Мылкыд бугырске — чуръёс кисьтӥсько!

Удмурт Дунне
By Удмурт Дунне 31 марта, 2015 12:06
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

20-27-4

Фёдор Суворовлэн 75 аресэзлы кузьым — выль бичет

75 арессэ пусйиз Удмуртиысь дано журналист, шаерысьтымы Писательёслэн огазеяськонзылэн ёзчиез, «Советской Удмуртиын» кема аръёс ӵоже ужам Фёдор Суворов.

— Фёдор Александрович, лыдъяськоды-а кылбуръёстылэсь, басняостылэсь лыдзэс?

— Басняосы ог 500 котыр луизы ни, вылды, нош кылбуръёсыя учёт воксё уг нуиськы. Мылкыд бугырске, чуръёс кисьтӥсько — мын но лыдъя на соосты!

— Тодады возиськоды на-а нырысетӥ кылбур пӧрамдэс?

— Школаын дышетскон вакытам удмурт кыл нырысетӥ интыын вал, солы сомында саклык висъяськиз — туала вакытэн уд ӵошаты! Удмурт кыллы дышетӥсьмы Гавриил Георгиевич Елмашев ас котыраз люказ гожъяськыны йӧндырисьёсты. Пӧлазы вал мон но. Со вакытэ мон туж синмаськемын вал бускель гуртысь нылашлы. Улэме уг луы вал ни сотэк. Та мылкыды ик кисьтӥськиз нырысетӥ кылбурам.

— Серемес веранъёсыныды мылкыдэз син куспын ӝутыны быгатӥськоды. Кинлэсь пыӵаз таӵе быгатонлык?

— Нэнӥе туж мактаськись вал — солэсь пыӵаз, дыр. Папаме рос-прос тодыса ӧй вутты. Мон ай вордӥськыны вуттӥськымтэ, со Быдӟым оже кошкем ни. Доре вуиз со 1947-тӥ арын, секыт сӧсырмыса. Тазалыкез лябӟемын, сиськыны но мырдэм сиське — кыӵе мактаськон луоз на. Бертэмез бере 3 ар гинэ улыны чидаз на.

Война вакытэ улон ӟечгес вал, нянь но шедьылӥз. Ёрмон, сютэм улон кутскиз ож йылпумъяськем бере — соку кӧтэз тыроно луиз пыдул сиёнэн: беризь куарен, сьӧдпотэн, сисьмем картошкаен. Пичи дырысен ик воргорон уж борды басьтӥськоно луиз. Ува ёросысь Удугучинысь школаез йылпумъяса, механизатор луыны малпасько вал, но мон кадьёс лачак вылӥллям ни. Озьы мон армие кошки, собере Ижысь заводъёсын электросварщикын ужай. Отын 15 ар тырши но Удмурт пединститутысь филология факультетэ пыроно кариськи — удмурт кыл борды кыстӥськонэ сомында ар куспын ышымтэ-бырымтэ.

Студент вакытам ик сюрес лёги «Советской Удмуртия» газетэ: нырысь тырши собкор луыса, собере «Шӧкыч» бамез дасяны оскизы. Озьы мон «шӧкычъяськи» 25 ар пала. Со дырысь тодам кылиз быдэс толэзь ӵоже Москваын дышетскеме — сатирая но юморъя «Крокодил» журнал кичӧлтэмъя отчы люкаськизы быдэс Совето Союзысь фельетонистъёс. Визьнодаз милемыз со вакытысь туж тодмо фельетонист Александр Моралевич.

«Шӧкычлэн» пайдаез бадӟым вал — фельетонъёс, сатира пыр шараяллямы улонысь шекъёсты. Судэ сётъян учыръёс, «антисоветщина» шуыса кышкатъянъёс но вал. Мар ватонэз: фельетонъёс гожъяме понна монэ кинъёс ке огпол тышказы но — шедиз, пе, татын моралист. Олокыӵе но учыръёс вал, но со вакытэ редакциын ужаме тодам кылиз ӟеч коллективен, чебер нылъёсын. Уродзэ малы тодэ ваёнэз, озьы ук?

— Нылъёс вылэ вуим бере, юан сётытэк, уг чидаськы: уноез кылбуръёсты сӥземын пӧртэм нимъёсын нылкышноослы, ваньмыз сямен соос кырӟанъёслы пӧрмемын ни. Та нимъёс инмысь басьтэмын ӧвӧл, дыр, ук?

— Сюлэм пыр поттытэк, кызьы кылбур пӧрмытод?! Котькудӥз улонысьтым адями: басьтом тани Лиза нимез — син азям соку ик пуксе егит дыръям тодматскем Лиза нимо удмурт нылаш. Со сокем веськрес вал — вӧзтӥз ортчисьёс синзэс вошъятэк учкылӥзы. Озьы мынам синмаськонэ кылбуре кисьтӥськиз. Котькуд нимъя таӵе учыръёсты тодам вайыны быгато.

— Та нуналъёсы «Удмуртия» издательствоын потӥз «Туйву куарен мон усьыло» выль бичетты.

— Вылез кылбур бичетэ кык люкетлэсь: удмурт но ӟуч кылбуръёслэсь. Ӟуче берыктӥз кылбурчи Зоя Кононова. Тау солы. Куинетӥ бичетэлы но ужъёсме — сонет тугокоосме, кылбуръёсме — дасяй ни. Серемес веросъёсме, сценкаосме но нимаз поттысал на кадь…

Елена Тугашова

Фёдор Суворов

Март

Пыэктэмын на писпуос,
Тӧла, жоба на куддыръя.
Пурысьтало шуръёс, тыос,
Пеле пыре ӵана куара.

Пельто ини тулыс тӧлъёс,
Пилемъёсты ӵуже шунды.
Кыре пото шунды сиос,
Чиль-дол пиштэ южмам лымы.

Тулыс нунал сюдэ арез —
Кизись чакла бусыосты.
Гонӟыртыкуз тӧри валэз
Уг гуштыл на сюрес вылтӥ.

Йыркуръяське ӵукна кезьыт,
Чепыльскылэ на бамъёсы.
Нош март вуиз, нырысь шуныт
Вайиз мӧзмем сюлэмъёсы.

Ӟольгыриос но ӟабыльто,
Палэнтӥ ортчиз бырон.
Выль тулысэз ваньмыз витё,
Пушъе, ӝужа нош ик улон.

Куке уд учкиськы шорам
Куке уд учкиськы шорам,
Йыромисько мон улонын.
Ваньмыз луэ соку арам,
Ӝомыт луэ сюрес вылын.

Куке уд учкиськы шорам,
Вож арама но чусоме.
Кайгу пыре соку сюлмам,
Сӥя тыныд вань осконэ.

Куке уд учкиськы шорам,
Дунне вылын вуёмисько.
Вожан сильтӧл
ӝутске сюлмам,
Гужем шорын
мон кынмисько.

Куке уд учкиськы шорам,
Калык пӧлын но
мон огнам.
Улон тонэн гинэ югыт,
Мон бурмемын, дыр,
тонэныд?

Куке уд учкиськы шорам,
Куке уд вазиськы шорам,
Куке вӧзам ӧвӧл ке тон,
Малы мыным сыӵе улон?

Пумиськон

Чалмыт, зӥбыт мон улӥсько,

Кулэ ӧй вал ини зарни.
Пумен троссэ вунэтӥсько,
Малы адӟи тонэ, Мани.

Шуак потӥд тон син азям
Кӧсэктыса, ӵыжектыса.
Кенжиз мынам но сюлэмам
Соку тылпу, юн тэляса.

Азьло сямен ик учкиськод
Шорам мусо синъёсыныд.
Азьло сямен ик чупаськод,
«Мӧзми, мӧзми», — шыпыртӥськод.
Вождэ эн вай мыным, Мани.

Улон бугор тугаськемен,
Вунэтӥськем, лэся, тонэ.
Нош ма карод та сюлэмен?

Палэс кылем яратонмес
Тырмытыны, дыр, дыртыса,
Я, чупа, чупа ӟырдытгес,
Кӧтӝожъёстэ веськатыса.

 

 

Удмурт Дунне
By Удмурт Дунне 31 марта, 2015 12:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<