Четлыкын ёркыт, но шуныт

Удмурт Дунне
By Удмурт Дунне 3 марта, 2015 13:43
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
5-3-4

Кроликез возёно четлыкын

Кӧня ке ар ни ачим валамъя кролик вордӥсько. Берло дыре соос пиямысь дугдӥзы. Тазалыксы умой кадь. Оло, шонер уг утялтӥськы?

Мария К., Якшур-Бӧдья

Одӥг ласянь, кроликез будэтыны, мукет животэн ӵошатыса, капчи. Ӝог будэ, ар ӵоже 4-6 пол но пи вайыны быгатэ. Котьма ке но та удысын но шуг-секытъёс пумиськыло.

Таза кролик 3 толэзьысен ик бызьылэ ни. 28-35 нунал ӵоже кӧто ветлэ. Нуналзэ лыдъяны сураськиськоды ке, тодэ: кроликпиос мумызылэн кӧтаз вырӟылыны кутско 25-тӥ нуналазы, озьыен, ӝоген возьмано вордӥськемзэс. Пиямез азьын кроликлэн выросъёсыз воштӥсько: огъёсыз лекесь луо, куртчылӥсько, йырйисько, мукетъёсызлы возьдаськон пыре, ватӥськыны тыршо. Но ваньзы асьсэлы кар лэсьтыны выро: гадьысьтызы я кӧтурдсысьтызы гонзэс ишкыны кутско, сое куроен я пыд улысьтызы мукет шуныт валем арбериен сурало.

Ӵемысь кролик пия вазь ӵукна. Соин ик чакласькыны эн вунэтэ. Пиез кытын ке палэнын ке, котыраз понэ — пуштрес комок ассэ шунтыны уггес вормы, кынмыса кулоз. Собере мумы пиоссэ нонтон пумысен но коӵыш музэн умой уг сюлмаськы — нунал ӵоже 1-2 пол сяна бордаз уг лэзьы. Соин но нырысетӥ 12 нуналзэ эскериськоно. Отӥяз, синъёссы усьтӥськем бере, пиосыз асьсэос нимаз кариськозы.

Но куддыръя кролик пиямысь дугдэ. Нокыӵе висёнъёсыз ӧвӧл ке, чаклалэ, кызьы сое сюдӥськоды. Мултэс трос сюдэмысь, кролик кӧй люка, азьтэмъяськыны кутске но уг бызьылы ни. Собере, мумы кроликлы туж кулэ минералъёс. Соин ик уй-нунал ӵоже 1-1,5 грамм сылал сётъяно. Сое вуэн но сураны луоз, мукет сиён пӧлы но пызьнады ке, номыр уродэз уз луы. Зэм, комбикорме эн понэ — пайдаез быре соизлэн но, таизлэн но. Сылал сяна, мел но изэм лы сётъялэ. Берлоез магазинын вузаське. Но дорады лыосты трос ке, соосты гурын пыргытоно кадь луытозяз пыже но живот азе пуктэ.

Тазалыксэ юнматон вылысь туж пайдаё чорыг вӧй. Сиёнэн сураса, нуналаз 1-2 грамм гинэ вӧй кулэ, но асьтэос ик адӟоды, макем чебертӥськоз пелёды, гонэз ик чиляны кутскоз.

Кроликлэн секытэн вакытэз умой мед ортчоз, пиосыз тазаесь мед вордӥськозы шуыса, сезьы уд сётъяно. Куд-огез тае юромо укно дураз будэтэ. 10-20 грамм удлэн пайдаез туж-туж бадӟым! Начаргес пудоез но со туж ӝог бурмытоз, отын уго трос витаминъёсыз.

Со сяна, кролик йырйиськытэк улыны уг быгаты. Пужым но кыз вайёсты туж яратэ.

Кроликъёслы кар

Кроликлы кар

Кроликлэн тазалыкез потэ на улон интыез бордысь но. Кин кызьы вордэ: одӥгъёсыз загонын, мукетъёсыз четлыкын, куинетӥосыз гидазы гинэ лэзё, куддыр мукет пудо-животэн артэ интыяло. Но пелёез мукет животэн артэ возён умой меда? Ог-огзылэсь черзы но паласькыны быгатоз, вӧсь но луыны шедьтозы. Тужгес умоез возён амал — со четлык. Эшшо устогес, со педлон, толлэсь утем интыын сылэ ке. Тодосчиос эскеризы ни: ӵапак кырын будӥсь кроликъёс тазаесь но висёнъёслы сётскисьтэмесь луо. Собере, клеткаын сюдыны но, кыед поттыны но каньылгес. Бызьылыкуз но пизэ вайыкуз, кроликез нимаз висъяны луоно. Зэм, улзэ шуныт возён ласянь сюлмаськоно, толлы борддорзэ но шунтоно, тӧл медаз пыры шуыса, висъёссэ ӵоктано.

Клеткалэн кузьдалаез 240 сантиметр, пасьталаез но азьысьтыз ӝуждалаез 65 сантиметр, мышкысьтыз ӝуждалаез 45 сантиметр (учке суредэз). Выжез рейкалэсь лэсьтэмын. Кроликъёс трос кузя ке, клеткаез кузёмытыны луоз. Тэтчан-ветлон интызэс бадӟыматон вылысь мышказ сеткалэсь лэсьтыны луоз на висъет.

Четлык липет улын но ворсам азьын сылэ ке, сое ӵемысь тӧлатоно, югыт возёно, омырын мускытэз 60-70 процент медло.

Умой сюдыса но, ӟеч интыын возьыса но, айы кроликлы оскыса но, мумыез пиосын шум уг потты ке, вазиське пудо эмъясьлы.

Леонид Перевозчиков

Туспуктӥз Александр Горбунов

Удмурт Дунне
By Удмурт Дунне 3 марта, 2015 13:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<