Сяська пӧлын эксэй — тӧдьыгырлы

Удмурт Дунне
By Удмурт Дунне Март 25, 2015 08:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

ChaikovskiiКрезьгурчи луыны быгатысал кылбурчи 

Пётр Чайковский котьку тунсыкъяськиз литератураен но. Трос лыдӟиськыны яратэм сяна, со выриз ачиз но гожъяськыны.

Пичи дыръяз ай со гожтӥз кӧня ке кылбур, тунсыко пӧрмылӥзы сочинениосыз. Нырысетӥ дышетӥсез Ф. Дюрбах Петяез «пичи Пушкин» шуылэм. Правоведениея училищеын дышетскыкуз, Пётр Чайковский печатласькиз татысь литературной журналын.

Консерваториын ӵош дышетскем эшез, ӟуч критик Г. Ларош тодаз вайылӥз: Чайковскийлэн улоназ литература туж бадӟым инты басьтылӥз, музыка бере со вал одӥгез валтӥсез тунсыкъяськонэз. Малпасько, Чайковский вордӥськемын вал литератор луыса… Аккордъёс, ритмъёс пӧлын будэм адями куд-ог писательёслэсь яркытгес, чылкытгес но валамонгес гожъяськылӥз.

Ларош пусйылӥз, проза сяна, Чайковский ачиз гожъяз романсъёсызлы, операосызлы текстъёс, кылбуръёс. Тужгес тодмоез соос пӧлысь — «Ландышъёс». Та текстъя А. Аренский композитор романс но гожтӥз. Эшъёсыз дунъяллязы солэсь лэчыт кыло серемес кылбуръёссэ. Кылсярысь, И. Клименко тодаз вайылӥз: «Петя экспромтъя бадӟым мастер вал». Со туж яратӥз маскаръяськыны, котькуд учыръя кытӥ-мар тунсыко чуръёс кылдытъяз. Но ачиз Чайковский соосты кылбурен ӧз лыдъялля, лыдӟылӥз, ваньмыныз ӵош серекъялляз но вунэтылӥз. Со чуръёс кылизы эшъёсызлы гожтэтъёсын гинэ.

Кылбуръёсыз Чайковскийлэн трос ӧвӧл. Но соос туж тунсыкоесь. Кылсярысь, «Пиковая дама» операысь Елецкийлэн ариезлэн текстэз, Германлэн «Что наша жизнь» ариозоез, «Простые слова» романслэн кылъёсыз… Но тросэзлы тодмогес «Соловушко» но «Ландыши» кылбуръёсыз. «Соловушко» — хорлы текст, со гожтэмын ӟуч кырӟан сямен. Пуштросэзъя — со кыдёке, мукет шаере лобись Уӵылэн люкиськон кылыз.

Нош «Ландыши» кылбураз Чайковский кисьтэ аслэсьтыз та сяськалы синмаськемзэ. Ландышъёсты со «сяськаослэн эксэенызы» лыдъялляз. Пичи дыръяз со туж возьма вылэм соослэсь сяськаямзэс, возьмаса пукылэм, ку ландыш улэ гномъёс вуозы но пичи тӧдьы гырлыен жингыртыны кутскозы. Клин городэ улыны выжемзы бере Петя та сяськаосты садазы будэтӥз. Огпол Италиысен со Модест братэзлы гожтӥз: «…Мон тодам вайи, кызьы ми ваньмы ӵош тулыс тэле ветлӥм, ландыш бичам. Мон туж данъяськисько та кылбуреным. Улытозям нырысьсэ мыным удалтӥз кадь ӟеч кылбур гожтыны, вылаз ик, татын шӧдӥське мылкыд… Мон ужай со бордын крезьгур бордын кадь ик — вань сюлмысьтым». Братэз та кылбурез печатланы ӵектӥз вал, но Пётр пумит луиз.

Кылбур шараяськиз ни композитор улонысь кошкем бере солэн архивысьтыз, сое печатлаз «Русский вестник» 1894-тӥ арын.

Пётр Чайковский

Ландышъёс

…Мон возьмасько
тулысэз. Тани вуиз со.
Тэль шобретсэ сэрпалтӥз
но возьма асьмеды.
Шуръёс вырӟизы,
арама сайкиськиз нош,
Та нуналэз ми
кема возьмамы.
Ӝоггес тэле! Мон
бызисько тодмо сюрес кузя.
Шат зэм но
уйвӧтъёс быдэсмизы?
Ишкалтӥсько, музъем
дорозь мыкырскыса,
Выжыкылысь
выллем сяськаосты.
О, ландыш!
Маиныд гочатӥськод?
Кӧня яркыт, чебер
сяська дунне вылын…
Но тон кадь ненегзэ
кытысь шедьтод,
Ӧвӧл мусоезгес
соос пӧлын.
1878-тӥ ар

Уӵы
Лобӟылӥз уӵы
туж кыдёке,
Кыдёке, шуныт
шаеръёсы.
Лобӟылӥз уӵы
туж кыдёке,
Кыдёке, шуныт
шаеръёсы.

Ӟеч луэ кема дырлы,
эшъёс,
Мыным дыр вуиз ни
лобӟыны.
Кемалы люкиськиськомы
асьмеос,
Мыным дыр
вуиз ни лобӟыны.

Тау тӥлед
яратэмды понна,
Бурдоез ӧд уллялэ шуса.
Кырӟаны ӧд люкетэ
мыным,
Уӵыпиосме ӧд каре вӧсь.

Улысал мон ялан
бордады,
Но укыр кезьыт
татын толъёс.
Малы ке уг кельшы
тӧдь лымы,
Сӥсъяло тылыосме
тӧлъёс.

Нош куке выльысь
вуоз тулыс,
Соин ӵош мон
кырӟаса вуо,
Дорады
выль кырӟанэн вуо.

Берыктӥз
Зинаида Рябинина

Удмурт Дунне
By Удмурт Дунне Март 25, 2015 08:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<