100 аресозь улыны малпа вал

Удмурт Дунне
By Удмурт Дунне Март 13, 2015 13:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Улонысь кошкиз тодосчи Иван Тараканов

ТаракановВарлам выжы — кужмо выжы

Удмурт кун университетысь удмурт факультетын ужасьёс одӥгзэ яратоно дышетӥсьсэс, профессорез И. В. Таракановез ыштӥзы. Со 30 арлэсь ятыр кивалтӥз удмурт но фин-угор кылъёсъя кафедраен. Кылтодон удысъя 200 пала наукая уж гожтӥз.

Иван Васильевич вордскемын 1928-тӥ арын 2-тӥ июле Татарстанысь Бавлы ёросысь Урустамак гуртын крестьян семьяын. Таракановъёс 3 пи но 2 ныл будэтӥзы. Иван Васильевич вераллялоз вал: ми бадӟым агаеным, школаын дышетскыкумы ик, бигер сямен но, башкир сямен но, ӟуч сямен но шатыр вераськиськом вал, пе.

Данъяськиз семьяеныз, фамилиеныз:

— Мон Иванов фамилиез нуллӥсь Варлам выжыысь луисько. Та выжыос гуртамы туж трос. Вын-агайёсылэн пиналъёссы трос, песятаелэн атаезлэн гинэ но 7 пиосыз вылӥллям. Ваньзы ик соос гуртэ интыяськемын. Песятае мугорын бадӟым ик вылымтэ, но туж кужмо, сэзь. Кыӵе ке нюръяськон луэ ке, со ваньзэс йыр йылтӥз сэрпалля, пе, вал. Кужымезлы но шаплыезлы синмаськыса, гурт калык сое «пичи таракан» гинэ шуылэм. Та верамзыя ик песятае аслэсьтыз Иванов фамилизэ Таракановлы воштэм, быдэс улослы тодмо мед луомы та фамилиенымы, пе. Покров дыръя выжы-кумыосынызы урам кузя кырӟаса юмшакузы, шуылӥллям: «Ой, Тараканъёс вырӟизы ни».

Выжы-кумыысьтымы вань пиоссы кыӵе ке но крезьгуро инструментэн шудӥллям: гармошкаен, балалайкаен, крезен яке гумыен. Иван Васильевичлэн атаез крезьчи вылэм. Ачиз ик крезьёс лэсьям, быгатыса шудылэм. Нош пиналъёсызлы вордскемзы бере балалайка басьтылэм. Озьы Иван Васильевич пичиысен ик балалайкаен шудыны кутскем.

Солдат гур армиозь ӧз вутты

Гуртысьтызы 7 классъем школаез пыр потыса, И. Тараканов одӥг ар колхозын ужамын. Война аръёсы, гуртазы эвакуировать карем дышетӥсьёс вуыса, школазэс дас классъем кариллям. Иван Васильевич нош ик школае мынэ, но 8 классэз гинэ быдтыны кылдэ. Война бырыса, дышетӥсьёс дор палазы кошко, школа нош ик 7 классъем луэ. Егит пиез гуртазы ик начальной классъёсы ужаны кельто. 4 арзэ со дышетӥсьын ужамын. Гуртын улэм но ужам аръёсыз сярысь серекъяса вералляз:

— Мон армие мыныны дасяськисько ни вал. Война быремен, басьтытэк кельтӥзы. Гуртамы ми, 17 аресъем пиос, 22 кузя вал. 3 ар ӵоже тулыссэ но, сӥзьылзэ но, армие мыныны дасяськыса, ваньмы ӵош солдат гурен коркась корка ветлылӥм. 1948-тӥ арын сӥзьылзэ быдэс толэзь пала юмшам-юмшам но, мыным телеграмма вуиз. Ӵап со аре эше Евгений Самсонов, тодмо удмурт писатель, Ижевскысь пединститутэ дышетскыны пыриз. Группаязы адямиоссы тырмымтэен, аслым одӥг кыл но поттылытэк, Самсонов монэ пединститутэ дэмлам.

Октябрь толэзе Таракановлы пединститутэ кутэм сярысь телеграмма вуэм. 11-тӥ ноябре со Ижевске дышетскыны лыктэм, но нырысь удмурт но ӟуч кылын сочинение гожтэм, географиен но историен экзаменъёс сётэм. Нош гуртысьтызы ӵош ужам эшъёссэ, 20 нунал ортчыса, ваньзэсармие басьтӥллям.

Газетэз воштӥз наука

Пединститутын со нырысь-валысь стипендитэк дышетскем, 300 манет дун тырытӥллям ай. Ярам, сьӧраз быдэс кастрюля ӵыжтэм вӧй, пӧртэм кеньыръёс но кӧня ке уксё кутэм вылэм. Сюресъёс уродэн но уксё тырмымтэен, кык арзэ гуртаз бертылымтэ — сьӧраз ваем уксёен но сиён-юонэн улэм. Мукетаз толалтэ экзаменъёссэ ваньзэ ик умой сётэм но 180 манет стипендия юнматӥллям.

И. Тараканов дышетскемын Д. Яшинэн, Е. Самсоновен ӵош. Евгений Самсонов кивалтэм улсын институтын литературно-творческой кружок ужам. Иван Васильевич но отчы пыриськылэм. Нырысетӥ курс бере гужемзэ «Советской Удмуртия» газетын ужам. Тыршемез понна трос гинэ уждун сётӥллям, озьы кык толэзь куспын куанер студент вань дӥсьсэ воштэм, костюм, выль пальто басьтэм. Берло та газетын ик внештатной корреспондент луыса ужам.

Пединститут бере Таракановез «Советской Удмуртия» газетэ ужаны лэзиллям вылэм. Иван Васильевич серекъяса вера вал:

— Мон отын ӧй ужа, пегӟыса кадь гуртам бертӥ. Анай-атайёсы пересесь, соослы юрттэт кулэ вал. Пединститутлэн ректорез М. Бабин та пумысен судэ вазиськем. Монэ кысканы кутскизы. Но Сталин кулэмен, амнистие шеди.

Одӥг арзэ Бавлы школаын ужаса, Иван Васильевичлы Удмурт научно-исследовательской институтысь ӧтён вуэм. 2 арзэ научной сотрудник луыса ужа, собере 3 арзэ Тартуысь аспирантураын дышетске. Эстон кылэз тодымтэысьтыз нырысетӥ араз секыт йӧтэм — кылэз но дышетоно, наукаен но выроно. Наукая кивалтӥсез академик П. Аристэ егит аспирантлы котыр ласянь юрттэм. Соку Тартуын дышетскись аспирантъёслэсь стипендизэс 1000 манетозь ӝутӥзы. Аристэ ӵектэмъя ик И. Тараканов университетысь студентъёслы кӧня ке час удмурт кылэз нуиз.

— Аспирантураын дышетскыкум ай, атаелы дыртӥд-вуттӥд гинэ гожтэт гожтӥ. Гожтэтме лыдӟыса, йырыз курен анаелы вера, пе: «Мон сое 18 ар дышетӥсько ни, нош со гожъяськыны гинэ но дышымтэ на. Мар карыса отын пуке? — нош ик тодэ лыкто Иван Васильевичлэн верам кылъёсыз.

Инкуазь сое но яратӥз

Тараканов туж вераськись, тунсыко, капчи мылкыдо адями вал. Нош кыӵе быгатылӥз калыкен ӵош шулдыръяськыны. Ваньзэс паймытылӥз капчи, шулдыр мылкыдыныз, люкаськем калыкез серекъятыны быгатэменыз. Улонысьтыз серемес учыръёссэ туж мактаса вералляз.

Яратылӥз пӧйшураны, чорыганы, губияны. Шутэтскон нуналъёс бере ӵем гинэ вазь тулыс ик курень-пыр ымнырын ужан доры вуэ ни: «Чорыганы ветлӥм ай, трос ӧй куты, но гань-гань шутэтски. Нош кыӵе яратылӥз губи бичаны. Одӥг ведра коньыгуби понна Шарканозь но вуоз. Вералоз вал: «Губиез сиыны сомында уг яратӥськы, кудмында губи утчаса ветлыны кельше».

Ноку йырысь уз потэ Иван Васильевичлэн та верам кылъёсыз но:

— Атае 100 аресозь улэмын, ачим но озьы ик улыны малпасько. Со 96 аресказ но чорыганы ветлэ вал. Инкуазен эшъяськисько бере, малпасько, со мыным юрттоз кема улыны.

Туж жаль, Иван Васильевичлы 100 арескозь улыны ӧз кылды. Но солэн ӵыжы-выжыосыз, ӵош ужам эшъёсыз, тодмоосыз но дораз дышетскемъёс тодэ ваёнъёсазы кема аръёслы азьланьтозы солэсь сайкыт тусбуйзэ.

Зинаида Байбекова

Удмурт Дунне
By Удмурт Дунне Март 13, 2015 13:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<