Кизилиос ворекъян вакыт

Удмурт Дунне
By Удмурт Дунне 23 марта, 2015 12:39

ChaikovskiiТодмо крезьгурчилэн П. Чайковскийлэн вордскемез дырысен 175 ар тырмонлы элькунмы кӧня ке ар талэсь азьло дасяськыны кутскиз ни. Табере тодмо: сое яркыт, вунонтэм пусъёмы! Та сярысь журналистъёслы вераз Правительстволэн Тӧроезлэн воштӥсез Андрей Кузнецов.

Концертъёс, фестивальёс вуоно арняысен ик мытэмын луозы. Кылсярысь, 21-тӥ мартэ Вотка городын усьтӥськоз егит усточиослэн 18-тӥез фестивальзы. Россиысь сяна, Кореяысь, Китайысь, Италиысь егит музыкантъёс отчы пыриськозы.

— Пӧлазы вань Чайковский нимо егит музыкант но, — пусйиз А. Кузнецов. — Пётр Ильичлэн ӵыжы-выжыез со уг луы ке но, шораз учкыны туж тунсыко луоз, малпасько.

30-тӥ март крезьгур дуннелэн историяз вунонтэм кыльыны кулэ. Угось та нуналэ Воткаын усьтӥськоз П. Чайковскийлэн выльдэм музей-усадьбаез. Отын чылкак выль экспозиция луоз — усадьба быдэсак возьматоз со вакытэз, ку отын вордскиз, будӥз вуоно композитор.

— Жаляса верано, тросэз вунэто, П. Чайковский Удмурт шаерысь Вотка городын вордскемын но будэмын шуыса,  — азинтӥз Правительстволэн Тӧроезлэн воштӥсез. — Соин ик асьмелы та сярысь умой-умой верано. Воткае тросгес туристъёсты кысконо. Та сяна, П. Чайковскийлэн пичи дырызлы сӥзем «Пётр Чайковский. К родословной» фотоальбом поттэмын. Соин тодматскон усадьбаез усьтонын ик чакламын. Вераны кулэ, оглюкетаз книгаосы пыртэмын Браэльлэн системаезъя гожтэм нотаос. Озьыен, соосты лыдӟыны быгатозы ляб адӟисьёс но.

Усьтӥськоз кема возьмам Операя но балетъя театр но! Таиз но чакламын 30-тӥ мартлы ик. Артистъёс дасесь ни! Возьматэмын луоз П. Чайковскийлэн «Лебединое озеро» балетэз. Асьме артистъёсын ӵош отчы пыриськозы палэнысь кизилиос но. Озьы Операя но балетъя театр выль тусын, выль мылкыдын, выль осконъёсын усьтӥськыны кулэ. Отчы ваемын ни туала куронъёслы тупась крезьгур тӥрлык. Эшшо: выльдӥськем Операя но балетъя театрлы П. Чайковскийлэсь нимзэ сётэмын.

Дано крезьгурчи вордскиз 7-тӥ мае. Со туж яркыт ортчыны кулэ. Ужрадъёс Воткаын но, Ижын но чакламын. Та нуналэ но, солэсь азьло но элькунамы ворекъялозы  крезьгур дуннеысь туж яркыт кизилиос: Денис Мацуев, Любовь Казарновская но трос мукетъёсыз.

Кызьы вераз Андрей Кузнецов, дано юбиллеез пусъёнлы Удмуртиын 600 миллион манетлэсь ятыр быдтэмын. Кылсярысь, П. Чайковскийлэсь музей-усадьбазэ выльдон 130 миллион манет пала усиз. Операя но балетъя театрез тупатъян — ог 500 миллион манет. Та пӧлысь ӝынызэ уксёез висъяз Москва. Воткаысь «Юбилейный» культурая дворецез выльдон но сомындагес ик усиз, таизлы но ӝыныез уксё Россилэн бюджетысьтыз вуиз.

— Элькунамы туала куронъёслы тупась 3 рояльёс вуизы ни: огез — Операя но балетъя театре, кыкетӥез — Удмуртиысь кун филармоние но, куинетӥез — Воткаысь «Юбилейной» культурая двореце, — ватсаз Андрей Кузнецов. — Но таизлы элькун казнаысь копейка но быдтымтэ, 21 миллион манет люказы спонсоръёс — элькунысьтымы предприятиос.

Правительстволэн Тӧроезлэн воштӥсез малпамъя, юбилеез ортчытонлы висъям коньдон куке-соку одно берыктӥськоз. Угось дорамы ӵемгес вуылозы, вылды, Россиысь но,  дуннеысь но устоосыз музыканъёс, туристъёс.

Элина Кумачёва

Удмурт Дунне
By Удмурт Дунне 23 марта, 2015 12:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<