Юсьпиос экто арган шудэм улсын

Удмурт Дунне
By Удмурт Дунне Март 2, 2015 09:50
Чайковскиез арганэн быдэстэ В. Чирков

Чайковскиез арганэн быдэстэ В. Чирков

Удмуртиысь культура удысысь дано ужась, Дэбесын улӥсь Валерий Чирков крезьгуртэк улыны уг быгаты. Крезьгур сётэ мылкыд, шумпотон, шуэ Валерий Егорович.

65 аресъем усточи, шутэтскыны потыса но, дораз уг пукы. Кытчы ке ӧтё ке, арганзэ я баянзэ кутыса, лыктэ но сюлмысь шудэ.

Мон вордӥськи Эгра ёросысь Правой Кушья гуртын. Йылпумъяй Ижысь культурая училищеез, — веранзэ мытэ Валерий Чирков. — Ужай Эгра ёросысь Факел черкогуртын, отын вал Эграысь крезьгуръя нылпи школалэн филиалэз. Сцена вылысь шудэмме адӟыса, лэся, Дэбесысь культурая отделлэн кивалтӥсез Надежда Докучаева монэ татчы кураз. Озьы 1988-тӥ арысен улӥсько Дэбесын. Лыктэме бере ужаны кутски Дэбесысь искусствоосъя нылпи школаын. Пиналъёсты дышетӥ арганэн, баянэн, домраен но балалайкаен шудыны. Со сяна, ёросысь культура юртын ужай. 3 ансамбль кылдытӥ: «Чупчи гуръёс», «Ӟардон» но «Байгурезь». Куинез ик соос калык коллектив луизы. Пӧртэм фестивальёсын но конкурсъёсын вормылӥм, доре кӧлыны гинэ вуылӥ.

Валерий Егоровичлэн гуртаз зэмос оркестрез вань, шуыны луоз: 2 арганэз, 3 баянэз, домраез, мандолинаез но аккордеонэз. Нунал ӵоже пӧртэм инструментъёсын шудэ, чиньыосты одно ик ужатоно, шуэ. Ӝоген солэн самоучителез потоз, кызьы арганэн шудоно. Усточилэн кузпалыз Нина Яковлевна туж яратэ кырӟаны, нылпиоссы но крезьгурез валало.

— Яратоно композиторъёсы — эшъёсы Геннадий Корепанов-Камский, Николай Шкляев, Геннадий Матвеев, Геннадий Шаклеин, Анатолий Сутягин но трос мукетъёсыз. Самодеятельной композиторъёс шоры пӧртэм сямен учко, но соос пӧлын вань зэмос профессионалъёс, кылсярысь, Николай Постников. Учке ай, солэн кырӟанъёсыз калык пӧлын уло, со ик возьматэ адямилэсь профессионализмзэ. Эгралась Анатолий Протопоповлэн, Пичи Пургалась Виталий Шоркинлэн чебересь кырӟанъёссы. Мукетъёссэ но вераны луоз: Николай Новожиловез, Надежда Уткинаез, Алексей Лекомцевез, — шуэ Валерий Чирков.

Котькуд ёросын крезьгурез яратӥсьёс, кужмо арганчиос трос. Но Дэбесысь Валерий Чирков висъяське классика крезьгурез яратэменыз но шудэменыз. Мон та дырозь ӧй кылылы вал, кызьы чузъяське П. Чайковскийлэн крезьгурез арган куараен. Нош Валерий Егорович удмурт, ӟуч но кунгожсьӧр классикаез арганэн, баянэн но домраен быдэстэ.

— Мон шумпотыса шудӥсько классикаез. Туж кельшо Роберт Шуманлэн композициосыз, кылсярысь, «Весёлый крестьянин» произведениез. Яке Карл Веберлэн «Вольный стрелок» операысьтыз «Хор охотников». Нокызьы но вератэк кельтыны уг луы Пётр Чайковскийлэсь узыр, чебер крезьгурзэ. Мыло-кудо шудӥсько «Лебединое озеро» балетысьтыз «Танец маленьких лебедей» произведенизэ, «Времена года» циклзэ. Соосты домраен, арганэн но баянэн быдэстӥсько. Бен, соос шулдыргес, дыр, кылӥсько фортепианоен. Но П. Чайковскийлэн сыӵе крезьгурез, со мукет инструментъёсын но аслэсьтыз чеберзэ уг ышты. Мыным тужгес но кельше усточимылэн «Неаполитанская песенкаез». Со сыӵе капчи мылкыдо, та произведениез ритмезъя шудыны тунсыко. Сое кылзыны но, эктыны но луэ. Та крезьгурез паллян киын туж шонер шудоно, соин ик секыт сое чылкыт быдэстыны. Кин гармошкаен зол шудэ, сое вормозы, кин арганэз шергес кутылэ — П. Чайковскийлэн крезьгурез секытэнгес сётӥськоз, — шуэ Валерий Чирков.

Галина Семёнова

Туспуктӥз Владимир Беломорских

Удмурт Дунне
By Удмурт Дунне Март 2, 2015 09:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<