэ шона.

— Уг быгатӥськы вузаны. Дэмласько, ушъясько, нош басьтӥсез ӧвӧл.

Кузпалы ӟургетыны ӧдъяз:

— Гуртысь ужез уд адӟиськы: дор — магазин, магазин — дор. Ку гуртысь ужез лэсьтод? Вера ай, книгаостэ басьтӥсь вань-а коть?

— Дыр ортчыны кулэ, реклама лэсьтоно, соку басьтозы. Та арнязэ школаостӥ, клубъёстӥ ортчо, калыклы верало книгае сярысь. Соин ик эн ышты, «ӟеч кӧл» шуыны  гинэ доре вуыло, — верасько кышноелы.

Арня ортчыса, нош мынӥ магазинэ. Вуз карись шумпоттыттӥз:

— Молодец, кылбурчи, зол реклама лэсьтэмед, шӧдске, одӥг адями, творчестводэ оптом басьтыса, кошкиз.

Дорам бертыкум, чебересь малпанъёс йырам кылдӥзы. Асэным данъяськонэ пушкам уг тэры ни. Мон ведь нырысетӥез луисько, дыр, кин быгатӥз, Литературалэн арезлы сӥзьыса, книга поттыны. Мед гинэ дунъялозы вылэм. 500 книга калыке вӧлмиз, со туж умой ук. Кин тодэ, оло, табере радиое, телевидение ӧтёзы кылбуръёсме лыдӟыны. Дыр вуиз, малпасько, кыкетӥ книга борды басьтӥськыны.

Чагыресь малпанъёсам выйыса, дорам вуэмме ик ӧй шӧды. Кузпалылы мычи вань коньдонме.

— Ме, шуисько, гажано Оринае, тани ужамелэн пайдаез.

Нош со нокыӵе но кариськытэк коньдонме басьтӥз но шыкысаз пытсаз. Но коть шу вал:

— Быгатӥськод, Данилыче, коньдон поттыны, молодец, семья сюдӥсе тон мынам.

Нош со:

— Ваньзэ книгаостэ мон магазинысь басьтӥ — корка сигын соос сэрпалтэмын. Одӥгзэ но басьтӥсь луымтэ. Соин ик, лэсьты со ужез, кудӥз пӧрме но калыклы яра. Кӧня ар ини машиналэсь рульзэ бергатӥськод?

— 20 ар, — шуисько.

— Бергаты на эшшо сомында ик. Таиз ужед тонъя.

 Николай Трубачев

Удмурт Дунне
By Удмурт Дунне 2 апреля, 2015 13:28