Корка вань, но улыны ярантэм

Удмурт Дунне
By Удмурт Дунне 17 марта, 2015 08:55

Арысь аре ичигес уг кылё сиротаослы сэрег висъян сярысь юанъёс. Та пумысен ик ужпум ӝутэмын вал Калыкез утён, семья но демография политикая министерствоын.

2011-тӥ арын шаерамы 6 сюрс 773 сирота пинал лыдъяськиз. Миым соос 6 сюрс 182 кузя вал. Таос пӧлысь 1 сюрс 72-ез тэшкыли нылпи юртъёсын аслэсьтыз шудзэ возьма, кылемъёсыз семьяосы басьтэмын. Министерствоысь опекая но попечительствоя ёзэн кивалтӥсь Елена Макарова верамъя, 6 аресозь тэшкылиослы удалтэгес ик ай. Нош солэсь бадӟымъёссэ, тужгес но 10 ареслэсь ортчемъёссэ, семьяосы басьтэмзы уг поты ни. Таослэн уго асьсэлэн сямзы ни, воштыны сое шуг шуыса, уноез анай-атайёс курдало. Ӵапак таосыз ик улон юртъерен шугъясько: нылпи юртысь потӥзы ке, мынон-пырон интызы ӧвӧл. Туннэ шаерамы 2 сюрс 283 пинал липетлы черодэ султэмын.

1 сюрс 993 пиналлэн сэрегез вань, лыдъяське. Но 656-езлэн со улыны воксё ярантэм.

Нылпи юртын шуныт, югыт ке но, анай-атай вӧзын улэм потэ.

Нылпи юртын шуныт, югыт ке но, анай-атай вӧзын улэм потэ.

Кылем арын 280 пинал корка пырон ортчытыны быгатӥз ик. Но ваньзэсты шудо карон понна кӧня уксё но дыр кулэ! Туала вакытэ закон уг чакла ни, армиысь бертэмын-а тон, нылпи вайыны дасяськемын-а — квартира сётӥське черод вуэмъя.

Туэ чакламын Кезысь ворсам училищелэсь юртсэ, Можга ёросысь Бадӟым Сибы гуртысь нылпи садлэсь буш улӥсь юртсэ, Уваысь общежитиез тупатъяны-выльдыны но отчы сиротаосты пыртыны. Но берло дыре уноез егитъёс Иже кыстӥсько, зэмос квартира куремзы потэ. Соин ик шугъяськон вань, выльдэм юртъёсы выжись луоз шуыса. Можга ёрослэн йырыз Аркадий Вершинин верамъя, Бадӟым Сибыысь нылпи юрт йыг-йыг, югыт, укноосыз пластиклэсь. Гумыосы шуныт лэзьысалзы, тыл кыскысалзы ке, отысь 22 квартираын улон майбыр луысал. Мылкыд карисезлы уж но сюрысал. Но егитъёслэн гуртын улэмзы ик уг поты.

Со дыре ик Дышетонъя но наукая министерство ёросъёсты утчаськыны косэ, оло, эшшо буш сылӥсь юртъёссы вань на шуыса. Соосты выльдон уго дунтэмгес усе, воксё выльзэ пуктон сярысь.

Куд-ог нылпиослэн коркаоссы но вань, но соослы гань-гань улыны люкето анай-атайёссы — мумы-бубы луон правооссы таламын ни ке но. 2 министерствоос туннэ азязы ужпум пуктӥзы: сыӵе анай-атайёсты юртысь поттоно.

Коркалы черодэз вакчиятыны юрттоз, оло, мукетыз но ужрад. Нылпиез усыновить карись муртлы 1 миллион манет сётӥськоз, улон условиоссэ умоятыны мед быгатоз шуыса. Уксё чакламын юртъерез паськытатыны яке ичизэ 18 квадрат метръем сэрег басьтыны, сое пинал вылэ одно ик гожтыса.

Но юрт гинэ шудо уг кары нокинэ но. Елена Макарова верамъя, опекаен но попечительствоен вырись ёзъёс азе бадӟым ужпум пуктэмын: нылпи юртысь семьяе котькуд басьтэм пинал каньыл мед улоз. Выль семьялы аслыз но выль сямен улыны дышетсконо, пиналлы но муртъёс борды кариськыны кулэ. Ваньзылы капчигес медло шуыса, кылдытозы нимысьтыз служба. Психологъёсын, юристъёсын но мукет специалистъёсын кенешыны котьку медло, соку семьялы азьлане вамыштыны капчигес луоз.

Елена Сараматова

Туспуктӥз Александр Горбунов

Удмурт Дунне
By Удмурт Дунне 17 марта, 2015 08:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<