Ульчае нокин уз кыльы!

Удмурт Дунне
By Удмурт Дунне 20 марта, 2015 09:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Ижысь перинатальный центрын эмъян тирлыксы узыр

Ижысь перинатальный центрын эмъян тӥрлыксы узыр

Адямиен лыдъяське ни 22 арняем пинал, солэн секталаез 500 грамм ке. Улэп вордӥське ке, сое одно ик утёно. Соин ик нылпи ваён юртъёслы бадӟым саклык висъяське. Оптимизациен валче туэ пытсаськоз на шаерысьтымы 8 роддом.

Вордӥськисьёс кулэсмо

Берло дыре шаерамы вордӥськемъёслэн лыдзы, кулэмъёслэн сярысь, вылӥынгес возиське. Но со вакытэ ик кулэсмыны шӧтазы нылпи вайисьёс. Кылем арын, кылсярысь, 22 сюрс 115 пинал вордӥськиз, 2013-тӥ арен ӵошатоно ке, со 117 тэшкылилы ичигес. Лыдпус бадӟым ӧвӧл кадь. Котьма ке но тазалыкез утёнъя министрлэн воштӥсез Людмила Гузнищева верамъя, сак кариськыны муг вань. Угось али нылпи ваён вакытазы вуэмын 1990-тӥ аръёсы вордӥськемъёс. Нош соку пиналъёс ӧжыт вал. Соин ик эмъясьёс азе ужпум пуктэмын: котькуд вордӥськемзэ но вордӥськонозэ нылпиез утёно, анайлы но быдэ вуись нылъёслы бадӟым саклык висъяно.

Туннэ котькуд ёросын, Дэриын сяна,  нылпи ваён юртъёс вань. Дэриос Иж город борды юнматэмын. Но туала вакытэ ёрос больницаосын  пинал вайисьёс ялан кулэсмо. Нылкышноослэн, пиналъёслэн тазалыксы лябен секытэн кышноосты пияны нимысьтыз кылдытэм центръёсы я Иже ысто. Кылсярысь, 22 сюрс нылкышноос пӧлысь кылем арын 2 сюрсэз гинэ пиналзэ ёрос центрысь роддомын вайиз. 16 сюрсэзлэн патологиоссы вал, соин ик соосты нылпи вайыны юрттонъя центръёсы интыяллязы. Шаерамы сыӵе центръёс 6: Вотка, Глазов, Можга, Сарапул, Ува но Эгра. 2013-тӥ-2014-тӥ аръёсы соосты умоятон, техникаен но кадръёсын юнматон вылысь трос уксё кошкиз.

Но таин сэрен ик малпаськонэ усимы, шуэ Людмила Гузнищева. Куд-ог районъёсысь роддомъёсын ар ӵоже 15 пинал сяна уг вордӥськы бере, вань-а пайдаез соосты азьланяз но возьыны?

— Туннэ ачиз улон косэ пичи роддомъёсты пытсаны, — вера Людмила Александровна. Россиысь куд-ог улосъёс та сюресъя мынӥзы ни, синмаськымон ужамзылы паймыны гинэ на кыле. Зэм, луэ вань роддомъёсты кельтыны. Но туннэ луоз-а котькудаз рос-прос но оскымон юрттэт сётэммы? Узгес, дыр. Ӟеч специалистъёс гинэ но ваньмаз уг тырмо. Собере, ваньзэсты ёрос роддомъёсты кельтоно ке, пытсано городысь роддомъёсыз. Городын но уго нылпи вайисьёс ичигес кылё. Но городын базазы трослы умойгес, ёросъёсын сярысь. Татын кадръёс но ӟечесьгес.

Матысь дыре пытсаськозы Гракысь, Каракулиноысь, Киясаысь, Кезысь роддомъёс. Соос юнматэмын луозы матысь ёрос центъёс борды. Якшур-Бӧдьяысь кышноос Ижысь 5 номеро роддоме ветлозы.

Киысь кие

Зэм, туннэ уноез ёрос роддомъёс пытсаськонлы пумит. Толэзяз 2-3 пинал ке но вордӥське, ужан инты вань, шуныт. Со сяна, улонын котькыӵе учыръёс луо. Пинал дырызлэсь вазь югыт дуннее куриськыны кутскиз ке, кышномуртэн маке луиз ке, кызьы сое кытчы ке кыдёке нуод на? Асьсэос нылкышноос но талэсь юн курдало. Но Людмила Гузнищева верамъя, бӧрдонэз но кышканэз ӧвӧл. Котькуд ёрос больницае кельтэмын луоз нимысьтыз пост. Кытын ке со гинекологияя, кытын ке хирургияя отделение пыроз. Шӧдтэк шорысь пиясь нылкышноез отын ик кутозы. Мукетъёссэ гинэ центръёсы ыстозы. Собере, роддомез пытсан воксё уг вера, ёросъёсын нылкышно консультациос ворсаськозы шуыса. Котькудӥз кышномурт аслаз больницаяз ик эскериськоз. Эмъяськыны но соос понна койкаос кельтэмын луозы. Районын пияны гинэ алэмын. Эмчиос но ужан интыоссэс уз ыштэ, шуэ Людмила Гузнищева.

Интыосысь эмъясьёслэн кыл кутонзы йылоз. Соос азе бадӟым ужпум  пуктэмын: секытэн кышноосын рос-прос ужано, котькудӥз дорозь вуттӥськоно, азьвыл ик валэктоно, кытын со пиналзэ ваёз. Сое нуллоно нылпи вайыны юрттонъя центре, мед адӟоз ас синмыныз роддомез. Роддоме нуонъя бригадаос кылдытэмын луозы. Пияны мынӥсьлы соос интыяськыны юрттозы, соос ик нылпиеныз ӵош пумиталозы.

Сюмсиын роддомзы уг ужа ни 2 ар. Юртэз ик туж вуж вал ни. Вань кышноосты нуо Можгае но Иже. Одӥг кулон учыр но ӧй вал на. Красногорскъёс асьсэос валазы ни, Глазовын умойгес шуыса. Нырысь-валысь пытсаськонлы туж пумит вал шарканъёс. Но туэысен соос ужало Воткинскен.

Грак ёрос роддомез пытсаны медо апреле. Татын нылпи вайисез ӧй вал ни, шуыны луоз. Кылсярысь, кылем арын районын 110 пинал вордӥськиз ке но, со пӧлысь 45-езлы гинэ югыт дуннее потыны юрттӥзы гракъёс. Со дыре ик Балезиноын ог 300 мурт вордӥськиз.

— Секытэн нылкышноосмы я Елабугае, я Алнаше, я Можгала пияны мыно. Улон интызылы матэгес роддом утчало, лэся, — шуэ Гракысь валтӥсь врач Валентина Коновалова. —  Асьмелэн тӥрлыкмы но, приборъёсмы но вужесь ни. Вордӥськем нуныез утись неонатологмы гинэ но ӧвӧл. Со ласянь учконо ке, Можгалась нимысьтыз кылдытэм центрын вуоно анайёслы но нылпиоссылы трослы оскымонгес луоз. Собере, милям арлы быдэ ог 4-5 миллион манетмы но ӧвӧл роддоммес возьыны, уждун тырыны. Нылкышноосмес огзэ но ульчае ум кельтэ! Секытэн кышноослы консультациос ортчылозы, воксё шуге-леке вуэмъёссэ, тани-тани нылпи вайыны турттӥсьсэ асьмеос ик кутомы. Учком ни, кызьы уломы.

Сьӧлталан нылпи ваён юртсэс утьыны быгатӥзы. Соин кивалтӥсь Светлана Степанова верамъя, татын арлы быдэ 100-лэсь трос тэшкылиос вордӥсько вал. Кылем арын 80 луизы. Уваын центр усьтэмын ке но, ваньзэсты  ас дораз пумитаны луонлыкез ӧвӧлгес на. Соин но Сьӧлталасьсэ пытсан сярысь туннэ вераськемысь дугдӥзы. Эшшо ке доразы 2 егит специалистъёс ужаны лыктӥзы на. Консультацие черодын пукись кышноос лулӟыло: асьме дорамы ик шулдыргес но капчигес, палэнэ мынэм уг поты, татын, пе, роддом но матынгес, ужасьёсыз но тодмоесь.

Но кузь сюреслэсь кышкано ӧвӧл, шуэ Людмила Гузнищева. Асьмелэн шаермы сокем бадӟым ӧвӧл. Тужгес пыдлось гуртысь ёрос центре вуыны 2,5-3 час сяна кулэ ӧвӧл. Асьмелэн санавиацияя бригадамы но вань.

Елена Сараматова

Туспуктӥз Александр Горбунов

Удмурт Дунне
By Удмурт Дунне 20 марта, 2015 09:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<