Бадӟым веме

Удмурт Дунне
By Удмурт Дунне 6 марта, 2015 10:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Кам но Буй шуръёс вамен выж лэсьтонъя проект

Кам но Буй шуръёс вамен выж лэсьтонъя проект

Валля арын мытэмын Камбарка город вӧзысь Кам но Буй шуръёс вамен выжъёсты пуктон. Шаермы понна та проект тужгес бадӟымез луэ.

Удмурт Республикалэн Тӧроез Александр Соловьёв вуылӥз выжъёслэсь пуктӥськемзэс эскерыны. Та дырлы ужъёс 4 миллиард 800 миллион манет тыр быдэстэмын ни — чакламлэсь та 35 процент. Озьыен, выжъёсты пуктон умой мынэ.

Буй шур вамен выж дась ни, шуыны луоз, солэн кузьдалаез — 223 метр. Лэсьтӥськисьёс басьтӥськизы выж доры вуттӥсь сюресъёс ӝутон борды: та уж чакламлэсь ӝоггес радъяське, туннэ нуналлы 10 процентлы гинэ быдэстэмын ай ке но. Камбарка шур вамен но выж дась ини — лэсьтӥськисьёс тани-тани йылпумъялозы выж доры нуись сюресъёс лэсьтонэз.

Кам шур вамен выж бордын ужез тросгес ай — выж кыстӥськоз 1 иськемлэсь ятыр. Лэсьтӥськисьёс тыршо выжез возись юбоосты шурлэн шораз ӝутон бордын. Отчы вуттэмын кулэ луись корт конструкциос, ворттэмын сюй.

— Ужъёс шаплы быдэсъясько, — вераз Тӧро Александр Соловьёв. — Кыӵе ке юанъёс кылдо ке, соос туж ӝог сэрттӥсько-пертчисько. Кылсярысь, шуг-секытъёс кылдӥзы вал луо ворттон ласянь. Утчано луиз луоен узыр инты. Карьер вакчи дыр куспын шедьтэмын вал. Выж лэсьтӥсьёс, сюрес ӝутӥсьёс тупатэм графикъя ужало. Оскисько, ваньмыз ортчоз чакламъя но шуг-секытъёстэк, — шуиз Тӧро.

3 выж пуктонлы, сюрес лэсьтонлы ваньзэ-ӧвӧлзэ 14 миллиард манет кулэ луоз. Оглюкетэз вуоз федерал но улос бюджетъёсысь, кылемзэ висъялозы ужбергатӥсьёс — таослы ик луонлык усьтӥськоз 49 ар ӵоже ты выжъёсын кузёяськыны: кылсярысь, со вылтӥ ортчем понна дун пуктыны. Та дырлы со 200 манет чакламын. Но та лыдпус воштӥськыны быгатоз, огъя экономикаын югдурез лыдэ басьтыса.

«Инвестициосъя улос компаниысь» (ӵапак та огазеяськон уксёзэ висъя выж пуктонлы) директоръёслэн кенешенызы кивалтӥсь Александр Забарский шуиз:

— Удмурт Республикалэн кивалтӥсьёсыныз милемлы, инвесторъёслы, ужаны туж капчи. Соос милемыз валало, котыр ласянь юрттыны тыршо. Выжъёсты ӝутонэ, уно техника сяна, пыриське 700 адями — соос Россиысь тужгес но устоосыз лэсьтӥськисьёс. Озьы ик тыршо та объектлы матын улӥсьёс но: таос 150 мурт пала лыдъясько.

Александр Забарский Александр Соловьёвлы вазиськиз: шуг-секытъёс кылдӥзы банкысь кредит басьтонэн. Таин сэрен лэсьтӥськон ужъёс ӝеганы быгатозы. Тӧро оскытӥз: банкъёсын огкылэ вуомы, шуг-секытъёсты палэнтыны тыршомы.

Инвестициосты кыскон ласянь выжъёсты пуктон, Удмуртиын гинэ ӧвӧл, Россиын одӥгез бадӟымез проект луэ. Со герӟалоз Удмуртиез, Башкортостанэз, Татарстанэз, Пермь, Екатеринбург палъёсты.

Сергей Захаров

Суред вотэсысь басьтэмын

Удмурт Дунне
By Удмурт Дунне 6 марта, 2015 10:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<