Котькуд вормон — адями бордысь

Удмурт Дунне
By Удмурт Дунне Март 17, 2015 10:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пудо вордон удысын лыдпусъёс шумпотто

Кылем арня вискын Эгралась культурая юртэ люкаськылӥзы шаерысьтымы пудо вордӥсьёс. Кылем арын тыршемзылы йылпумъянъёс лэсьтэмын, туэлы ужпумъёс чакламын вал. Устооссэ ужасьёсты ӟечкылазы шаерысьтымы вылӥ кивалтӥсьёс.

Тужгес трос йӧл сётэ Сирена

Куд-ог улосъёсын ӵошатыса, Удмурт шаерын быгатӥзы утьыны пудо вордонэз. Ваньмызлы сямен хозяйствоослы йӧл поттон ик возиськыны но юрттэ. Соин но та удыслы бадӟым саклык висъяське.

Кылем арын огъя кужымен кыскемын 749 сюрс тонна йӧл. 2013-тӥ арен ӵошатыса, та 37 сюрс тонналы уногес. Мукет сямен вераса, лыдпус йылӥз 5,3 процентлы. Россиын миым йӧл поттон 0,1 процентлы гинэ будэмын, Приволжск федерал округын — 1 процентлы.

Правительстволэн Тӧроезлэн воштӥсез, гурт удысъя но сиён-юонъя министр Сергей Токарев верамъя, тужгес трос кыскизы Шаркан, Вавож но Кияса ёросъёсын. Татын пудо лыдзэс но йылтыны быгатӥзы. Нялтас вераса, шаерысьтымы 14 ёросын котькуд скаллэсь люкаськиз 5 сюрс килограммлэсь уно йӧл. 12 ёросын быгатӥзы пудозылэсь лыдзэ утьыны, кылемаз сюроссэс вандоно луизы.

Но вань 6 сюрс килограммлэсь уно йӧл кыскисьёс но — со 38 устоез хозяйствоос. Огъя йӧл поттонын таослэн люкетсы 40 процент.

Зэм, вань 10 сюрс килограммлэсь уно йӧл сётӥсь 108 йыр гинэ. Та «зарни фондэз» пудо утисьёс ки йылазы нулло: чылкыт мисько, умой сюдо, чылкыт гидын возё. Выжызы ӟеч. Уноез соос пӧлысь Вотка ёросысь «Июльское» хозяйствоын. Татысь тужгес синмаськымон Сирена скалзы кылем арын 11 сюрс 100 килограмм йӧл сётӥз. Наплыкез но умой — 4,13 процент.

3-13-6

Удмуртиысь 108 скал 10 сюрс килограммлэсь уно йӧл сётэ.

Ӟечлык будэ — вожвылъяськон кылдэ

Пудо вордонын, йӧл кысконын бадӟымесь азинсконъёс уд адӟы, гидъёсты ӧд выльды ке. Тае вань хозяйствоос валало, но ваньзылэн выльдӥськыны луонлыксы ӧвӧл. Туала куронъёслы тупась гид пуктон понна кӧня ке миллион манет кулэ. Котьма ке но кылем арын ог 3 сюрс йырлы гидъёс тупатӥськизы ик. 40 фермаын скалъёсты нимысьтыз залын кыско ни. Ваньмаз сямен гидъёсын йӧлэз сӥятӥсь установкаос пуктэмын. 80 процентаз хозяйствоосын пудо сиён дасяло ни миксеръёсын. Та туж юрттӥз йӧллэсь ӟечлыксэ будэтыны. Сергей Токарев пусъемъя, 94 процентэз йӧл вылӥ сортэн кошке.

Йӧл поттэмзы хозяйствоослы барыш уногес вае, сое басьтыны вожмаськисез но тросгес, переработкаен вырись предприятиос но хозяйствоослы кредит мыло-кыдогес сёто.

Кылем арын шорлыдын 18 манет дунъяськиз 1 килограмм йӧл. Нялтас вераса, берло 7 ар ӵоже таӵе бадӟым дун ӧй вал ни. 2013-тӥ арен ик ӵошатоно ке, миым йӧл 3 манетлы дуназ.

— Оскисько, азьланяз но переработкаен вырисьёс гуртоосын огкыл шедьтозы, — шуиз Сергей Токарев люкаськемъёс азьын.

Парсьпи быдӟа карп

Шаерамы синмаськымон азинтӥське тылобурдо вордон. Миым 939,4 миллион курегпуз басьтэмын, 2013-тӥ арын 905,2 миллион вал. Кулэяськеммылэсь та 95 процентлы уногес. Сӥль поттон но 3 процентлы уногес луиз. Кылем арын 171,2 сюрс тонна сӥль поттэмын, 2013-тӥ арен ӵошатыса 1 сюрс тонналы уногес.

Берло аръёс ӵоже уноез хозяйствоос парсь вордонлэсь куштӥськизы. Гидъёс туала куронъёслы уг тупало. Соосты выльдон дуногес усёз, шуизы кивалтӥсьёс. Но гидъёсты ворсамен сэрен парсь вордон удыс чутыны кутскиз шуыны уг луы. Солэсь ортчыт — зол азинтӥськиз селекциен вырон. Та ужлы бадӟым саклык висъя «Восточный» огазеяськон. Асьме инкуазьлы, асьме сиёнлы тупась парсьпиос вордо татын. Россиысь мукет предприятиос кунгож сьӧрысь кидысэн ужало, оло, таин сэрен но нурскетӥсьёссы лябесь луо. Нош асьме дорын парсьпиос ӝог чебертӥсько.

Парсьпиос быдӟаесь ик будо Вотка ёросысь «Пихтовка» чорыг хозяйствоын карпъёссы. Россиын та хозяйство огез азьмынӥсез. Рынокын аслэсьтыз интызэс шедьтӥзы Кизнерысь но Можгалась зверохозяйствоос но. Кунгож сьӧрысь вуттэм чебер кулэсь дӥсь Россиын уно ке но, асьме кулы синмаськисьёс трос.

Быдэстонтэмез ӧвӧл

Котькуд вормон потэ нимысьтыз адямиос бордысь. Кылсярысь, Балезино ёросысь «Путь к коммунизму» хозяйствоысь пудо вордӥсьёс котькуд 100 скалзылэсь 97 йыр кунян басьтӥзы. Та тужгес синмаськымонэз лыдпус. Фермаен кивалтӥсьсы Галина Максимова. Вавож ёросысь «Луч» хозяйствоосысь Лариса Данышева фермае ужаны лыктӥз школазэ йылпумъямез бере ик. Аръёс ӵоже скал бызьылытонлэсь секретъёссэ умой гинэ тодэ ни со. Россиысь та удыслы сӥзем ӵошатсконын со 3-тӥ инты басьтӥз.

Котьма ке но ушъяськыны гинэ уг луы, шуэ Сергей Токарев. Куд-ог кылдэм ужпумъёсты палэнтыны но вормыны тыршоно. Кылсярысь, 13 ёросын пудо лыдэз уськытӥмы. Ӧжытгес басьтӥмы парсьпи но кунян.

— Туннэ возьыт вераны ик, кытын ке-кытын ке скаллэсь 4 сюрс килограмм йӧл кыскизы шуыса. Но сыӵеос вань — 2 ёрос, Сюмси но Юкаменск, ӝутӥськыны нокызьы но ӧз быгатэ, — шуэ Сергей Аркадьевич. — Ӝоже уськыто мукет лыдпусъёс но. Йӧллэн белокез шаерамы 3,1 процент, наплыкез — 3,65 процент. Артысь улосвылъёсын ик талэсь чебересьгес лыдпусъёс. Соин ик йӧллэсь ӟечлыксэ эшшо но умоятон бордын тыршон.

Удмуртилэн Тӧроез Александр Соловьёв туж оскыса гуртоос азе ужпум пуктӥз: 2020-тӥ арозь йылтоно йӧл кысконэз. Арлы быдэ 1 миллион тонна поттоно. Та ужпум капчи ӧвӧл, но быдэстонтэм ӧвӧл. Со понна одно ик кулэ выльдӥськон ужъёсты азьланьтыны, туала технологиосты пыӵатыны, ӟеч специалистъёсты гурт удысэ кыскыны, умой пудо сиён дасяны, ӟеч выжыысь пудо уськытыны.

Елена Сараматова

Туспуктӥз Александр Горбунов

Удмурт Дунне
By Удмурт Дунне Март 17, 2015 10:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<