Быръёнлы дасяськон мытэмын2

Удмурт Дунне
By Удмурт Дунне 15 апреля, 2015 09:09
2-10-5

Партилэн списокезъя ӵектӥськись кандидатъёс пӧлын тужгес но трос куара люказ Анжелика Михеева.

Туэ куара сётонъя огъя нуналэ — 13-тӥ сентябре — быръёмы шаерысьтымы городъёсысь Думаосы депутатъёсты. Талы дасяськон борды али ик мылысь-кыдысь басьтӥськиз ни «Огъя Россия» партилэн Удмурт ёзэз: солэн кичӧлтэмезъя Ижын таяз арняе усьтӥськиз праймериз.

Пусйыны кулэ, «Огъя Россия» сяна, праймериз амалэз мукетъёсыз партиос уг куто. Праймериз ортчытон чотын «Огъя Россия» партилэн ёзчиосызлэн луонлыксы кылдэ кандидатэ ӵектӥськыны, асьсэды калык азьын возьматыны, программаосынызы тодматыны но вормисе потэмъёс пӧлы шедьыны — ӵапак тазьы шара кенешыса-бырйыса, кылдэ та партилэн быръёнъёсы ӵектэм списокез. Отчы шедё устоосыз пӧлысь устоосыз, тужгес визьмоосыз: праймериз пыр потэмъёс, ӟырдыт вожвылъяськонэз чидамъёс. Но кылем аръёсын ӵошатыса, туэ таӵе выльдӥськон пыӵа: праймеризэ пыриськыны быгато, «Огъя Россилэн» ёзчиосыз сяна, калык огазеяськонъёсысь адямиос но.

Праймеризэ пыриськыны мылкыд карисьёсты вите пӧсь ӵошатскон: та ужрад кыстӥськоз 11-тӥ маёзь — элькунысьтымы ваньмаз городъёсын ортчозы 73-лэсь ятыр пумиськонъёс. Тужгес кельшем кандидатъёс понна куаразэс сётыны быгатозы «Огъя Россия» партилэн 6 сюрслэсь ятыр ёзчиосыз. Республикаысьтымы городъёслэн Думаосысьтызы 147 мандатъёсы-интыосы ӵектӥськизы ни 400-лэсь ятыр кандидатъёс. Бырйисьёслы капчи уз луы — ӵектӥськемъёс пӧлысь быръёно луозы депутатлэн удысэзлы тужгес но тупась кандидатъёсты: партилэн списокезъя но, одӥг мандатъем округъёсъя но.

Толон Ижысь К. Герд нимо гимназиын ортчиз «Огъя Россия» партилэн Удмурт ёзэзлэсь ӵектӥськыны мылкыд карисьёс пӧлын быръён: люкаськемъёс тодматскизы Ижысь Устинов ёросысь Автозавод округъя Иж город Думае ӵектӥськыны мылкыд карисьёсын. Гимназилэн залаз трос калык люкаськиз: соос пӧлын партилэн та ёросъя ёзаз пырисьёс, калык огазеяськонъёсысь азьветлӥсьёс, кандидатъёс понна висьыны вуэмъёс.
Соосты шуныт мылкыдын пумитазы Удмурт Элькунлэн Тӧроез Александр Соловьёв, Кун Кенешлэн Тӧроез Владимир Невоструев, партилэн Удмурт ёзэзлэн Ижысь Устинов ёросъя ёзэзлэн секретарез Юрий Фёдоров.

— Мон малпамъя, Иж город Думалэн 6-тӥ ӧтчамаз депутатъёсты быръёнын та амалэз кутон — туж пайдаё, — калыклы вазиськиз Александр Соловьёв. — Угось асьмеос быгатӥськомы тазьы дэмен люкаськыны, кандидатъёсын ваче син адскыны но кенешыны. Озьы быръёмы тужгес визьмозэ, ужлэсь кышкасьтэмзэ. Кылем арын мон но ортчи праймериз пыр. Та ужрадэ пыриськись кандидатъёс сямен ик, калыкез мон но тодматӥ аслам программаеным. Трос ужъёс чакламын вал соку, соос пӧлысь уноез туннэ нуналлы быдэстэмын ни. Но буйгатскыны вазь на: трос ужпумъёсты сэрттоно-пертчоно луоз на азьланяз. Но мон талэсь уг кышкаськы, угось тодӥсько: мон огнам ӧвӧл, асьмеос ваньмы огазьын, асьмеос ваньзэ вормомы.

Ижысь Устинов ёросысь Автозавод округъя депутатэ ӵектӥськыны мылкыд каризы таӵе адямиос: Ижысь 90 номеро нылпи садлэн кивалтӥсез Анастасия Васильева, ЖКХ удысын калыклэсь правооссэ утёнъя центрлэн, Кун Кенеш бордын кылдытэм Егитъёслэн парламентсылэн 2-тӥ ӧтчамысьтыз ёзчиез Александр Евсеев, Ижысь К. Герд нимо гимназилэн кивалтӥсез, Кун Кенешлэн 4-тӥ ӧтчамысьтыз депутат Анжелика Михеева, Пичи ожъёсысь ветеранъёслэн но инвалидъёслэн огазеяськонзылэн Удмурт ёзэзлэн кивалтӥсез Сергей Морозов, «Центр» корпорацилэн кивалтӥсезлэн воштӥсез Александр Прозоров, «Радио» огазеяськонлэн кивалтӥсез Александр Фомин, Ижысь город Думалэн та ӧтчамысьтыз депутатэз Константин Котов. Соос люкаськемъёсты тодматӥзы ужан удысъёсынызы, вератэк ӧз кельтэ соосты тужгес но сюлмаськытӥсь ужпумъёс сярысь: котькудӥз ӵектӥз соосты палэнтонъя аслэсьтыз программазэ. Люкаськемъёс тужгес но тунсыко потыса кылзӥзы удмурт кандидатъёслэсь вазиськонъёссэс, кылсярысь, Анжелика Михеевалэсь но Александр Евсеевлэсь.

Ужрад йылпумъяськиз куара сётонэн. Партилэн списокезъя ӵектӥськись кандидатъёс пӧлын тужгес но трос куара люказ Анжелика Михеева, нош одӥг мандатъем округъя ӵектӥськисьёс пӧлын — Константин Котов.
Матысь дыре «Огъя Россилэн» кандидатъёсыныз тодматсконъёс-пумиськонъёс ортчозы Удмуртиысь ваньмаз городъёсын.

Елена Никитина

Удмурт Дунне
By Удмурт Дунне 15 апреля, 2015 09:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<