Сермет одӥг киын луоз

Удмурт Дунне
By Удмурт Дунне 27 марта, 2015 09:58
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

И1нтыысь аскивалтонын воштӥськонъёс

Кун Кенешысь депутатъёс люкаськылӥзы 16-тӥ сессиязы. 20 пала ужпумъёсты сэрттӥзы-пертчизы.

Гуртоослы оскон

Сессилэн ужаз пыриськиз Удмуртилэн Тӧроез Александр Соловьёв. Правительстволэн кылем арын ужамезлы йылпумъянъёс лэсьтӥз. Веранзэ мытыкуз ик, пусйиз:
— Валтӥсь интыын калыклэн ужпумъёсыз вал, быгатӥмы кылзыны но кылыны элькунамы улӥсьёсты, тыршимы сётэм кылмес быдэстыны.

Улон-вылонлэн ӟечлыкез сярысь вераку, котьку но валтӥсь интые пукто демографиын югдурез. Асьмелэн со кылем арын пусйымон вал: нуныослэн вордскемзыя Приволжск федерал округын 4-тӥ интыын. Росстат ивортэмъя, элькунамы улӥсьёслэн лыдзы 422 муртлы йылӥз но оглом 1 миллион 517 сюрс 472 кузя луиз. 2 поллы кулэсмиз республикаысьтымы палэнэ улыны кошкисьёслэн лыдзы. Азьланьын но, пе, сюлмаськоно, егитъёсмы палэнэ медаз учкылэ шуыса. Со понна дорамы улыны но ужаны ӟеч условиос кылдытоно.

Вылӥ кивалтӥсь аслаз вераназ ваньмызлы сямен удысъёслы нимысьтыз саклык висъяз. Котькудаз сямен ик азинсконъёс вал. Но экономикаын югдур секыт луэмен, огзылы но каньылак шокчыны маза уз луы. Куд-ог удысъёслы али коньдон висъяське чакламлэсь 75 процентэз гинэ. Но номыр шоры учкытэк, коньдон уг кулэстӥськы гурт удыслы.

— Али котькуд скаллэсь шорлыдын 5 сюрс килограмм йӧл поттӥськом ни, — пусйиз А. Соловьёв. — Россиын 4-тӥ интыын луиськом. Но азьланьын гуртоослы уката бадӟымесь осконъёсмы: 2020-тӥ арозь 1 миллион тонна йӧл поттыны кулэ ни, кылем арын 749 сюрс тонна люкаськиз. Тросгес йӧл кыскон понна йылэтоно пудо йырез, туала куронъёслы тупась фермаос пуктоно.

Палэнысь вуись вузъёсты воштоно асьме дорын поттэмъёсыныз — туала вакытлэн со валтӥсь ужпумез. Сиён-юон сярысь гинэ вераськон уг мыны, промышленностьлы но та сярысь сюлмаськоно.
Юалляськонъёс возьмато: кылем арын шаерамы улӥсьёслы уг кельшы вал сюресъёслэн уродзы. Туэ соос та ужпумез сюлмаськытэмезъя 5-тӥ интые пукто ни. Оглом ог 300 иськем сюресъёс волятэмын вал, ог 4 миллиард манет пала кошкиз. Сюрес фондлэн кисыез туэлы но сомындагес ик.

Сюлмаськытэ кун долглэн йылэмез. Жаляса верано, кылем арын со эшшо 9 миллиард манетлы тросгес луиз но оглом 38 миллиард манетозь вуиз. Мувӧйлэн дуныз усемен, элькун казнае 3 миллиард манетлы ӧжытгес коньдон вуиз. Али но коньдон тросгес быдтӥськом, сое казнае пыртон сярысь.

Быръёнъёслы выль радлык

Табере городын но ёросъёсын кивалтон сермет одӥг адями киын луоз. Депутатъёс огкылысь сямен ӵектӥзы: администрацилэн нимысьтыз кивалтӥсез луыны кулэ ӧвӧл. 2
Нош городлы, ёрослы йырез быръёно, азьло сямен ик, депутатъёс пӧлысь.

Депутат А. Осколков ӵек-тонэн потӥз ик вал, городъёслы йырез калык мед быръёз шуыса. Но депутатъёс та малпанлы дур ӧз басьтэ.

— Малпасько, йырез депутатъёс пӧлысь ик быръёно, — шуиз Удмуртилэн Тӧроез А. Соловьёв. — Угось депутатъёс понна куаразэ сётэ ни калык, соослы оскемзэ вера. Ужпум эшшо мукетыз бордын но. Жаляса верано, луыло учыръёс, куд-ог главаослы оскемысь дугдоно. Но калык бырйыку, сыӵе кивалтӥсьёсты интыысьтызы поттыны туж секыт — та понна нош ик калыклэсь мылкыдзэ юано, бырйисьёс пӧлысь ӧжытсэ 50 процентэз солы пумит луэмзэ вераны кулэ. Нош йырез депутатъёс пӧлысь ик бырйиськод ке, депутатъёс ас куспазы гинэ солы дурбасьтэмзэс яке пумит луэмзэс вераны быгатозы.

Огкутскемен депутатъёс быръёнъёсты ортчытонэн герӟаськем законэ куд-ог воштонъёс но ватсанъёс пыртӥзы — федерал законъя тупатӥзы. Озьы депутатэ кандидатъёслэн фондзы 1 миллион манетозь йылэтэмын. Кандидатлы регистрация пыр ортчон понна бырйисьёс пӧлысь 0,5 процентэзлэсь кинюртэмъёссэс люкано, татчыозь 2 процентэзлэсь кулэ вал.

Но депутатэ кандидатэ пусйиськон понна ваньзы ик кинюртэмъёс люкано уз луэ. Табере законэн юнматэмын, кинъёс солэсь мозмытэмын луозы. Нырысь ик — куд-ог партиослэсь ӵектӥськись кандидатъёс. Удмуртиын сыџе партиос — 6.

Эшшо: быръёнъя бюллетеньёсы пыртэмын уз луы «Ваньмызлы пумит» чур.

— Элькунамы 69 партия пусъемын, — шуиз Кун Кенешлэн Тӧроез В. Невоструев. — Озьы шаерамы котькуд улӥсь бырйыны быгатэ, кудӥз таос пӧлысь солы матынгес. Соин ик бюллетеньысь «ваньмызлы пумит» чурлэсь кулэлыксэ уг адӟиськы.

Таин соглаш луизы данакез депутатъёс.

Элина Кумачёва

Удмурт Дунне
By Удмурт Дунне 27 марта, 2015 09:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<