43 сюрс квадрат метр буш

Удмурт Дунне
By Удмурт Дунне 20 марта, 2015 11:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Сьӧлта ёросысь Гобгурт школаысь завуч Л. Рештникова

Сьолта ёросысь Гобгурт школаысь завуч Л. Рештникова

Кызьы утёно гурт школаосты?

Сьӧлта ёросысь Гобгуртын 2008-тӥ арын ӵыжак выль школа усьтӥськиз. Сюлмаськонзы одӥг: нылпиослэн лыдзы кулэсме. Таин валче отысь 9-тӥ — 11-тӥ классъёс пытсаськозы.

Кыӵе лӧптэмын вал гуртоос, выль школа усьтӥськыку! Шумпотэмзэс ватыны ӧз быгатэ дышетӥсьёс, анай-атайёс. Мар веранэз на нылпиос сярысь: классъёсы соос вожмаськыса сямен пыризы — отысь выль ӝӧк-пуконъёслы, доскаослы синъёссы мальдӥзы. Эшшо ке нимысьтыз луоз компьютер классы, тӥрлыкен тырмытэмын киужъёсъя классы… Нош кыӵе спортзалзы, столовойзы! Пулэсь вуж школаязы таӵеез ӧй вал…

Ма, туннэ нуналозь школа гуртлэн тужгес бадӟым данъяськонэз, шумпотонэз луэ. Урокъёс бере но нылпиос отысь кошкыны уг дырто, пӧртэм кружокъёсы, секциосы мыло-кыдо ветло. Нош ӝытлань татысь спортзалэ люкасько мӧйыос — баскетболэн, волейболэн шудо.  Эшшо школалэн аслаз сад-бакчаез вань, отын будэтэм емышъёссы асьсэлы но сиыны тырмо, палэнэ но вузало на.

— Нылпиосмы ӟечесь тодон-валанъёсынызы висъясько, — вера Гобгурт школаысь завуч Людмила Решетникова. — Соос пӧртэм конкурсъёсы мылысь-кыдысь пыриськыло, олимпиадаосын вормон интыос басьтыло. ЕГЭ-я баллъёссы но туж шумпотто, котькуд аре сямен ик элькунамы шоро-куспо баллъёслэсь вылӥынгес луо. Тросэз дышетсконзэс азьланьто вылӥ дышетскон заведениосын. Кылсярысь, кылем арын 3 мурт 11-тӥ классэз йылпумъяз, ваньзы ик вузэ пыризы.

Туннэ нуналлы школаын 12 дышетӥсь, со пӧлысь 3-ез — вылӥ категориен. Визьнодасьёслэсь быгатонлыкъёссэс адӟытэк уг уло, шӧдске, палэнысь гуртъёсысь анай-атайёс но. Соинтэк-а куд-огез, асьсэ гуртазы школа вань вылысь, пиналъёссэс келяло татчы.

— Туэ выль арозь дорамы ветлӥзы ай Сьӧлталась 5 пиналъёс, эшшо одӥгез — Сюромошурысь,  — азинтэ веранзэ Людмила Борисовна. — Но январь каникулъёс бере соосты школа автобус нуллэмысь дугдӥз. Соин ик нылпиос но дорысьтымы кошконо луизы. Зэм, Сьӧлталась 1 пинал 1-тӥ классэ ветлэ на — анай-атаез машинаен нуэ-вае.

Эшшо 2 пинал ветлэ на, пе, Выль Мӧньялась  — таоссэ школа автобус ворттэ.

2013-тӥ арын гинэ школае 42 пинал ветлӥз на. Туннэ 33 кузя кылемын. 5-тӥ классы воксё ӧвӧл. Кылемъёсаз но нылпиос чиньыен лыдъямон. Соин ик  дышетӥсьёс  валало: школазэс возён элькун бюджетлы туж дуно усе. 9-тӥ -11-тӥ классъёсты вуоно арысен пытсанэн но соглаш кариськизы ни.

Удалтӥз туэ Гобгурт школаысь 11-тӥ классэз йылпумъясьёслы, соос 5 кузя: дышетсконзэс йылпумъялозы шор ёзо тодон-валан басьтэм сярысь аттестатэн. Ӧзгес удалты 10-тӥ классын дышетскись Василий Рассомахинлы, классын со огназ. Табере со йырзэ тӥя. Яке мукет школае куриськыса, 11-тӥ классэз йылпумъяно, яке медучилищее документъёссэ нуоно.

— 9-тӥ классамы 4 пинал, ваньзылэн ик 11-тӥ классэз йылпумъямзы потэ, — шуэ Людмила Решетникова. — Ми соослы Выль Мӧнья школае мыныны ӵектӥськомы, гуртысьтымы ог 8 иськемын со. Озьы али автобус Выль Мӧньялась пиналъёсты дорамы нуэ-вае ке, вуоно арысен, оло, ӵукналы быдэ Гобгуртысь Выль Мӧньяла ветлоно луоз.

Шӧдӥське: Гобгуртысь дышетӥсьёслы ваньзэ тае вераны капчи ӧвӧл. Соос лулӟисько: ум тодӥське ни, кызьы нылпиосмылэсь лыдзэс йылэтыны!

***

Жаляса верано, Гобгуртын выллем ик югдур тросаз гурт школаосын: нылпиослэн лыдзы кулэсме. Соин ик оптимизация шуон мур пыӵа ни кадь улон-вылонамы. Дышетонъя но наукая министерстволэн лыдпусъёсызъя, кылем арын гинэ пичиятэмын яке воксё пытсамын элькунысьтымы 37 нылпи сад, школа, училище. Та чотын элькун бюджетысь 251 миллион манет шыръяны луиз.

Туэ оптимизация чотын шыръяны чакламын 292 миллион манет. Та сярысь вераз дышетонъя но наукая министр А. Мирошниченко министерстволэн алигес ортчем паськытатэм кенешоназ. Алексей Анатольевич пусйиз:

— Куд-ог школаосын ог 40 процент интыос бушесь, элькунамы оглом  ог 43 сюрс квадрат метръёс токма уло. Соосты юнме шунтыса, югдытыса возиськомы — коммунальной услугаослы тыриськонъёс люкасько.

Ваньзэ тае лыдэ басьтыса, 2018-тӥ арозь республикаысьтымы эшшо 72 дышетон организацилэн вапумез йылпумъяськыны быгатоз. Бен, таин ӵош министр буйгатӥз: сыӵе школаос, кытын нылпиослэн лыдзы уг кулэсмы, тупатъямын луозы. Кылсярысь, туэ 83 дышетон учреждениын выльдӥськозы укноос, липетъёс — талы 310 миллион манет чакламын. Экономикаын секыт югдур шоры учкытэк, дышетон удыслы туэ кылем арын мында ик, ог 1 но ӝыны миллиард манет, коньдон висъяны чакламын.

 Элина Кумачёва

Удмурт Дунне
By Удмурт Дунне 20 марта, 2015 11:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<