Удмуртиысь МЧС кылем арын ужамезлы йылпумъянъёс лэсьтӥз

Удмурт Дунне
By Удмурт Дунне 25 марта, 2015 13:03
мчс

Туэ 2 бадӟым тылпу — Ижысь мебель лэсьтонъя цехын но пуктӥськись «Италмас» вуз каронъя центрын.

Кылем арын ужамзылы йылпумъян лэсьтӥз Россиысь МЧС-лэн Удмурт Республикая Валтӥсь управлениеныз кивалтӥсь Пётр Фомин.

2014-тӥ ар ӵоже шаерамы кышкыт учыръёс пусъемын ӧй вал ке но, 2 бадӟым тылпу потаз ик: Ижысь мебель лэсьтонъя цехын но пуктӥськись «Италмас» вуз каронъя центрын. Умой, адямиос бырыны ӧз шеде. Таӵе кылъёсын веранзэ мытӥз Пётр Фомин. Ог 5 ар талэсь азьло шаермы данэ потӥз пилоттэк лобась аппаратъёсын. Табере соосты быдэс Россиын уже куто ни. Удмуртиысь спасательёс нош ик азьпала вамыштӥзы. Таяз учыре — тылпу кысон роботъёсын. Адямилэн улонэзлы кышкытлык вань ке, роботъёс пыро.

Алигес бадӟым тылпу гомаз Казаньысь вуз карон центрын, 17 мурт быриз. Сыӵе учыръёс медаз пумиськылэ шуыса, матысь дыре Удмуртиысь бадӟымесь вуз карон центръёсын дышетскон радъялозы. Кызьы пусйиз тылпуэз алонъя валтӥсь инспектор Павел Чукавин, вуз карисьёс мед быгатозы калыклы дыраз но шонер юрттэт сётыны. Нырысь ик эскеремын луозы 1,5 сюрсысен 3 сюрс квадрат метрозь вуз карон юртъёс, шаерамы соос 100 пала лыдъясько.

Та вакытэ шаерысьтымы спасательёслэн валтӥсь ужзы — тулыс тудвулы дасяськон. Кылем арын сямен ик, шаерысьтымы бадӟым шуръёс вылын пуштытъян ортчытэмын луоз. Шуръёсты чакласа возёзы 9 стационарной но 5 огдырлы кылдытэм гидропостъёс, вылласянь югдурез эскероз 4 беспилотник, кулэ дыръя уже потозы вертолёт но самолёт.

Туннэ нуналлы шаерамы 219 гидравлической сооружениос, 88-эз выльдэм-тупатъямез кулэ каре. Со сяна, вань на кузётэм 23 ӵыпетъёс, ваньмыз соос юнматэмын луозы муниципал кылдытэтъёс борды. Тудву дыръя шуг-секытъёс медаз пумиське шуыса, Балезино, Вавож, Алнаш, Шаркан, Юкаменск, Яр но Якшур-Бӧдья ёросъёсын нимысьтыз дышетсконъёс ортчизы.

Тудвуэз пумитаны дасясько чугун сюрес вылын ужасьёс но. Агрыз, Иж, Эгра, Ува, Сарапул, Чернушки но Красноуфимск станциосын нимысьтыз поездъёс луозы. Вагонъёсазы инструментъёс, платформаос, щебень, песок, пу — ваньмыз чакламын чугун сюресэз ӝегатскытэк тупатонлы. Чугун сюрес котрырысь 16 ӵыпет эскеремын. Шараям шекъёс тупатэмын.

Валентина Емельянова

Туспуктэмез Александр Горбуновлэн

Удмурт Дунне
By Удмурт Дунне 25 марта, 2015 13:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<