Пыраклы ӵошен!

Удмурт Дунне
By Удмурт Дунне 20 марта, 2015 09:29
1-20-7

Крымен огазеяськонлы сӥзем митинг.

Ар талэсь азьло 18-тӥ мартэ Крым Россилэн оглюкетэз луиз. Таин валче кунмылэн пӧртэм сэрегъёсаз митингъёс, акциос, концертъёс ортчизы. Ижысь Шор площаде но, празднике сямен, ог 3 сюрс адями  люкаськиз.

Ымныразы пальпотон шудэ, киосазы флагъёс лопыръясько, гадьёсазы куинь буёлэн лентаос. Кызьы шум уд поты, шуэ Кун Кенешлэн Тӧроез Владимир Невоструев.

— Крымын ог 20 ар ӵоже номыр умоез ӧз лэсьтӥськы ни вал. Ортчем ар ӵоже  полуостров выльысь улӟыны кутскиз. Котькуд удысын воштӥськонъёс мыно, пуктӥськон мытэмын. Бадӟым саклык висъяське тазалыкез утёнлы но дышетонлы.  Улос котыр ласянь сяськая. Туннэ асьмеос солы юрттӥськомы вынмылы кадь. Ачим сопала та ар ӵоже ӧй вуылы. Но одно ик мыно, — шуэ В. Невоструев.

Зэм, Крымен валче улыны кутскеммы шоры олокыӵе синмын учкисез но вань,  Россилы со туж дуно усиз, шуэ куд-огез. Пӧртэм санкциос кутылӥзы уго Россилы пумит. Котьма ке но туннэ сыӵе кунэрес мылкыдын улыны уг яра, шуэ «Калык фронт» огазеяськонлэн Удмурт ёзэзлэн кивалтӥсез А. Шепталин. Улон ваньзэ ас интыяз пуктоз ай. Асьме шаерысьтымы ужбергатӥсьёс кылем арын 2 пол вуылӥзы Крыме. Удмуртиысь Вуз каронъя но промышленностья палаталэн кивалтӥсезлэн воштӥсез В. Любимов верамъя, валче ужанъя, ог-огмылы юрттонъя огкылъёс гожтэмын.

2014-тӥ арысь февраль-март толэзьёсты туннэ «Крым тулысэн» нимало. Та пумысен «Крым. Путь на Родину» кино но пуктэмын, отын В. Путин Президент троссэ шараяз нырысьсэ. Кылем тулыс воксё но капчиен ӧз сётӥськы. Асьмеос ваньмы сямен сюлэмшугъяськыса учкимы, мар даурто Украинаын. Тодэ вайытон вылысь кӧня ке лыдпусъёс:

18-тӥ феврале Киевлэн шораз вир кисьтӥськиз, калык Майданэ люкаськиз, властьлы пумит султӥз. Со дырысен кутско кышкыт бугыръяськонъёс, адями виылон учыръёс.

22-тӥ феврале уйин, В. Путин верамъя, Украиналэсь Президентсэ В. Януковичез лушкем вутто Россие. Со нуналэ ик Киевысь «Беркут» подразделениысь боецъёс берто Крыме, Украиналэн шоркараз уго соосты тушмонъёс карыны ӧдъязы, виылӥзы. Крымын соосты геройёсыз сямен пумитазы.

26-тӥ феврале Крымысь Верховной Советлэн юртаз депутатъёс люкаськыны кулэ вал сессие. Властьлы осконзэс ыштэмъёс, Украинаысь потоно шуыса малпаськисьёс трос луизы уго. Но митинге люкаськем крым бигеръёс бугыръяськыны кутскизы, музъеммес люкыны ум сётэ шуыса. Соос но ӟучъёс куспын жугиськон пуромиз.

27-тӥ феврале Крымлы калык мэре бырйизы С. Аксёновез. Депутатъёс сессие люкаськизы ик, 64 депутат пӧлысь 61-ез Украинаысь потон понна куаразэ сётӥз.

1-тӥ-18-тӥ мартэ «беркутъёс» но казакъёс шормуӵлэсь границаоссэ чакланы кутскизы. Крымез пуштытон сярысь вераськонъёс ветлӥзы уго.

16-тӥ мартэ Крымын референдум ортчиз, шормуӵын улӥсьёс пӧлысь 96 процентэз веразы, Россиын улэмзы потэ шуыса.

18-тӥ мартэ Крымез выль субъектэн лыдъян сярысь огкыл гожтэмын.

***

Крым асьмелэн луиз гинэ, выны семьяеныз ӵош дасяськыны кутскиз Сьӧд зарезь дуре. Со татын 2009-тӥ арын службазэ «Пытливый» военной корабльын 45 егит удмурт пиосын ӵош нуиз уго. Украинаын улӥсьёс ӟучъёсты со аръёсы ик ӧзгес яратылэ, шуэ выны. Севастополе потакумы, куспамы ӟуч кылын вераськыны кутскиськомы ке, кырыжак учкыло вал, шуэ.

— Бугыръяськонъёс выльысь уз пуроме-а шуыса, кышкан вал ик, — тодаз вае кузпалыз Екатерина Фёдорова. — Но отчы вуыса, адӟи: ми кадь туристъёсын пыдэз лёгон инты ӧвӧл. Улӥмы ми Севастопольын. Уй-нунал ӵоже квартиралы 1,5 сюрс манет тырим. Тодӥсько на патерлэн кузёез куалектэмын вал, гужем быриз ке, уксё поттон амалэз быроз шуыса. Украинаез кунгож ворсамын вал уго. Нош татын ваньмыз сямен туристъёс чотын уло. Но кинэн гинэ ӧм вераське, ваньзылэн бадӟым осконзы вал, умой луоз шуыса. Пенсиоссы ик соку ик йылӥзы уго. Паймытӥз соиз: адямиос ваньзы куспазы вераськыны вырылӥзы ӟуч сямен. Нош макем трос калык люкаськиз Севастополе ВМФ-лэн нуналаз. Туж тросэз соку В. Путинэз возьмазы. Арлыдоос солы Инмарлы кадь вӧсясько шуыса, ас синмыным адӟи. Егитъёс понна гинэ йыры кур луиз. Соос историе пырем городзэс дунъяны уг валало. Огшоры интыын улэм кадь асьсэды возё, синпелетъёсты уг чаклало, азьвыл офицеръёсты ултӥяло. Озьы соосты будэтӥз вужез власть.

Нош кыӵе уло Крымын али? Кыӵе шӧдонъёссы соослэн?

Маргарита Кошман Крыме вуиз Совето Союз вакытэ — бызиз.

— Евпаториын улӥсьёс асьсэды украинецъёс ноку ӧз шуылэ, — вера Маргарита Алексеевна. — Лапак шӧдылӥмы Россиен юн кусыпъёсмес. Уката ик мон вордӥськемын Яр ёросысь удмурт Биграгуртын (Дизьминоын). Кыӵе мон украинка?

Совето Союз куашкам бере «самостийной» Украинаын улон шугомиз. Евпаториын уж гужем гинэ шеде вал: я кудаз ке санаторие выж миськисе кутозы, я виноград будэтонэ ӧтёзы. Маргарита Кошманлы ӵем гинэ коньдон ысъяз Ижын улӥсь сузэрыз. Быдэс толзэ потылӥзы гужем квартираязы туристъёсты возем коньдон чотын.

Тани быдэс ар ортчиз ини Крым Россие берытскем дырысен. Евпаториын усьтӥськиз кӧня ке ар ӵоже чалмыт улэм культурая юрт, монэ отчы ужаны басьтӥзы, шуэ Маргарита Алексеевна. Санаториос но толалтэ ик улӟо ини — Россиысь шутэтскисьёс лыкто. Крымын улӥсьёс чидатэк витё ини гужемез, туристъёс вуэмъя улон пӧзёз шуыса оско.

Маргарита Кошман туж шумпотэ Россиын улӥсьёс мында уждун басьтэмезлы. Пенсиос но йылӥзы. Берло дыре дунъёслэн будэмзы крымъёсты пичи но уг кышкаты: соос дышемын шуг-секытъёслы, азьланезлы, Россилы осконзы туж бадӟым.

— Украинае кыльысалмы ке, милям но граждан ож пуромысал, дыр, ини. Коркаосмы уг пуштыло, сютэм ум улӥське — солэсь ортчыт ма кулэ на? — шуэ Маргарита Кошман.

 Елена Сараматова

Туспуктӥз Владимир Беломорских

Удмурт Дунне
By Удмурт Дунне 20 марта, 2015 09:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<