Крезьгур кылъёслэсь тросгес вера

Удмурт Дунне
By Удмурт Дунне Март 20, 2015 09:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
12 аресъем Кирилл Шкляев, аккордеонэн шудыса, пӧртэм конкурсъёсын вормылэ.

12 аресъем Кирилл Шкляев, аккордеонэн шудыса, пӧртэм конкурсъёсын вормылэ.

Ортчем шутэтскон нуналэ, Ижысь огаз кафее пырыса, пель сьӧрам кылӥськиз удмурт гур.  Озьы чик малпамтэ шорысь сюри нылпиослэн концертазы.

«Модная дача» кафее  Ижысь искусствоосъя Г. Корепанов нимо 1 номеро нылпи школаысь усточиос котькуд арнянуналэ люкаськыло вылэм. Дышетӥсьсы Ирина Низовцева верамъя,  та кафеен эшъяськонзы кыстӥське ини 3-тӥ арзэ.

— Вал ини ӟуч калык кырӟанъёслы, француз вальсъёслы сӥзем ӝытъёс. Нырысетӥ тулыс нуналэз сӥзимы удмурт чеберлыклы. Удмурт крезьгур паймытэ  аслаз шулдыр чузъяськеменыз, узыр пуштросэныз, лэйкытэныз но задореныз. Нылпиос сое мыло-кыдо быдэсто. Ми пиналъёсын пӧртэм фестивальёсы-конкурсъёсы пыриськиськом, уно концертъёс возьматӥськом, татын сямен ик, чик дунтэк. Вань мылкыд карисьёс соосты учкыны-кылзыны быгато, — шуэ Ирина Викторовна.

Фортепианоен, скрипкаен, флейтаен, аккордеонэн чузъяськись удмурт крезьгур зэмзэ но шулдыр кылӥське. Адямиос мыло-кыдо учкизы пиналъёслэсь шудэмзэс, ӧз вунэтэ чабыны но. Тросэзлы, кылсярысь,  кельшиз, кызьы  Лиза Кирисова фортепианоен Герман Корепановлэсь «Ошмес» произведенизэ шудӥз. Зол чабизы Маргарита Набиуллиналы (дышетӥсез Ирина Свешникова). 4-тӥ классын дышетскись нылаш Герман Корепановлэн пиезлэсь, Александр Корепановлэсь, вальссэ флейтаен быдэстӥз. Паймытӥз 6-тӥ классысь Кирилл Шкляев. 12 аресъем  удмурт пи, зэмос профессионал сямен, аккордеонэн шудэ. Со быдэстӥз Г. Корепановлэсь ик «Зарни нянь» произведенизэ (обработкаез Владимир Дерендяевлэн). Пияш быдэсак выйиз кадь та крезьгур пушкы. Пиезлэсь шудэмзэ туж сак кылзӥз атаез Евгений Шкляев.

— Та мынам кыкетӥез пие. Бадӟымез Данил та школаез ик горд дипломен йылпумъяз, со шудэ фортепианоен. Кирилл бырйиз аккордеонэз. Ми улӥськом Дэри ёросысь Пероггуртын, но пиосмы Ижысь искусствоосъя школаын тодон-валан люкало. Школаын гинэ шудыса, бадӟымесь вормонъёс ӧй басьтылысалзы, дыр, гуртамы но инструментъёсмы вань, дорын но  пиос трос шудо. Кирилл тани Ижын пӧртэм конкурсъёсын ӵем нырысетӥ интыос басья ни, кылем арын Пермьын ортчем калыккуспо ӵошатсконын, Чайковский городын «Нылпиос — нылпиослы» фестивальын кыкетӥ луиз, — шуэ Евгений Шкляев.

— Малы одно ик аккордеонэз бырйид? —  юасько вӧзамы пуксем  пиезлэсь.

— Аккордеонлэн куараез чебер, паймымон чузъяське. Уно конкурсъёсын вормылӥсько ке но, котькуд шудыкум, сюлмаськисько. Тани кылем арын Ижын ортчиз «Талантлэн бурдъёсыз вылын» калыккуспо фестиваль-конкурс. Мон отын туж тулкымъяськи. Трос вал зол усточиос, мынам соослэсь лябгес шудэме ӧз поты. Но тыршеме юнме ӧз луы, нырысетӥ инты басьтӥ. Соин ик конкурс азьын  сюлмаськем мултэс уг луы, — мылкыдзэ усьтэ Кирилл Шкляев.

Кириллэн но мукет усточиослэн вормонъёссылы шумпотэ дышетӥсьсы Ирина Низовцева. Солэн классаз классаз 16 пинал аккордеонэн но баянэн шудэ.

— Крезьгур асьмелы кылъёслэсь тросгес вераны быгатэ, кинлы ке мылкыдъёссэ, малпанъёссэ гурен усьтыны капчигес, чебергес пӧрме. 24 ар ӵоже та удысын ужатозям, мон паймисько но шумпотӥсько, макем устоесь асьмелэн  нылпиосмы. Пиналъёс чебер крезьгурез  асьсэлы гинэ шудыны кулэ ӧвӧл, соосты калык кылзыны кулэ. Таӵе концертъёс юртто нылпиослэсь но дӥсьтонлыксэс будэтыны, адямиослы но ӟеч мылкыд кузьманы. Туэ 175 ар тырме дано композиторлэн П. Чайковскилэн вордскемез дырысен. Милям школаямы нимысьтыз программа дасямын. Кылсярысь, толшор толэзе «Шудӥськом П. Чайковскиез» концерт ортчиз. Фортепианоен шудӥсьёс кык нунал ӵоже пыриськизы «Крезьгуро калейдоскоп» конкурсэ, отын озьы ик чузъяськизы дано улосчимылэн произведениосыз. Пиналъёслы тужгес но кельшо П. Чайковскилэн «Детский альбом» сочинениосыз. Ми али нылпиосын дасяськиськом бадӟым концертлы. Со ортчоз куартолэзе, луоз кык люкетлэсь. Одӥгез сӥземын П. Чайковскийлэн юбилеезлы, мукетыз — Быдӟым Вормонлэн 70 ар тырмонэзлы, — шуиз Ирина Низовцева.

 Галина Семёнова

 

Удмурт Дунне
By Удмурт Дунне Март 20, 2015 09:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<