Амалтэк лушкаськись

Удмурт Дунне
By Удмурт Дунне 25 марта, 2015 08:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

19-тӥ даурысь мансиослэн улэм-вылэмзы сярысь «Путешествие в страну вогулов» книгаысь оглюкет

Милям паулямы (гуртамы) улӥз туж куанер вогул Степан — Тимофейлэн (кин дӥньын ми улӥмы) ӵыжы-выжыез. Степан — жум, вераськисьтэм, шып воргорон. Курадӟе возьыт висёнэн — сифилисэн. Жаляса верано, та чер туж зол вӧлмемын уйпалась калыкъёс пӧлын. Паульын улӥсьёс палэнтӥ ортчылӥзы Степанэз, Степан но пӧлазы ӧз кариськылы.
Соин ик сютэм улон ӵем вуттылӥз сое ми дӥне. Со яратӥз калачъёсмес. Соосты пыжылӥмы сьӧрамы ваем тӧдьы пызьлэсь. Вогулъёс музъем ужен уг выро, соин узыръёссы гинэ но нянь уг адӟыло.
Ӧсэз усьтыса но мудоръёс шоры кирос поныса, Степан ӧс кусыплэсь пыдло пырыны ӧз дӥсьтылы. Кисыысьтыз чильымзэ (трубка) поттоз но, тамак интые, отчы кыӵе ке турын туйнаса, пуркеттыса сылоз.
— Кыӵе ужъёсыд, Степан?
— Урод, однако, — лапак одӥг кадь вазьылӥз со. — Сиён ӧвӧл.
— Чорыг уг зыгаты шат?
— Воксё уг.
Сётэм няньмес басьтыса, Степан, пал кыл но поттылытэк, тау шуыны вунэтыса, кошкылӥз.
Корка кузёосмы Степан шоры лекъяськылӥзы, со лушкаськисез ӧс куспады но эн лэзе, шуылӥзы. Вогулъёс понна вораськонлэсь бадӟым сьӧлык ӧвӧл ни. Ӧсъёссэс соос уг ӵогалляло, тунгон сярысь уг ик тодо. Вием пӧйшурезлэсь кузэ я эшшо маке дунозэ тайгае кельтоно луэ ке, вогул матысь писпуэ тамгазэ (пуссэ) коралтыса кельтэ. Со тодэ: арберизэ нокин уз йӧтылы. Сиён-юонэн лабазъёслэн ӧсъёссы лачак пытсамын пӧйшуръёслэсь гинэ. Котькудӥз вогул, туж кулэ луэ ке, мурт кеносэ пырыны но, кузёезлэсь юатэк, сиён сьӧраз нуыны быгатэ. Но басьтэмдэ бӧрысь одно ик берыктонӧ сютэм улон вакытъёсыз котькудӥзлэн луыло.
Но Степанлы мурт кеносъёсы сюрес пытсамын ни. Малы ке шуоно, висеменыз сэрен ваньмыныз ӵош пӧйшураны но куасэн кыдёке ветлыны уг ке но быгаты, пыд йылаз возиське ук, валесын уг кылльы. Вогулъёс малпамъя, пӧйшураны но чорыганы солы люкетэ азьтэмъяськемез. Гуртоосыз со понна казнае ясак (выт) тыроно луо — йыркуръяськыны туж бадӟым муг. Гужем быдэс гуртэн кутэм чорыгзэс вогулъёс люкыло адямилы быдэ, но Степанлы пайзэ сётъямысь кемалась дугдӥзы ни.
Степан улӥз пичи пу коркан, пыд улэ пулъёс валемын ӧвӧл — сюй, кык пичи косякъёсы, пияла интые, золтэмын пужейлэн кӧтул куэз, соин коркан лапак ӝомо-югдо. Огаз сэргын сылэ чувал (гур выллем), со пушкы пуктэмын сиён пӧзьтон пурты. Ӝӧк интыын — кык паськыт пул, пуконъёс — зӧк писпу дӥньёс. Борддор кузя сыло ӟусъёс. Мукет вогулъёслэн сямен дӥськут возён шыкысэз, сиён-юон возён кеносэз ӧвӧл, малы ке шуоно возьыны номыре. Корказез но ӧвӧл — корка ӧс усьтӥське пырак тайгае.
Корка бордын, кион гу котырын сямен, кыстасько йыръем лыос. Степан ӵемысь воралляз пуныослы куштэм лыосты. Соосты пуртыяз пӧзьтылӥз но сюдылӥз кык пиналъёссэ, 7 аресъем пизэ но 5 аресъем нылзэ.
Ӟырт кезьытэн но пиналъёсызлы шуныт дӥсь ӧз шедьылы. Ветлӥзы кесяськем дэремъёсын — Степанлэн кышноез ӧй вал.
Пиез — чупырес, визьмо. Корка кузёмы дӥньысь — Тимофейлэн коркаысьтыз — ӧз ик кошкылы: выж ӵужиз, ву вайылӥз, пу пыртылӥз. Пичи аресыз шоры учкытэк, вань ужез усьтыр-табыр быдэсъяз. Со понна Тимофейлэн семьяез пияшез сюдыса возиз.

 

Мансиослэн лабаззы. 20-ти даурлэн кутсконэз.

Мансиослэн лабаззы. 20-тӥ даурлэн кутсконэз.

Огпол Степан кураськыны нылыныз потэм, вуизы дӥнямы. Нылыз пичи, висись, кӧтыз мугорызлэсь бадӟым, пыдъёсыз чаг кадь векчиесь, сьӧд синъёсыз бадӟым муртлэн сямен мыр-мыр учко. Пельпумаз ошисько дэремезлэн кылем-мылем юдэсъёсыз, кӧтыз но пыдъёсыз гольыкесь. Лымы вылтӥ со лыктэм гольык пыд. Ми сётӥмы вуж дэрем. Адӟе вал, кыӵе шумпотӥз мискинь пинал! Ӟуч сямен со уг вала, но куке со валаз, дӥськутсэ берен нокин басьтыны уг малпа шуыса, пичильток азьло кӧдэктӥз, собыдӟа шудлэсь кышкаса сямен, собере корка шоры султӥз но мудор шоры вӧсяськыны кутскиз, улонэз адӟем кышномурт сямен маке ас понназ сипыртыса. Кин дышетэм сое вӧсяськыны? Угось Степан, данакез вогулъёс сямен ик, христианин ассэ шуэ ке но, зэмзэ ке оскись адями ӧй вал.
Огпол ми тодӥмы, Тимофейлэн семьяез пичи пиез уллям шуыса. Пияшлэн, пе, ӝӧк сьӧрысь потыкуз, дэремез урдӥськемын вал.
— Ма тынад кисыяд? — юам вогул кышно.
Пияш кышканъяз бакомем.
— Возьматы, ма понӥд!
Пинал пегӟыса вуттымтэ, сое кутӥллям но дэрем улысьтыз кӧня ке юдэс нянь но сӥль поттӥллям. Кӧня курем пияш, медаз жуге шуыса, сиёнзэ со сузэрезлы нуыны малпа вал, табере ноку но одӥг пыры но уз басьты ни шуыса сюлворем. Сое кылӥсь ӧйлась. Бубиз лушкаськись, пиез но сыӵе ик, шуиз Тимофей.
Табере сютэм Степанлы кык пиналэз кызьы ке сюдоно. Тулыс вуэмъя пужейёсты но койыкъёсты кутылыны ӧз луы ни. Вогулъёслэн сӥльзы быриз. Чорыг уг зыгаты.
Пичи пиез уллямез бере Тимофейлэн мурдоысьтыз чорыг ышылыны кутскиз. Тимофей малпалляз Степан вылэ, солы сяна, кинлы со чорыг кулэ, пе. Огпол, Степан дӥне витьымтэ шорысь пырыса, адӟиз вогуллэсь куинь чипей пӧзьтэмзэ — ӵапак чипейёс ышизы вал та ӵукна Тимофейлэн мурдоысьтыз. Но Степан вань манси инмаръёслэн нимынызы сеськиз, ачиз соосты кутӥз шуыса.
Чорыг ышемысь ӧз дугды, соин валче Тимофей кылзэ сётӥз лушкаськисез кутыны. Вогулъёс кӧлыны, азьтэмъяськыны ярато ке но, Тимофей кӧня ке уй ӵоже бускельзэ чаклаз. Вераны кулэ: тапалан тулыс уйёс асьмелэн кадесь ӧвӧл — шунды инвис сьӧры быдэсак ноку уг пуксьылы. Соин ик уйшоре но нуназе кадь югыт. Вот огаз сыӵе уе Тимофей адӟиз, кызьы Степан пыже пуксиз но ты кузя шур пала тубиз — ӵапак отын Тимофейлэн мурдоосыз понэмын. Шур дуре пыдын но вуыны луэ шуыса, Тимофей чорыган интыяз бызьыса кошкиз. Вуиз но — Степан, пыжаз сылыса, мурдоысь чорыгъёсты сакен поттылэ. Тимофей писпуос сьӧртӥ ватскыса лыктӥз но, ярдурысен лушкаськисез кутэмез уг луы бере, лек кеськиӟ
— Инмар мед юрттоз, Степан Захарыч!
куалектэменыз Степан ӧжыт вуэ ӧз усьы. Кышкамез ортчыса, мукет ярдуре вань кужмысьтыз полысаз.
— Уд пегӟы, — ныр улаз нукыртӥз Тимофей. — Гуртад берытскод ай. Мон тыныд возьмато…
Пауле вуыса, Тимофей гуртоосызлы ивортӥз, кин лушка соослэсь но чорыгзэс. Лекомем вогулъёс огъя малпанэ вуизы: синазькыль Степанэз дышетоно. Быдэс гуртэн мынӥзы дӥняз — кесяны дасесь, но коркась нокинэ ӧз шедьтэ, пуны гинэ но кытчы ке пырем. Пыж но ярдурын ӧвӧл. Озьыен, пиналъёссэ кутыса, Степан кытчы ке пегӟем. Но кытчы? Вогулъёс абдразы: тайга бадӟым, ӟеч пӧйшурась сютэм уз кулы, но катьтэм Степан пиналъёссэ сюдыны уз вормы ук.
— Кытчы пыроз — берытскоз! Сиемез потоз! Уйлы вуоз, — малпазы вогулъёс.
Но Степан, нунал ортчыса но, ӧз берытскы. Ортчиз эшшо куинь нунал. Вогулъёс сюлмаськыны кутскизы. Со лушкаськисьёс тайгаын чатрасалзы ке, ӵок, вылды, синвузэ нокин ӧй кисьтысал. Но палэнысь адямиос тодӥзы ке, нылпиосын воргорон ышиз шуыса, юалляськыны, супыльтыны кутскозы. Кытчы кошкизы, ум тодӥське, шуид ке, уз оске. Вераськонъёс заседатель дӥнёзь вуозы. Утчаны но улэпен яке кулэмен вайыны косозы. Кӧня ке ар талэсь азьло, тодӥськоды на-а, Пачерахпаульысь Фёдорлэн вармумиз выйиз вал. Заседатель шӧез ватыны ӧз лэзьы, азьло лекарь мед учкоз шуыса. Со лекарьзы кык ар лыктыны выриз. Отчыозь Фёдор лысьӧмъёсты ватытэк возиз. Кисызэ бушатӥзы мискиньлэсь, озьы Фёдорлэн узырлыкез олокытчы шупчиз. Табере милемын но озьы ик луоз! Шайтан косӥз та Тимофеез Степанэз сокем зол кышкатыны. Ну басьтӥз кӧня ке чорыг, солэсь гинэ кин куанермем ини. Степанлэн но пиналъёсыз вань, сиемзы тожо потэ.
Озьы куспазы верасько вогулъёс, Тимофей но пумен янгышсэ шӧдэ ини.
Вить нунал ортчыса, Тимофей капканъёссэ учкыны потӥз гинэ, музъем улысь сямен азяз кылдӥз эшшо но восьмем, кӧдэктэм Степан но пыд азяз уськытскиӟ
— Вождэ эн вай, Тимофей, уг ни вораськы!
— Ма, Степан Захарыч, лэся, ук! Кытысь вуид? — шумпотӥз Тимофей.
— Табере уг ни… — нукыртэ Степан.
— Ма карод ни тонэныд! Ярам, ярам…
Степанлэн берытскемезлы быдэс гурт шумпотӥз. Нылкышноос сютэм пиналъёслы салам вайизы кин мае быгатэ. Сиёнзы быдэс толэзьлы окмымон люкаськиз. Но азьланяз Степан медаз ни лушкаськы шуыса, вогулъёс кенешизы воргоронэз кылзэ сётытыны чипей ныр азьын. Огпол ӵукна ярдуре, Степанлэн вораськон интыезлы матэгес, тылскем котыре пӧйшурасьёс люкаськизы. Тыл дуре пуктӥзы пулэсь вӧлэм Сянгапупи инмарзэс. Со азе понӥзы али гинэ кутэм улэп чипеез но тӥр.
— Ну, Степан, матэ кариськы! — чортӥз туно кариськем Тимофей.
Степан, адями тусо пу шоры оскытэкгес учкылыса, матэктӥз но тӥр кутӥз. Шоналскиз но чипейлэсь нырзэ коралтӥз. Тимофей чорыгез кырылӥз, пушсэ поттӥз но соин Сянгапупилэсь ымдурзэ зыраз. Чипей нырез тылэ куштӥз, чорыглэсь кылем-мылемзэ вуэ сэрпалтӥз.
— Табере сётэм кылыд зэмалоз, — шуиз Тимофей.
— Пиме берлань басьты, иське, — куриз Степан, Тимофейлэсь лякыт мылкыдзэ шӧдыса.
— Ма карод тонэныд? Мед лыктоз.
Вогулъёслэн осконзыя, чипей ныр азьын сётэм кылдэ ӧд быдэсты ке, улытозяд чорыг уд куты ни.
Ортчиз кӧня ке арня. Нош ик ӧс куспамы, чильым кыскыса, пуке Степан.
— Кыӵе ужъёсыд, Степан?
— Урод, однако. Сиыны номыре. Чорыг воксё уг шедьы.
— Чипей ныр азьын сётэм кылдэ вунэтӥд, дыр?
— Малы вунэти? ӧй, — синъёссэ лэзиз Степан.
— Соку малы уг шедьы?
— Кин сое тодэ…
Ми эшеным ма вазьыны ӧм тодэ ни. Кӧттыр дыръя капчи дышетэмъяськыны, ӟеч но урод сямъёс сярысь вераськыны. Сютэм муртлэн улонэз солэсь пичи но уз капчия…

Берыктӥз Ольга ВАХИТОВА

Удмурт Дунне
By Удмурт Дунне 25 марта, 2015 08:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<