Ми вань

Удмурт Дунне
By Удмурт Дунне 25 марта, 2015 07:59
Юван Шесталов 80-ти аръёсы.

Юван Шесталов 80-ти аръёсы.

Шаманъёс бордысен кылдэм литература

Уйпалась данакезлэн калыкъёслэн сямен ик, мансиослэн письменностьсы кылдӥз 1930-тӥ аръёсы: 1932-тӥ арын потӥз нырысетӥез букварь. Нырысетӥ литературной произведениос вордскизы фольклор бордысь. Туалаосыз но пушъё мансиослэн улон шоры аспӧртэмлыко учкемзы вылын.

Вахрушева — нырысетӥосыз пӧлын

Мансиослэн фольклорзы туж узыр. Шаманъёслэсь инмаръёслы вазиськонъёссэс-куриськонъёссэс ик басьтоно ке, котькудӥз шаман малпалляз соосты ачиз котькуд учырлы нимаз. Мадьёс, выжыкылъёс инъет луизы чеберлыко произведениосты кылдытонлы.

Манси литература кутскиз 2-3 нимъёс бордысен. 1940-тӥ арын Пантелеймон Чейметов (1913-1947) гожтӥз «Кык пӧйшурасьёс» повесть, Матрёна Вахрушева (1918-2000) — кылбуръёс, кудъёсыз печатласькизы «Хантыйская и мансийская поэзия» бичетын. Валамон, мансиослэн профессиональной писательёссы соку ӧй вал ай. П. Чейметов, кылсярысь, колхозын ужаз, гожъяз сое, мае ӟеч тодӥз но мае куриз вакыт: повестяз манси песятай эшъяське ӟуч колхозникен но вала, советской власть пичи адямиез адӟе, со сярысь сюлмаське шуыса.

М. Вахрушева но вордскиз огшоры крестьян семьяын, дышетскиз Остяко-Вогульскысь (Ханты-Мансийскысь) педучилищеын, Ленинградысь университетын. Кылбуръёсыз вордскизы фольклорысь, пуштроссыя но, туссыя но соос матын калык визьлы, дунне шоры учконлы. 1949-тӥ арын М. Вахрушева гожтӥз «На берегу Малой Юконды» автобиографической повесть, инкуазьлэсь чеберзэ возьматыса, мансиослэсь выль улонэ выжемзэс данъяса. Нырысетӥ произведениос калыкез югдытӥзы, дышетӥзы, соос вылын юнмаз манси литературной кыл.

Ваньмыз мансиос тодо, кин со Аннэ песянай — Анна Коньковалэн (1916-1989) выжыкылъёсыз вылын будӥзы тросэз поколениос. Творчествояз со пыкъяськиз калык творчество вылэ, выжыкылъёсаз пиналъёсты визьмаз вашкала дырысен кылем алонъёсъя, косонъёсъя. «И лун медлительных поток…» роман-сказаниын Г. Сазоновен ӵош тодматӥз манси калыклэн историеныз, культураеныз: кызьы ортчо сюан но ватӥськон, кызьы выль адями дунне вылэ вуэ но мукет адямиосын кусып возе — мансиослэн улэм-вылэмзы сярысь гожтэмын чеберлыко кылын. Пичи гинэ Евра гурт возьматэмын калыклэн, быдэс дуннелэн оглюкетэз сямен.

Ӟуч кылтэк тон кин?

Манси калык творчествоез выль тубат вылэ љутӥз, ас сяменыз валэктӥз но быдэс дуннелы тодмо кариз Юван Шесталов (1937-2011) — нырысетӥез профессиональной писательмы. Атаез — манси коммунистъёс пӧлысь нырысетӥез, кылдытӥз нырысетӥ колхоз. Песятаез — шаман. Тӥни сыӵе зол выжыысь пушйиз манси литератураез ас пельпумъёсыз вылын возись писатель. Юван Шесталов калыкезлэсь мадьёссэ, выжыкылъёссэ, кырњанъёссэ кылбуръёсаз озьы пыртӥз, соос выль улонэн улыны, мукет сямен шоканы кутскизы. Ю. Шесталовлэн нырысетӥ кылбур бичетэз манси кылын потӥз Тюменьын 1958-тӥ арын, нош ар ортчыса, Москваысь «Советский писатель» издательство печатлаз ини ӟуч кылын «Пойте, мои звёзды» бичетсэ.

СССР-ын Ю. Шесталов паськыт тодмо луиз «Синий ветер каслания» повестез 1964-тӥ арын потэм бере (каслание — пужейёсын ӵош мукет интые кӧчон). 1971-тӥ арын вордскиз «Языческая поэма» произведениез, со понна писатель басьтӥз РСФСР-лэсь Кун премизэ. «Языческая поэмаез» романтической шуыны луэ ке, отӥяз писатель публицистлэн синмыныз учкыны кутске Уйпалась калыкъёслэн улонзы, адямилэн инкуазез саптамез шоры.

Юван Шесталовлэсь дуннеысь литератураын интызэ валаны юртто Венгриысь тодмо литературоведлэн П. Домокошлэн кылъёсыз: «Дуннеысь литературалэсь юн борддорзэ пасяны быгатӥзы датчанъёс, норвежецъёс, шведъёс, полякъёс, чехъёс, румынъёс, венгеръёс, финъёс но эстонъёс… Куддыръя та борддоре тубыны вормылӥзы сыӵе калыкъёс, кудъёсыз, государство кылдытонозь вуытэк, бырыны кутскизы ини, кылсярысь, мансиослэн Шесталовзы, чукчаослэн Рытхэузы». Тодосчи верамъя, соослы сыӵе нимо-дано луыны ӧй но удалтысал, вылды, совето государство юри со понна ӧй ке сюлмаськысал, будэтысал, визьнодасал… Тау переводчикъёслы — соос манси кылбурчилы юнманы луонлык сётӥзы. Соку но, али но югдур огкадь: произведениосыд ӟуч кылэ берыктэмын ке, иське, тон зол поэт, чуръёсыд кунгожъёсты вормозы шуыса, оскон бадӟым.

Туала вакытэ Ю. Шесталовен одӥг тубатэ пуктыны луэ Андрей Тархановез. Манси пӧйшурасьлэн семьяяз вордӥськем воргорон манси кылын уг гожъяськы ке но, озьы ик данъя аслэсьтыз шаерзэ. «Исповедь язычника» кылбур бичетэз понна солы сётэмын литературая А. Твардовский нимо премия.

Туала вакытэ манси кылын гожъясько Николай Садомин, Анастасия Сайнахова, Светлана Динисламова. Берлоезлэн 2011-тӥ арын потӥз ӟуч кылэ берыктэм веросъёсыныз но кылбуръёсыныз «Мы есть» книгаез.

Светлана Динисламова, филология наукаосъя кандидат

Удмурт Дунне
By Удмурт Дунне 25 марта, 2015 07:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<