33 ар — ӵош

Удмурт Дунне
By Удмурт Дунне 16 марта, 2015 11:01

Ӟечкыласьком!

Лия Яковлевна Малых

Лия Яковлевна Малых

Юбилейзэ пусъе милям эшмы, «Удмурт дунне» газетын 33-тӥ арзэ ужась корреспондент, Удмуртиысь дано журналист, Ашальчи Оки нимо премилэн лауреатэз Лия Малых.

Лия Яковлевна, 1982-тӥ арын газетэ лыктыса, корректор но вал, отделэн но кивалтӥз. Соин газет ужез котыр ласянь тодэ. Лыдӟисьёс ярато солэсь адӟем карымон адямиос сярысь очеркъёссэ, сюлмаськытӥсь учыръёс сярысь статьяоссэ. Кема аръёс ӵоже со кыл кутӥз социальной ужпумъёс понна. Дораз чуренак вуо вал улонэн обидем сӧсыръёс, мӧйыос — Лия Яковлевна ваньзэс кылзоз, шуныт кыл шедьтоз, юрттыны амал утчалоз.

Лия Яковлевна кема дыр ӵоже кыл кутӥз «Берекет», «Шӧкыч» бамъёс понна. Со кичӧлтэмъя пӧртэм вакытъёсы газетамы кылдӥзы егитъёслы сӥзем «Шунды», «Пинал куараос» бамъёс, нылкышноос бадӟым тунсыкен лыдӟизы «Наталь» бамез, вашкала сям-йылолъёсын тодматӥз «Олле». Таос пӧлысь куд-огез бӧрысь будӥзы нимаз газетозь, приложенилы пӧрмизы.

Лия Яковлевна огдышем малпанъёс, кабъёс сьӧры потыны быгатэ. Озьы вордӥсько лыдӟисьёс понна пӧртэм конкурсъёс, проектъёс. Ачиз но вормылэ журналистъёс пӧлын ортчылӥсь конкурсъёсын. Кылсярысь, семьялэсь сюлмаськонъёссэ, нылпилэсь шугъяськонъёссэ ӟеч возьматэмез понна «Аслад липетэд улын» но «Удмуртия — нылпиослэн шаерзы» элькун конкурсъёсын вормисен лыдъямын вал.

Газетлы сомында кужымзэ сётыса но, та пичи, чиед, шыпыт нылкышно вутске на общественной уже пыриськыны: егитъёслэн «Шунды» огазеяськонзылэн правленияз бырйылэмын. Али чырмыт ужа «Удмурт нылкышно кенешын».

Творческой малпанъёсыз, дартэз газет чуръёсы уг тэро. Поттӥз нылпиослы выжыкылъёсын «Эктӥсь кизили», веросъёсын но юморескаосын «Шундыберган», анай-атаен лыдӟон понна «Ӟечбур, выжыкыл!» книгаос, «Боко но Моко» выжыкыл-повестезъя пьеса гожтӥз, Мунё театр соя удмурт но ӟуч кылъёсын спектакль пуктӥз.

Ми данъяськиськомы, сыӵе быгатӥсь адямиен ӵош ужаськомы шуыса, эшмылы сӥзиськомы тодмотэм сюресъёс, тунсыко геройёс, паймымон пумиськонъёс, выль чуръёс.

Удмурт Дунне
By Удмурт Дунне 16 марта, 2015 11:01