Зарни гондыръёс йылӥзы

Удмурт Дунне
By Удмурт Дунне 16 марта, 2015 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вить тулыс нуналлы Ижевск нош ик цирк искусствоя калыккуспо фестивале зымиз. 5-тӥ-9-тӥ южтолэзе шоркарамы ортчиз 8-тӥез таӵе праздник. Удмуртие вуизы дуннеысь 16 кунысь тужгес кужмоосыз артистъёс.

— Урамын тулыс, озьыен, дыр вуиз шаерамы ортчытыны цирк искусствоя 8-тӥзэ калыккуспо фестивалез. Туэ сое, республикамы сяна, ортчытыны юртто Россиысь Культурая министерство но Россиысь кун цирк компания, — таӵе кылъёсын журналистъёсын пумиськонэз 6-тӥ мартэ усьтӥз Ижысь цирклэн кивалтӥсез Дмитрий Иванов. Со тодматӥз фестивальлэн программаеныз но дунъясьёсын.

— Цирклэн инъетэз 3 валтӥсь ӧръёслэсь кылдэ: акробатика, клоунада но пӧйшуръёс. Та фестивальын тӥ ваньзэ соосты адӟоды. Номеръёсты бырйизы профессионалъёс. Соос лыдэ басьтӥзы программалэсь аспӧртэмлыксэ, трюкъёссэ, чеберлыксэ. 250 номер пӧлысь ми бырйимы 24-зэ. Озьы 8-тӥяз фестивале люкаськизы тужгес яркытъёсыз цирк дуннеысь кизилиос. Кылсярысь, нырысьсэ дорамы вуизы Уйпал Кореяысь гимнастъёс.

Кореяысь артистъёс омырын туж зол лобало, соосты сутыны, кельтыны туала вакытэ нокин уг быгаты. Та артистъёсты дорамы ӧтён дуно но секыт вал. Соос 11 кузя лыктӥзы. Сюрес вылэ 30 час быдтӥзы. Ваньмызлэсь вазь Иже вуизы, шутэтскыны но реквизитъёссэс интыяны (тӥрлыксы таослэн туж аспӧртэм) дырзы мед тырмоз шуыса. Малпасько, учкисьёслы Уйпал Кореяысь артистъёслэн «Омырын лобан» программазы кельшоз, — шуиз Дмитрий Иванов.

Германиысь артистъёс

Германиысь артистъёс

8-тӥяз фестивале вуизы Германиысь, Америкаысь, Китайысь, Россиысь, Украинаысь, Канадаысь но мукет кунъёсысь артистъёс. Котькудзы сярысь трос вераны луоз, но соосты огпол адӟыны кулэ. Номеръёс паймытӥзы асьсэлэн пӧртэмлыкенызы, ог-огзылы кельшись выступлениос ӧй вал, соин ик 3 час пала кыстӥськись представление чик ӧз жадьыты. Тани нырысь ик учкисьёс азе кылдӥз Швейцариысь Кай Леклерк. Артист арена йылын ваньзэ йыруллань лэсьтӥз: ветлӥз, сиськиз, юиз, эктӥз, ӧз, ӧз усьы, шапык вузэ но музэ ӧз кисьты.

Бӧрысь потӥзы Китайысь акробатъёс. Кужмо пыдъёс но пельпумъёс вылын соос возизы самой ичизэ ньыль муртэ. Та ньыль адямиос, огӵош омырын бергаса, нош ик ас интыязы (эшъёссылэн пельпумъёссы вылэ) пуксьылӥзы. Син куспын кылдылӥз мугоръёслэсь зэмос башня. Артистъёс туж ӝог но капчиен тэтчазы ог-огзы вылтӥ.

Синмаськытӥз Германиысь жонглёр Симон Крачинов. Учкисьёс солы сылыса чабизы. Та пи киосыныз гинэ ӧвӧл, пыдъёсыныз но, чыртыеныз но, йырыныз но тупъёсты кутылӥз, ваньмыз крезьгуръя но ӝог лэсьтэмын вал. Котькуд номер ортчем бере малпаськод, талэсь зол уд паймы ни, но котькуд мукетыз тонэ уката но паймытэ но синмаськытэ.

Мыным туж шер кельшо клоунъёс. Но фестивальын Португалиысь маскарчи Сезар Диаз монэ бӧрдымон серекъятӥз. Чебереныз, бергась погыллянын (колесо Сира) эктэменыз паймытӥз Канадаысь Анжела Бонжиовонни. Со возьматӥз: мугорын куддыр кылъёслэсь яркытгес но тросгес вераны луэ. Учкисьёслэн син азязы кема улоз на, дыр Китайысь артистлэн Жанг Фанлэн ез вылын йыруллань ӟечырамез, пагӟаен бергамез, велосипедэн ветлэмез. Америкаысь, дунъясь Пётр Дубинский пусйиз: та номер возьматэ цирк искусстволэсь туж зэмлыко луэмзэ. Малы ке шуоно, ньӧмыз понна яке пӧяськыса ез вылтӥ йыруллань ветлыны уг луы.

Уйпал Кореяысь омырын лобасьёс зэмзэ но синмаськытӥзы асьсэлы. Соос сальто-мортале нимаськиз трюк быдэстӥзы. Ареналэн самой вылӥяз одӥгез гимнаст мукетсэ омыре куштэ, соиз 4 пол берытске но выльысен эшез доры ик лобӟе. Соку быдэс цирк шокамысь дугдэ кадь: вуттоз-а мукетыз гимнаст эшсэ кутыса яке соиз усёз-а. Тани киос ваче кырмисько но, учкисьёс гань-гань шокчо. Белоруссиысь «Дзива» цирклэн чеберлыкъя кивалтӥсез, фестивальысь жюрилэн ёзчиез Татьяна Бондарчук верамъя, та трюк туж чебер, но сое быдэстыны ваньмыз уг быгато яке уг дӥсьто. Сальто-мортале туж секыт но кышкыт лыдъяське.

Германиысь семья, Кристиан но Алекса Гертнер, арена вылэ потӥзы слонъёсын. Та бадӟым пӧйшуръёсын соос кивалтӥзы шудонъёсын сямен. Тужгес но паймытӥз 3 аресъем нылзы. Та пичи дыды слонъёс вылын ассэ эрикогес но дӥсьтӥсьгес возиз, арена вылын сярысь.

5 нунал шаерамы кыстӥськиз цирк праздник. Залын буш пуконъёс ӧй вал. Шаерысьтымы учкисьёс сяна, фестивале нырысьсэ лыктӥзы Совето Союзысь калык артистлэн, странаысьтымы тужгес тодмо клоунлэн Юрий Никулинлэн внукъёсыз но правнукез, Юрий, Максим но Станислав Никулинъёс, кизэс жалятэк, чабизы.
Котьку сямен тужгес но секыт вал, дыр, дунъясьёслы. Туэ Зарни гондыръёс (цирк фестивальлэн валтӥсь кузьымез) чакламлэсь тросгес луизы. Кема кенешемез бере жюри огкылэ вуиз. Озьы валтӥсь кузьымен пусйемын 4 номер: Уйпал Кореяысь «Омырын лобан», Россиысь Сергей Нестеров дрессировщиклэн «Талисман» аттракционэз, Китайысь Тяньзинь акробатъёслэн «Икарийской шудонъёссы» но Китайысь Жанг Фанлэн «Эрико ёзэз».

Азвесь гондырен доразы бертӥзы Канадаысь Анжела Бонжиовонни, Украинаысь «Дуо Квас» акробатъёслэн дуэтсы но Германиысь Кристиан но Алекса Гертнеръёс.

Туй гондырен пусйизы Испаниысь жонглёрез Пикассо Джуниорез, Россиысь эквилибрез Папин Хачатрянэз но Кубаысь Сиксто но Лючия фокусникъёсты.

Галина Семёнова
Тупуктӥз Владимир Беломорских

Удмурт Дунне
By Удмурт Дунне 16 марта, 2015 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<