Ёрос центре вуыса, ӟучомиськом…

Удмурт Дунне
By Удмурт Дунне Март 19, 2015 08:16
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
1

«Анай кыл — улонлэн инъетэз» форум

Пичи Пурга черкогуртын ортчиз «Анай кыл — улонлэн инъетэз» форум. Радъязы сое ёросысь лулчеберетъя ёзэт, Пичи Пурга ёросысь «Удмурт Кенеш» огазеяськон но роно.

Презентациын вакчияк анай кылзэс дунъямзэс веразы тодмо адямиос — шаерысьтымы Ольга Туктарева но Максим Вылегжанин, Москваысь Дмитрий Нагиев но Николай Дроздов.

Тунсыко потӥз ӟуч, удмурт, бигер, пор, армян  калыкъёслэсь ас кылынызы лыдӟем кылбуръёссэс кылзыны, дӥсьёссэс учкыны.

Ужрадэ пыриськизы Пичи Пурга ёрослэн йырыз Александр Ерохин но администрацилэн йырыз Светлана Колодкина.

Светлана Колодкина пусйиз, ёросамы трос  пӧртэм  калыкъёс уло ке но, асьме дорын лек вожвылъяськонъёс ӧвӧл. Роноен кивалтӥсь Галина Кириллова тодматӥз ёросысь удмурт кылъя дышетӥсьёслэн, нылпи садын ужасьёслэн   вормонъёсынызы.  Ёросын 32 школаын дышето удмурт кылэз предмет чотын, мукетъёсаз факультатив амалэн. Адӟем карымон дышетӥсьёс ужало отын,  вормонъёссы вань. Кечол шор ёзо школаысь Нина Ермокиналы сётэмын Трокай Борисов нимо премия, Герман Ходырев нимо премиен пусъемын Норья шор ёзо школаысь Ирина Коротаева но Вуж Мӧньяысь Мария Никитина. Пусйыны кулэ, вуоно арысен Пичи Пурга ёросысь котькуд школаын удмурт кылэз предмет чотын дышетозы. Собере  кутскиз секциосын ужан.

Ёрос библиотекаын «Национальная площадка» проект радъямын. Отын калыклы юрттыны дась юристъёс, психологъёс, пӧртэм калык сям-йылолъёсты ӟеч тодӥсь ӧнерчиос. Ӵапак сое усьтонлы сӥземын вал одӥгез секция. Мукетаз люкаськизы удмурт кылъя дышетӥсьёс, школаосын кивалтӥсьёс, покчи классъёсын дышетӥсьёс. Секциез нуисьёс Нина Верещагина но Лидия Машканцева меӵак юан сётӥзы: ма кароно будӥсь пиналъёс удмурт кылын чебер мед вераськозы шуыса. Залын пукисьёс мылкыдзэс усьтыны ӧз дыртэ. Малы? Пичи Пурга ёросысь «Удмурт Кенеш» огазеяськонлэн кивалтӥсез Василий Москвин пусйиз: туннэ калыкен но анай-атайёсын ужано. Асьмелэн удмурт кылмы малпамын ӧвӧл, со ӵемонамы пыӵамын, ёросамы гуртъёс пӧлысь 70-эз воршуд нимъёсты нулло. Адями котькытын мед улоз, котькыӵе кылын мед вераськоз но вордскем гуртсэ, анай кылзэ уз вунэты.

Удмурт кылэз утён но азинтон удмурт кылъя дышетӥсьёслэн гинэ ужазы медаз луы, котькыӵе предметэн дышетӥсь аслаз урокъёсаз мед быгатоз анай кылэз кутыны. Шуом, Быдӟым Атыкай ожез, сяська нимъёсты, мугор люкетъёсты дышетыку. Эмъясьёс но, мукет удысын тыршисьёс но озьы мед ужалозы вылэм. Удмурт кылэз дышетӥсь пиналъёс но егитъёс понна кутоно бурдъян амалъёсты. Шуом, шутэтскыны  яке кытчы ке путёвка вуиз ке, сётоно быгатӥсь удмурт пиналъёслы.

Нина Ермокина жаляса вераз, куке но школаосын этноплощадкаос ужазы, соосты  выльысь улӟытыны, пе,  кулэ. Удмурт нуноке, пе, нылпи садэ ветлыны кутскыса, ӟуч луиз, али дышетӥсько удмурт кыллы, но со «стесняюсь» шуэ. Таӵе учыръёс медаз луэ вылэм.

— Ӵемысь верало: удмурт кыл кулэ, бакча бере потытозь гинэ. Пургала вуиськом ке, ӟуч луиськом. Туннэ но удмурт дэремъёсын пӧрмытскыса лыктӥм но  ог-огмылы «здравствуйте» шуыса вазиським.

Дышетӥсьёс ӝожтӥсько: покчи классъёслы удмурт кылъя учебникъёсы пыртэмын  выль удмурт кылъёс. Дорысь ужмес нылпиосын ӵош словарьтэк лэсьтыны ум быгатӥське.

Анай кылъя учебникъёслэн Юлия Байтерякова валэктӥз:

— Выль учебникъёсын кылэз чылкытатон бордын  ужаськом. Татын ке ӧд, кытын со выль кылъёсын тодматскод на? Собере, ваньмыз со туж мудрон но ӧвӧл. Вопросительный знак — юан пус, звонкой куара — жингрес. Кызьы глухойзэ ӟуч сямен сётод на, вань ке удмурт — «тонгес».

Дышетонъя но наукая министерствоысь Валентина Корепанова но юанъёслы валэктонъёс сётъяз, нялтас пусйиз:  ӟуч кылъя ЕГЭ сётэм пиналъёс пӧлын, эскерон ортчытыса, шараяськиз, удмурт кылэз дышетэм пиналъёслэн балъёссы вылӥынгес.

2

Ваньмыз потэ асьме бордысь. Вожмаськыса лыдӟим ке ас кылынымы гожтэм книгаосты, газетлы гожтӥськыны черод ке луиз, печатласькем статьяос пумысен вераськонъёс-ченгешонъёс ке пуромизы — озьыен, улом на.

Форум ортчиз. Уж пӧзе кадь. Удмурт кыл кун кыл луэ, кие кутымон удмурт книгаос удмурт кылын потӥсь журнал-газетъёс вань. Нокин уг алы анай кылын вераськонлэсь.  Ваньмыз потэ асьме бордысь. Вожмаськыса лыдӟим ке ас кылынымы гожтэм книгаосты, газетлы гожтӥськыны черод ке луиз, печатласькем статьяос пумысен вераськонъёс-ченгешонъёс ке пуромизы  — озьыен, улом на.

Зинаида Елизарова,

Пичи Пурга ёрос,

Гожня гурт

Удмурт Дунне
By Удмурт Дунне Март 19, 2015 08:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<